ନୂଆଦିଲ୍ଲୀ,୧।୯: ଦୁଲୀପ ଟ୍ରଫିର ପ୍ରଥମ ସେମିଫାଇନାଲରେ ଇଷ୍ଟ ଜୋନ ଚମତ୍କାର ବିଜୟ ହାସଲ କରିଛି। ଅଗଷ୍ଟ ୩୦ରୁ ସେପ୍ଟେମ୍ବର ୧ ମଧ୍ୟରେ ବିସିସିଆଇ ସେଣ୍ଟର ଅଫ ଏକ୍ସିଲେନ୍ସରେ ଖେଳାଯାଇଥିବା ଏହି ମ୍ୟାଚରେ ଇଷ୍ଟ ଜୋନ ସେଣ୍ଟ୍ରାଲ ଜୋନକୁ ୪ ଉଇକେଟ୍ରେ ପରାସ୍ତ କରି ଫାଇନାଲରେ ସ୍ଥାନ ପକ୍କା କରିଛି। ଇଷ୍ଟ ଜୋନର ବିଜୟରେ ଯୁବ ବ୍ୟାଟର୍ ବୈଭବ ସୂର୍ଯ୍ୟବଂଶୀଙ୍କ ଦମଦାର ବ୍ୟାଟିଂ ସହ ଦ୍ରୁତ ବୋଲର୍ ମହମ୍ମଦ ଶାମି ଓ ମୁକେଶ କୁମାରଙ୍କ ଚମତ୍କାର ବୋଲିଂର ବଡ଼ ଭୂମିକା ରହିଥିଲା।
ପ୍ରଥମେ ବ୍ୟାଟିଂ କରି ସେଣ୍ଟ୍ରାଲ ଜୋନ ୮୦.୧ ଓଭରରେ ୨୬୬ ରନ କରି ଅଲଆଉଟ ହୋଇଥିଲା। ଦଳ ପକ୍ଷରୁ ରିଙ୍କୁ ସିଂହ ସର୍ବାଧିକ ୬୬ ରନ କରିଥିଲେ। ସେ ୮୮ ବଲର ସମ୍ମୁଖୀନ ହୋଇଥିଲେ। ଆର୍ୟନ ଜୁୟାଲ ୧୧୩ ବଲରେ ୪୬ ରନ କରିଥିଲେ।
୨୬୬ ରନର ଜବାବରେ ଇଷ୍ଟ ଜୋନ ୫୭ ଓଭରରେ ସମସ୍ତ ଉଇକେଟ୍ ହରାଇ ୨୬୬ ରନ କରିଥିଲା। ଏହି ଇନିଂସରେ ବୈଭବ ସୂର୍ଯ୍ୟବଂଶୀ ଜବରଦସ୍ତ ବ୍ୟାଟିଂ କରି ୮୧ ବଲରେ ୯୨ ରନ କରିଥିଲେ। ଅଭିମନ୍ୟୁ ଈଶ୍ୱରନ ମଧ୍ୟ ୧୦୬ ବଲରେ ୬୯ ରନ କରିଥିଲେ। ସେଣ୍ଟ୍ରାଲ ଜୋନ ପାଇଁ ହର୍ଷ ଦୁବେ ୪ଟି ଉଇକେଟ୍ ନେଇଥିବା ବେଳେ ଆର୍ୟନ ପାଣ୍ଡେ ଓ ଯଶ ଠାକୁର ୩ଟି ଲେଖାଏ ଉଇକେଟ୍ ହାସଲ କରିଥିଲେ।
ଦ୍ୱିତୀୟ ଇନିଂସରେ ସେଣ୍ଟ୍ରାଲ ଜୋନର ବ୍ୟାଟିଂ ବିଶେଷ ପ୍ରଭାବ ପକାଇପାରିନଥିଲା। ଦଳ ୫୦.୨ ଓଭରରେ ମାତ୍ର ୧୫୮ ରନରେ ଅଲଆଉଟ ହୋଇଥିଲା। ଅମନ ମଖୋଡ଼େ ୮୯ ବଲର ୪୧ ରନ କରି ଦଳ ପାଇଁ ସର୍ବାଧିକ ସ୍କୋର କରିଥିଲେ।
ହର୍ଷ ଦୁବେ ୫୧ ବଲରେ ମାତ୍ର ୪ ରନ କରିଥିବା ବେଳେ ଅଧିନାୟକ ରଜତ ପାଟିଦାର ମଧ୍ୟ ନିରାଶ କରିଥିଲେ। ସେ ୧୯ ବଲରେ ମାତ୍ର ୫ ରନ କରି ଆଉଟ ହୋଇଥିଲେ।