ନୂଆଦିଲ୍ଲୀ,୧୪।୩: ଯାତ୍ରୀଙ୍କ ଉପରେ ପରିସ୍ରା କରିବା ଘଟଣା ବନ୍ଦ ହେବାର ନାଁ ନେଉନାହିଁ। ନିକଟରେ ଏକ ବିମାନରେ ଏଭଳି ଘଟଣା ଘଟିଥିଲା। ଯାହାକୁ ନେଇ ଚର୍ଚ୍ଚା ମଧ୍ୟ ହୋଇଥିଲା। ବର୍ତ୍ତମାନ ଟ୍ରେନରେ ଏଭଳି ଏକ ଲଜ୍ଜାଜନକ ମାମଲା ସାମ୍ନାକୁ ଆସିଛି। ଯେଉଁଠାରେ ଟିଟି ଜଣେ ମହିଳା ଯାତ୍ରୀଙ୍କ ଉପରେ ପରିସ୍ରା କରିଛନ୍ତି। ଏଭଳି ଅଭିଯୋଗ ଆସିବା ପରେ ରେଲଓ୍ବ ପୋଲିସ ଅଭିଯୁକ୍ତ ଟିଟିଙ୍କୁ ଗିରଫ କରିଥିବା ଜଣାପଡିଛି। ଏଥିସହିତ ତାଙ୍କୁ ଚାକିରିରୁ ବରଖାସ୍ତ କରିଦିଆଯାଇଛି।
ସୂଚନାନୁସାରେ, ଅମୃତସରରୁ କୋଲକାତା ଯାଉଥିବା ଅକାଳ ତଖତ ଏକ୍ସପ୍ରେସରେ ଏହି ଘଟଣା ଘଟିଛି। ଜଣେ ଯାତ୍ରୀ ନିଜ ସ୍ତ୍ରୀଙ୍କ ସହ ଏ-୧ କୋଚ୍ରେ ଯାତ୍ରା କରୁଥିଲେ। ରବିବାର ରାତି ପ୍ରାୟ ୧୨ଟା ସମୟରେ ସ୍ତ୍ରୀ ଶୋଇଥିବା ବେଳେ ବିହାରର ଟିଟି ମୁନ୍ନା କୁମାର ଆସି ତାଙ୍କ ମୁଣ୍ଡ ଉପରେ ପରିସ୍ରା କରି ଦେଇଥିଲେ। ତେବେ ଟିଟି ମଦ୍ୟପାନ କରି ଏଭଳି କାଣ୍ଡ କରିଥିବା ଜଣାପଡିଛି।
