ନୂଆଦିଲ୍ଲୀ, ୧୩ା୩ :ପାର୍ଲାମେଣ୍ଟ ବଜେଟ ଅଧିବେଶନର ଦ୍ୱିତୀୟ ପର୍ଯ୍ୟାୟ ସୋମବାର ଆରମ୍ଭ ହେବାକୁ ଯାଉଛି। ଏହି ପର୍ଯ୍ୟାୟରେ ଆର୍ଥତ୍କ ବିଧେୟକଗୁଡ଼ିକୁ ଗୃହୀତ କରାଇବା ଉପରେ ସରକାର ପ୍ରାଥମିକତା ଦେବେ। ଅନ୍ୟପକ୍ଷରେ ଆଦାନି ଗ୍ରୁପ୍ ବିରୋଧରେ ଅଭିଯୋଗ, ବିରୋଧୀ ନେତାଙ୍କ ବିରୋଧରେ ଭାଜପା କେନ୍ଦ୍ରୀୟ ସଂସ୍ଥାର ଦୁରୁପଯୋଗ କରୁଥିବା ପ୍ରସଙ୍ଗକୁ ନେଇ ବିରୋଧୀ ଦଳଗୁଡ଼ିକ ସରକାରଙ୍କୁ ଘେରିବେ ବୋଲି କୁହାଯାଉଛି। ଆଦାନି-ହିଣ୍ଡେନବର୍ଗ ପ୍ରସଙ୍ଗକୁ ନେଇ ବଜେଟ ଅଧିବେଶନର ପ୍ରଥମ ପର୍ଯ୍ୟାୟ ହଟ୍ଟଗୋଳରେ ଶେଷ ହୋଇଥିଲା। ଦ୍ୱିତୀୟ ପର୍ଯ୍ୟାୟରେ ପାର୍ଲାମେଣ୍ଟର ଉଭୟ ଗୃହ ପାଇଁ ରଣନୀତି ପ୍ରସ୍ତୁତି ଲାଗି ସୋମବାର ସକାଳେ ବିରୋଧୀ ଦଳଗୁଡ଼ିକ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେଙ୍କ ଅଫିସରେ ବୈଠକରେ ବସିବେ। ଆଦାନି-ହିଣ୍ଡେନ୍ବର୍ଗ ପ୍ରସଙ୍ଗରେ କଂଗ୍ରେସ ସରକାରଙ୍କଠାରୁ ଜବାବ ଦାବିରେ ହଟ୍ଟଗୋଳ ଜାରି ରଖିବ ବୋଲି ଏହାର ନେତା କେ. ସୁରେଶ କହିଛନ୍ତି। ଏହି ମାମଲାର ତଦନ୍ତ ଯୁଗ୍ମ ସଂସଦୀୟ କମିଟି (ଜେପିସି) ଦ୍ୱାରା କରାଯାଉ ବୋଲି ମୁଖ୍ୟ ବିରୋଧୀ ଦଳ ଦାବି କରିଆସୁଛି।
କେନ୍ଦ୍ରୀୟ ତଦନ୍ତକାରୀ ସଂସ୍ଥା ସିବିଆଇ ଏବଂ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ନିକଟରେ ଅନେକ ବିରୋଧୀ ନେତାଙ୍କ ଘର ଉପରେ ଚଢ଼ାଉ କରିବା ସହ କେତେଜଣଙ୍କୁ ଜେରା କରିଛି। ବିଭିନ୍ନ ମାମଲାରେ କେତେଜଣ ନେତା ଗିରଫ ହୋଇଛନ୍ତି। ଭାଜପା ନେତୃତ୍ୱାଧୀନ କେନ୍ଦ୍ର ସରକାର ବିରୋଧୀ ନେତାମାନଙ୍କୁ ଟାର୍ଗେଟ କରିବା ପାଇଁ କେନ୍ଦ୍ରୀୟ ସଂସ୍ଥାର ଦୁରୁପଯୋଗ କରୁଥିବା ନେଇ ଉଭୟ ଗୃହରେ ଜୋର୍ଦାର ସ୍ବର ଉତ୍ତୋଳନ କରାଯିବ ବୋଲି ବିଭିନ୍ନ ଦଳ ପକ୍ଷରୁ କୁହାଯାଇଛି। ସଂସଦୀୟ ବ୍ୟାପାର ରାଷ୍ଟ୍ରମନ୍ତ୍ରୀ ଅର୍ଜୁନରାମ ମେଘଓ୍ବାଲଙ୍କ ସୂଚନା ଅନୁଯାୟୀ ସରକାର ଆର୍ଥତ୍କ ବିଲ୍ ଗୃହୀତ କରାଇବା ଉପରେ ସର୍ବାଧିକ ପ୍ରାଥମିକତା ଦେବେ।
ଏହା ବ୍ୟତୀତ ରେଲଓ୍ବେ, ପଞ୍ଚାୟତିରାଜ, ପର୍ଯ୍ୟଟକ, ସଂସ୍କୃତି ଓ ସ୍ବାସ୍ଥ୍ୟ ମନ୍ତ୍ରଣାଳୟଗୁଡ଼ିକର ଅନୁଦାନ ଦାବି ଉପରେ ଆଲୋଚନା ହେବ। ପରେ ବିରୋଧୀମାନଙ୍କ ଦାବିକୁ ବିଚାରକୁ ନିଆଯିବ ବୋଲି ମେଘଓ୍ବାଲ କହିଛନ୍ତି। ସୋମବାର ଅର୍ଥମନ୍ତ୍ରୀ ନିର୍ମଳା ସୀତାରାମନ ଅତିରିକ୍ତ ଅନୁଦାନ ଦାବି ଉପସ୍ଥାପନ କରିବା ସହ ଜମ୍ମୁ-କଶ୍ମୀର କେନ୍ଦ୍ରଶାସିତ ଅଞ୍ଚଳ ଲାଗି ବଜେଟ ଉପସ୍ଥାପନ କରିବେ।
