ଓ୍ୱାଶିଂଟନ,୨୬ା୪: ଆମେରିକାର ରାଜଧାନୀ ୱାଶିଂଟନ ଡିସିରେ ଆୟୋଜିତ ପ୍ରତିଷ୍ଠିତ ‘ହ୍ୱାଇଟ ହାଉସ କରେସପଣ୍ଡେଣ୍ଟସ ଡିନର’ କାର୍ଯ୍ୟକ୍ରମରେ ଗୁଳିକାଣ୍ଡ ଘଟିଥିଲା। କାର୍ଯ୍ୟକ୍ରମରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ, ପ୍ରଥମ ମହିଳା ମେଲାନିଆ ଟ୍ରମ୍ପ ଏବଂ ଉପ-ରାଷ୍ଟ୍ରପତି ଜେଡି ଭେନ୍ସଙ୍କ ସମେତ ଅନେକ କ୍ୟାବିନେଟ ମନ୍ତ୍ରୀ ଉପସ୍ଥିତ ଥିଲେ। ସୌଭାଗ୍ୟବଶତଃ ସମସ୍ତେ ସୁରକ୍ଷିତ ଭାବେ ବାହାରି ଆସିଥିଲେ। ହେଲେ ସନ୍ଦିଗ୍ଧ ଆକ୍ରମଣକାରୀ ୩୧ ବର୍ଷୀୟ କୋଲେ ଟୋମାସ୍ ଆଲେନ୍ଙ୍କୁ ଗିରଫ କରାଯାଇଛି।
ଆକ୍ରମଣକାରୀ କୋଲେଙ୍କ ନାମରେ ଥିବା ଲିଙ୍କ୍ଡଇନ୍ ପ୍ରୋଫାଇଲ୍ ଅନୁଯାୟୀ, ସେ କାଲିଫର୍ନିଆ ଇନ୍ଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜିରୁ ୨୦୧୭ରେ ମେକାନିକାଲ ଇଞ୍ଜିନିୟରିଂରେ ସ୍ନାତକ କରିଛନ୍ତି। ପରେ ସେ କାଲିଫର୍ନିଆ ଷ୍ଟେଟ୍ ୟୁନିଭର୍ସିଟିରୁ ୨୦୨୫ରେ କମ୍ପ୍ୟୁଟର ସାଇନ୍ସରେ ମାଷ୍ଟର ଡିଗ୍ରୀ ହାସଲ କରିଥିଲେ। ସେ ସି୨ ଏଜୁକେଶନରେ ଅନେକ ବର୍ଷ ଧରି ଟ୍ୟୁଟର ଭାବେ କାର୍ଯ୍ୟ କରିଥିଲେ। ଉକ୍ତ କମ୍ପାନୀରର ଟୋରାନ୍ସ ଅଫିସ୍ରେ ସେ ‘ଟିଚର ଅଫ୍ ଦି ମନ୍ଥ’ ଭାବେ ୨୦୨୪ରେ ତାଲିକାଭୁକ୍ତ ହୋଇଥିବା ଏକ ସୋସିଆଲ ମିଡିଆ ପୋଷ୍ଟରୁ ଜଣାପଡ଼ିଛି।
ଆଲେନ୍ ଜଣେ ସ୍ୱାଧୀନ ଗେମ୍ ଡେଭେଲପର ଭାବେ କାର୍ଯ୍ୟ କରୁଥିଲେ ବୋଲି ତାଙ୍କ ଅନ୍ଲାଇନ୍ ରିଜ୍ୟୁମ୍ରୁ ଜଣାପଡ଼ିଛି। ସେ ଷ୍ଟିମ୍ ପ୍ଲାଟଫର୍ମରେ ଭିଡିଓ ଗେମ୍ ପ୍ରସ୍ତୁତ କରୁଥିଲେ, ଯେଉଁଥିରେ ମଲିକ୍ୟୁଲାର କେମେଷ୍ଟ୍ରିକୁ ଫୋକସ୍ କରାଯାଇଛି। ଟ୍ୟୁଟର ହେବା ପୂର୍ୱରୁ ସେ ବର୍ଷେ ପାଇଁ ମେକାନିକାଲ ଇଞ୍ଜିନିୟର ଭାବେ କାର୍ଯ୍ୟ କରିଥିବା ଜଣାପଡିଛି।