ବାସେଟେରେ,୧୮।୧: ଚଳିତ ୧୯ ବର୍ଷରୁ କମ୍ ବିଶ୍ୱକପ୍ରେ ସୋମବାର ଏକ ବିପର୍ଯ୍ୟୟ ଘଟିଛି। ବାସେଟେରେ ଅଷ୍ଟ୍ରେଲିଆକୁ ୪ ଉଇକେଟରେ ହରାଇ ଦେଇଛି ଶ୍ରୀଲଙ୍କା। ପୂରା ମ୍ୟାଚ୍ରେ ଅଧିନାୟକ ଦୁନିଥ ଓ୍ବେଲାଲାଗେ ଛାୟୀ ହୋଇ ରହିଥିଲେ। ଉଭୟ ବ୍ୟାଟ ଓ ବଲରେ ତାଙ୍କର ଉଲ୍ଲେଖନୀୟ ପ୍ରଦର୍ଶନ ଯୋଗୁ ଶ୍ରୀଲଙ୍କା ଏହି ସହଜ ବିଜୟ ହାସଲ କରିପାରିଛି। ପ୍ରଥମେ ଶ୍ରୀଲଙ୍କା ଅଧିନାୟକ ୨୮ ରନ୍ ଖର୍ଚ୍ଚ କରି ୫ ଉଇକେଟ ନେଇ ଅଷ୍ଟ୍ରେଲିଆର ମିଡ୍ଲ ଅର୍ଡରକୁ ସମ୍ପୂର୍ଣ୍ଣ ରୂପେ ଧ୍ୱଂସ କରି ଦେଇଥିଲେ। ଫଳରେ ୧୭୫ ରନ୍ରେ ସୀମିତ ରହିଥିଲା ଅଷ୍ଟ୍ରେଲିଆ। ଅଧିନାୟକ ଓ୍ବେଲାଲାଗେ (୫୨)ଙ୍କ ଅର୍ଦ୍ଧଶତକ ଯୋଗୁ ଶ୍ରୀଲଙ୍କା ୧୩ ଓଭର ପୂର୍ବରୁ ୬ ଉଇକେଟ କ୍ଷତିରେ ବିଜୟଲକ୍ଷ୍ୟ ହାସଲ କରିନେଇଥିଲା।
ଏକଦା ଶ୍ରୀଲଙ୍କା ୪୯ ରନ୍ରେ ୪ ଉଇକେଟ ହରାଇ ସଙ୍କଟରେ ପଡ଼ିଥିଲା। ଲାଗୁଥିଲା ଅଷ୍ଟ୍ରେଲିଆ ଦଳ ମ୍ୟାଚ୍ ଛଡ଼ାଇ ନେବ। କିନ୍ତୁ ଓ୍ବେଲାଲାଗେ ଏବଂ ଉଇକେଟକିପର ଅଞ୍ଜାଲା ବାନ୍ଦାରା ୫ମ ଉଇକେଟ ପାଇଁ ୭୦ ରନ୍ ଯୋଡ଼ିଥିଲେ। ସେମାନେ ଆଉଟ୍ ହେବା ପରେ ରାନୁଦା ସମରଥନେଙ୍କ ୩୨ ରନ୍ ପାଳି ଶ୍ରୀଲଙ୍କାକୁ ଆଣି ଦେଇଥିଲା ସହଜ ବିଜୟ। ଏହା ଟୁର୍ନାମେଣ୍ଟର ଲିଗ୍ ପର୍ଯ୍ୟାୟରେ ଶ୍ରୀଲଙ୍କାର ଦ୍ୱିତୀୟ ବିଜୟ। ଏଥିଯୋଗୁ ୪ ପଏଣ୍ଟ ସହ ଶ୍ରୀଲଙ୍କା ଗ୍ରୁପ୍ ଡି’ ଶୀର୍ଷରେ ରହିଛି।
