ଗଞ୍ଜାମ,୨।୨(ବିଦ୍ୟାଧର ସାହୁ): ବିଶ୍ବ ପର୍ଯ୍ୟଟନ ମାନଚିତ୍ରରେ ସାମୁଦ୍ରିକ କଇଁଛ ବିରଳ ପ୍ରଜାତିର ଅଲିଭ ରିଡ୍ଲେଙ୍କ ଏନ୍ତୁଡ଼ିଶାଳ ଭାବେ ସ୍ବତନ୍ତ୍ର ସ୍ଥାନ ପାଇଥିବା ଋଷିକୂଲ୍ୟା ମୁହାଁଣରେ ଇକୋ କରିଡର ହେବ । ପ୍ରଥମଥର ପାଇଁ କେନ୍ଦ୍ର ସରକାର ୨୦୨୬-୨୭ କେନ୍ଦ୍ରୀୟ ବଜେଟରେ ଇକୋ ଟୁରିଜିମ୍କୁ ପ୍ରୋତ୍ସାହନ କରିବା ପାଇଁ ଗୁରୁତ୍ୱ ଦିଆଯାଇଛି । ବିଭିନ୍ନ ସ୍ଥାନରେ ଇକୋ କଡିଡ଼ର ଓ ଟର୍ଟଲ କଡିଡ଼ର ନେଇ ଗୁରୁତ୍ୱ ଦିଆଯାଇଛି। ଓଡ଼ିଶାର ଗଞ୍ଜାମ ଜିଲର ଋଷିକୁଲ୍ୟା ମୁହାଁଣ ଓ କେନ୍ଦ୍ରାପଡାର ଗହିରମଥାରେ ସର୍ବାଧିକ ସାମୁଦ୍ରିକ କଇଁଛ ସମାଗମ ହେବାର ପରିଲକ୍ଷିତ ହୁଏ । ଗତ ବର୍ଷ ଗଞ୍ଜାମର ଋଷିକୁଲ୍ୟା ମୁହାଁଣରେ ଦୁଇଟି ପର୍ଯ୍ୟାୟରେ ରେକର୍ଡ ସଂଖ୍ୟକ ୯ ଲକ୍ଷରୁ ଅଧିକ ସାମୁଦ୍ରିକ କଇଁଛଙ୍କ ସାମୂହିକ ଅଣ୍ଡାଦାନ ହୋଇଥିବାବେଳେ କେନ୍ଦ୍ରାପଡାର ଗହିମଥାରେ ୫ଲକ୍ଷରୁ ଅଧିକ କଇଁଛ ସାମୂହିକ ଅଣ୍ଡାଦାନ କରିଥିଲେ । ଏପରିକି ଉଭୟ ବେଳାଭୂମିରେ ୧୫ ଲକ୍ଷରୁ ଅଧିକ ସାମୂହିକ ଅଣ୍ଡାଦାନ ହୋଇଥିଲା । ଚଳିତ ବର୍ଷ ଏହାର ବୃଦ୍ଧି ଘଟିବାର ପରିବେଶବିତ୍ ଆଶା ରଖିଛନ୍ତି । ଓଡ଼ିଶା ସମେତ ତାମିଲନାଡୁ,ଆନ୍ଧ୍ର ପ୍ରଦେଶ, କେରଳ ଉପକୂଳବର୍ତ୍ତୀ ଗଣଅଣ୍ଡାଦାନସ୍ଥଳ ଉପରେ ଗୁରୁତ୍ୱ ଦିଆଯାଇଛି । ବିଶେଷକରି ଓଡ଼ିଶାର ଋଷିକୁଲ୍ୟା ମୁହାଁଣ ଉପରେ ଯଥେଷ୍ଟ ଗୁରୁତ୍ୱ ଦିଆଯିବ ବୋଲି ଜଣାପଡ଼ିଛି । ଏନେଇ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ସାମୁଦ୍ରିକ କଇଁଛଙ୍କ ଗଣଅଣ୍ଡାଦାନସ୍ଥଳ ଗୁଡିକକୁ ଗୁରୁତ୍ୱ ଦେଇ ବଜେଟରେ ଘୋଷଣା କରିଛନ୍ତି । ଯାହାକୁ ନେଇ ଋଷିକୁଲ୍ୟା ମୁହାଁଣରେ ଅଲିଭ ରିଡ୍ଲେଙ୍କ ଗଣ ଅଣ୍ଡାଦାନସ୍ଥଳକୁ ସୁରକ୍ଷା ନେଇ ଗୁରୁତ୍ୱ ଦିଆଯିବ । ତତ୍ ସହିତ ମୁହାଁଣକୁ ବିଶ୍ବର କୋଣ ଅନୁକୋଣରୁ ଆସୁଥିବା ପର୍ଯ୍ୟଟକମାନଙ୍କୁ ପରିବେଶ ସଚେତନତା କରାଯିବ । ଏଠାରେ ପରିବେଶବିତ୍, ପର୍ଯ୍ୟଟକଙ୍କ ଭିଡ଼ ଲାଗିଲେ ସ୍ଥାନୀୟ ଅଞ୍ଚଳବାସୀ ବ୍ୟବସାୟିକ ସୁବିଧା ପାଇଲେ ଆର୍ଥିକ ଅଭିବୃଦ୍ଧି ହୋଇପାରିବ । ସେହିପରି ରାସ୍ଥା ଘାଟ, ଆଲୋକିକରଣ ଆଦି ସହ ସ୍ଥାନୀୟ ଅଞ୍ଚଳର ବିକାଶକୁ ଗୁରୁତ୍ୱ ଦିଆଯିବ। ଯାହାକୁ ନେଇ ସ୍ଥାନୀୟ ଅଞ୍ଚଳର ଋଷିକୁଲ୍ୟା କଇଁଛ ସୁରକ୍ଷା ସମିତି ସମ୍ପାଦକ ତଥା ପରିବେଶବିତ୍ ରବିନ୍ଦ୍ର ନାଥ ସାହୁ, ପୂର୍ବତନ ସରପଞ୍ଚ ଦିଲ୍ଲୀପ ଛୋଟରାୟ ପ୍ରମୁଖ ଏହାକୁ ସ୍ବାଗତ ଜଣାଇଛନ୍ତି ।
