ଦେବଗଡ଼ ,୨୩।୩(ଶଶାଙ୍କ ଶେଖର ଝାଙ୍କର): କାଳ ସାଜିଲା କାଳବୈଶାଖି । କୁଆପଥର ମାଡରେ ବ୍ୟାପକ କ୍ଷୟକ୍ଷତି । କ୍ଷତିଗ୍ରସ୍ତ ଲୋକଙ୍କୁ ଗାଁ ସ୍କୁଲରେ ଆଶ୍ରୟ ଦେଲା ପ୍ରଶାସନ । ଦେବଗଡ ଜିଲାର ବିଭିନ୍ନ ସ୍ଥାନରେ ଆଜି ସଂଧ୍ୟାରେ କୁଆପଥର ବର୍ଷା ହୋଇଛି । ଫଳରେ ଘରର ଆଜବେଷ୍ଟ ଭାଙ୍ଗି ଯାଇଥିବାବେଳେ ଲୋକ ବାସହରା ହୋଇ ପଡିଛନ୍ତି । ରିଆମାଳ ବ୍ଲକ ଗୁଣ୍ଡିଆପାଲି ପଞ୍ଚାୟତରେ ବ୍ୟାପକ କ୍ଷୟକ୍ଷତି ହୋଇଛି । ଗୁଣ୍ଡିଆପାଲି ସମେତ, ଚଛୁପାଲି, ପାଇକନଗର ଗ୍ରାମରେ ଲୋକଙ୍କ ଘରର ଆଜବେଷ୍ଟ ଛାତ ସବୁ ଭାଙ୍ଗି ଯାଇଛି । ରିଆମାଳ ତହସିଲଦାର ଘଟଣାସ୍ଥଳରେ ପହଞ୍ଚି ତଦନ୍ତ କରିଥିବାବେଳେ ଗାଁ ସ୍କୁଲରେ ରାତି ପାଇଁ ଆଶ୍ରୟ ଦିଆଯାଇଛି । ଅନ୍ୟ ପକ୍ଷରେ ସରପଞ୍ଚ ପ୍ରକାଶ ଚନ୍ଦ୍ର ଆଚାର୍ଯ୍ୟ ମଧ୍ୟ ସେଠାରେ ପହଁଚି କ୍ଷତିଗ୍ରସ୍ତଙ୍କ ସହିତ ଆଲୋଚନା କରିଛନ୍ତି ଆଜି ସଂଧ୍ୟାରେ ବହୁତ ବଡ ଆକୃତିର କୁଆପଥର ସହିତ ଝଡ ତୋଫାନ ଦେଖା ଦେଇଥିଲା । ଫଳରେ ବ୍ୟାପକ କ୍ଷୟକ୍ଷତି ହୋଇଛି । ବର୍ଷା ପାଣି ଘର ଭିତରେ ପଶି ଆସବାସ ପତ୍ର ଏବଂ ଧାନ ଚାଉଳ ଆଦି କ୍ଷୟକ୍ଷତି ହୋଇଥିବା ଜଣାପଡିଛି ।
