ଜୟପୁର,୧୫।୯: ରାଜସ୍ଥାନରେ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଏଆଇଏମଆଇଏମ୍ ମୁଖ୍ୟ ଅସଦୁଦ୍ଦିନ ଓୱାଇସି ଘୋଷଣା କରିଛନ୍ତି। ଗୁରୁବାର ସେ ରାଜସ୍ଥାନର ଝୁଞ୍ଜୁନୁରେ ପହଞ୍ଚି କଂଗ୍ରେସକୁ ଟାର୍ଗେଟ କରିଥିଲେ। କଂଗ୍ରେସ ଯୋଗୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦୁଇଥର ଦେଶର ପ୍ରଧାନମନ୍ତ୍ରୀ ହୋଇଥିବା ସେ କହିଛନ୍ତି।
ଓୱାଇସି କହିଛନ୍ତି, ରାଜସ୍ଥାନରେ କଂଗ୍ରେସ ସରକାର ଲୋକଙ୍କୁ ପ୍ରତାରଣା କରୁଛି। କରୌଲିରେ ଦଙ୍ଗା ହୋଇଥିଲା କିନ୍ତୁ ରାଜ୍ୟର ମୁଖ୍ୟମନ୍ତ୍ରୀ ଯାଇ ନ ଥିଲେ। ରାଜ୍ୟରେ ମୁଦ୍ରାସ୍ଫୀତି ସର୍ବାଧିକ। ରାଜସ୍ଥାନରେ କେବଳ ଦୁଇଟି ସ୍ଲୋଗାନ ଉଠାଯାଇପାରିବ। ଗୋଟିଏ ରାଜୀବ ଗାନ୍ଧୀ ଏବଂ ଅନ୍ୟଟି ଅଶୋକ ଗେହଲୋଟ। ଯଦି ରାଜ୍ୟରେ ଗେହଲୋଟ ମୁର୍ଦ୍ଦାବାଦ ବୋଲି କହିବା ଅପରାଧ, ତେବେ ମୁଁ କହୁଛି, ଅଶୋକ ଗେହଲୋଟ ମୁର୍ଦ୍ଦାବାଦ। ରାଜ୍ୟରେ ଭାଜପା ଏବଂ କଂଗ୍ରେସ ମଧ୍ୟରେ କବାଡି ମ୍ୟାଚ ଚାଲିଛି। ପାଞ୍ଚ ବର୍ଷ ତୁମେ, ପାଞ୍ଚ ବର୍ଷ ଆମେ। ଯଦି ଭାଜପା ଆଗକୁ ବଢୁଛି, ଏଥିପାଇଁ କଂଗ୍ରେସର ସମର୍ଥନ ରହିଛି। ଏଣୁ ଆମକୁ ତୃତୀୟ ଶକ୍ତି ଖୋଜିବାକୁ ପଡିବ ବୋଲି ସେ କହିଛନ୍ତି।
