ଓ୍ବାଶିଂଟନ୍,୧୪।୧: ଡୋନାଲ୍ଡ ଟ୍ରମ୍ପ ଜାନୁଆରୀ ୨୦ରେ ଶପଥ ନେବାକୁ ଯାଉଛନ୍ତି, କିନ୍ତୁ ଏହା ପୂର୍ବରୁ ମଧ୍ୟ ସେ ତାଙ୍କ କାର୍ଯ୍ୟକାଳ ସମ୍ପର୍କରେ ନୀତି ଏବଂ ଘୋଷଣା କରିସାରିଛନ୍ତି। ଏଥିରେ ଭିସା ନୀତି, ଅପ୍ରବାସୀଙ୍କ ସମସ୍ୟା, ବିଶ୍ୱରେ ଚାଲିଥିବା ଯୁଦ୍ଧ ଇତ୍ୟାଦି ଅନେକ ପ୍ରସଙ୍ଗ ଅନ୍ତର୍ଭୁକ୍ତ। ଟ୍ରମ୍ପ ସବୁବେଳେ ଆମେରିକୀୟମାନଙ୍କ ପାଇଁ ନିଯୁକ୍ତି ବୃଦ୍ଧି ଏବଂ H-1B ଭିସାର ପରିସରକୁ ସୀମିତ କରିବାର ପକ୍ଷପାଳକ ହୋଇଆସିଛନ୍ତି। ଏପରି ପରିସ୍ଥିତିରେ, ଏହା ବିଶ୍ୱାସ କରାଯାଉଛି ଯେ ଟ୍ରମ୍ପ ଦାୟିତ୍ୱ ଗ୍ରହଣ କରିବା ମାତ୍ରେ ସେ H-1B ଭିସା ନୀତିକୁ କଡ଼ାକଡ଼ି କରିବେ, ଯାହା ଫଳରେ ଭାରତୀୟଙ୍କ ସମେତ ବିଭିନ୍ନ ଦେଶର ଲୋକଙ୍କ ପାଇଁ ଆମେରିକାରେ କାମ କରିବା ଏବଂ ରହିବା କଷ୍ଟକର ହୋଇଯିବ। ଏହାକୁ ଅନୁଭବ କରି, କମ୍ପାନୀଗୁଡ଼ିକ ପୂର୍ବରୁ ଲୋକମାନଙ୍କୁ ଚାକିରି ଅଫରକୁ ବାତିଲ କରିବା ଆରମ୍ଭ କରିସାରିଛନ୍ତି। ଏହି ଭିସା କାର୍ଯ୍ୟକ୍ରମ ବିଦେଶୀ କୁଶଳୀ ଶ୍ରମିକମାନଙ୍କୁ ଆମେରିକୀୟ କମ୍ପାନୀଗୁଡ଼ିକରେ କାମ କରିବାକୁ ଅନୁମତି ଦେଉଥିଲେ ମଧ୍ୟ ଏହି ନୀତି ଟ୍ରମ୍ପ ସମର୍ଥକଙ୍କ ମଧ୍ୟରେ ଏକ ବିତର୍କ ଆରମ୍ଭ କରିଛି।
ଚାକିରି ଅଫର ବାତିଲ ଏବଂ ଆମେରିକାରେ ପାଠପଢ଼ାକୁ ନେଇ ଭାରତୀୟମାନଙ୍କ ମଧ୍ୟରେ ଅନିଶ୍ଚିତତାର ବାତାବରଣ ସୃଷ୍ଟି ହୋଇଛି। ଟ୍ରମ୍ପଙ୍କ ଭିସା ନୀତି ଅନେକ ଲୋକଙ୍କ ସ୍ବପ୍ନକୁ ଧୂଳିସାତ କରିପାରେ, କାରଣ H-1B ଭିସା କାର୍ଯ୍ୟକ୍ରମ ହେଉଛି ଆମେରିକାରେ ବିଦେଶୀଙ୍କ ପାଇଁ ସବୁଠାରୁ ବଡ଼ ଅସ୍ଥାୟୀ କାର୍ଯ୍ୟ ଭିସା। ଏହା ନିଯୁକ୍ତିଦାତାମାନଙ୍କୁ “ଯୋଗ୍ୟତା ଏବଂ ଦକ୍ଷତା” ଆଧାରରେ ବିଦେଶୀ ଶ୍ରମିକଙ୍କୁ ନିଯୁକ୍ତି ଦେବାକୁ ଅନୁମତି ଦିଏ।
