ପାଟନା, ୨୦।୯: ବିହାରର ସାରଣ ଜିଲାରେ ଏକ ବଡ଼ ଘଟଣା ଘଟିଯାଇଛି। ଯେଉଁଠାରେ ପେଟ୍ରୋଲିଂ ସମୟରେ ଜଣେ କନ୍ଷ୍ଟେବଳ ଓ ନିଶାସକ୍ତ ଅବସ୍ଥାରେ ଥିବା ଏଏସ୍ଆଇଙ୍କ ମଧ୍ୟରେ କଥା କଟାକଟି ହୋଇଥିଲା। ମାମଲା ଏତେ ବଢ଼ିଗଲା ଯେ ଏଏସ୍ଆଇ ହରେନ୍ଦ୍ର କୁମାର ନିଜ ସର୍ଭିସ ରିଭଲଭରରୁ କନ୍ଷ୍ଟେବଳଙ୍କ ଉପରକୁ ଗୁଳି ଚାଳନା କରିଥିଲେ। ତେବେ ଗୁଳିଟି କନ୍ଷ୍ଟେବଳଙ୍କ ପେଟରେ ବାଜି ବାହାରି ଯାଇଥିଲା। ଫାୟାରିଂରେ ଆହତ ହୋଇଥିବା କନ୍ଷ୍ଟେବଳ ଅଶୋକଙ୍କୁ ସାଥୀ କର୍ମଚାରୀମାନେ ତୁରନ୍ତ ହସ୍ପିଟାଲ ନେଇଯାଇଥିଲେ। ଅଶୋକ ଏନେଇ ଥାନାରେ ଏକ ପ୍ରାଥମିକ ଏଫ୍ଆଇଆର୍ ଦାଖଲ କରିଛନ୍ତି। ଏହି ଘଟଣାଟି ଶନିବାର ବିଳମ୍ପିତ ରାତିରେ ଏନ୍ଏଚ୍ ୯୦ ମୁଖ୍ୟ ରାସ୍ତାର ଦୁସାଦ ଟୋଲି ନିକଟରେ ଘଟିଥିଲା। ଗୁଳି ମାରି ଏଏସ୍ଆଇ ଜଣଙ୍କ ଗାଡ଼ିରୁ ଡେଇଁ ଫେରାର ହୋଇଯାଇଥିଲେ।
