ଶିମଲା,୮।୧୧ : ହିମାଚଳ ପ୍ରଦେଶରେ ବିଧାନସଭା ନିର୍ବାଚନ ପାଇଁ ମାତ୍ର ଅଳ୍ପ ଦିନ ବାକି ଅଛି। ପାହାଡି ରାଜ୍ୟରେ ଭାଜପା ଏବଂ କଂଗ୍ରେସ ମଧ୍ୟରେ ସିଧାସଳଖ ପ୍ରତିଦ୍ୱନ୍ଦ୍ୱିତା ଚାଲିଛି। ତେବେ ଏଥର ଆମ ଆଦମୀ ପାର୍ଟି (ଏଏପି) ମଧ୍ୟ ପ୍ରତିଦ୍ୱନ୍ଦ୍ୱିତା କରିବାକୁ ଚେଷ୍ଟା କରୁଛି। ଗୁଜୁରାଟ ତୁଳନାରେ ହିମାଚଳ ପ୍ରଦେଶରେ ଏଏପିର ଉପସ୍ଥିତି ଦୃଶ୍ୟମାନ ହେଉନାହିଁ, ଯେଉଁ କାରଣରୁ ନିର୍ବାଚନ ବିଶ୍ଳେଷକମାନେ ଭାଜପା ଏବଂ କଂଗ୍ରେସକୁ ମୁଖ୍ୟ ଦଳ ଭାବରେ ବିଚାର କରୁଛନ୍ତି। ପାହାଡି ରାଜ୍ୟରେ ଗତ ପାଞ୍ଚ ବର୍ଷ ଧରି କ୍ଷମତାରେ ଥିବା ଭାଜପା ଅନେକ ସମସ୍ୟାର ସମ୍ମୁଖୀନ ହେଉଛି। ଯଦିଓ ଦଳ ପୁନର୍ବାର ସରକାର ଗଠନ କରିବାକୁ ଦାବି କରୁଛି, କିନ୍ତୁ ତିନୋଟି କାରଣରୁ ଦଳର ସମସ୍ୟା ବଢୁଛି। ପ୍ରଥମଟି ହେଉଛି ଗତ ତିନି ଦଶନ୍ଧି ଧରି ପାହାଡ଼ି ରାଜ୍ୟର ନିର୍ବାଚନ ଇତିହାସ। ଦ୍ୱିତୀୟ କାରଣ ହେଉଛି ଦଳର ବିଦ୍ରୋହୀ ନେତାମାନେ ନିର୍ବାଚନରେ ପ୍ରବେଶ କରୁଛନ୍ତି ଏବଂ ତୃତୀୟ କାରଣ ହେଉଛି ପୁରୁଣା ପେନସନ ଯୋଜନା।
ଟିକେଟ ବଣ୍ଟନ ସମୟରେ ଭାଜପା ଗତ ବିଧାନସଭା ନିର୍ବାଚନରେ ଜିତିଥିବା ଅନେକ ବିଧାୟକ ଏବଂ ମନ୍ତ୍ରୀଙ୍କ ଟିକେଟ କାଟି ଦେଇଛି। ଫଳରେ ସେମାନେ ବିଦ୍ରୋହୀ ପାଲଟିଛନ୍ତି। ବିଦ୍ରୋହୀ ନେତାମାନଙ୍କୁ ମନାଇବା ପାଇଁ ଚେଷ୍ଟା କରିଥିଲା, କିନ୍ତୁ ଯେତେବେଳେ ସେମାନେ ଏଥିରେ ସହମତ ନଥିଲେ, ସେତେବେଳେ ଭାଜପା କଠୋର ଭାବରେ ୪ଜଣ ପୂର୍ବତନ ବିଧାୟକ ଏବଂ ଦଳର ଉପାଧ୍ୟକ୍ଷଙ୍କ ସମେତ ୫ଜଣ ବରିଷ୍ଠ ନେତାଙ୍କୁ ଦଳରୁ ବାହାର କରିଥିଲା।
ପୁରୁଣା ପେନସନ ଯୋଜନା ହିମାଚଳ ପ୍ରଦେଶରେ ଏକ ବଡ଼ ପ୍ରସଙ୍ଗ ପାଲଟିଛି। କଂଗ୍ରେସ ପ୍ରତିଶୃତି ଦେଇଛି ଯେ ଯଦି ରାଜ୍ୟରେ ସେମାନଙ୍କ ସରକାର ଗଠନ ହୁଏ, ତେବେ କର୍ମଚାରୀଙ୍କ ପାଇଁ ପୁରୁଣା ପେନସନ ଯୋଜନା କାର୍ଯ୍ୟକାରୀ ହେବ। ଦଳର ଶୀର୍ଷ ନେତାମାନେ ରାଜସ୍ଥାନ ଏବଂ ଛତିଶଗଡକୁ ସୂଚାଉଛନ୍ତି, ଯେଉଁଠାରେ ଓପିଏସ କାର୍ଯ୍ୟକାରୀ ହୋଇସାରିଛି। ବିଶେଷଜ୍ଞଙ୍କ ମତରେ ରାଜ୍ୟରେ ଅବସରପ୍ରାପ୍ତ କର୍ମଚାରୀଙ୍କ ସଂଖ୍ୟା ଅଧିକ ଥିବାରୁ ଭାଜପା ପାଇଁ ନିର୍ବାଚନରେ ସମସ୍ୟା ହୋଇପାରେ। ହିମାଚଳ ପ୍ରଦେଶର ନିର୍ବାଚନ ଇତିହାସ ବିଷୟରେ କହିବାକୁ ଗଲେ ପ୍ରତି ପାଞ୍ଚ ବର୍ଷ ପରେ ଏଠାରେ କ୍ଷମତା ପରିବର୍ତ୍ତନର ଧାରା ଦେଖିବାକୁ ମିଳିଛି। ଗତ ତିନି ଦଶନ୍ଧି ଧରି ଗୋଟିଏ ଦଳ ସରକାର ପରେ ଅନ୍ୟ ଦଳର ସରକାର ରାଜ୍ୟରେ ଗଠନ ହେଉଛି।
