ଦାରିଙ୍ଗବାଡି, ୮।୭ (ଅରୁଣ ସାହୁ):ସରକାର ଶୁଣିଲେନି। ସମୟ ସୀମା ପାର ହେଲା। ରାସ୍ତାକୁ ଓହ୍ଲାଇଲେ ରାଜ୍ୟର ଡ୍ରାଇଭର ସଙ୍ଘ। ଦାରିଙ୍ଗବାଡି ଶାଖାର ଡ୍ରାଇଭରମାନେ ୭ ଦଫା ଦାବି ନେଉ ଷ୍ଟିୟରିଂ ଛାଡ଼ ଆନ୍ଦୋଳନ କରୁଛନ୍ତି। ଫଳରେ ଦାରିଙ୍ଗବାଡିରୁ ଫୁଲବାଣୀ, ବ୍ରହ୍ମପୁର, ବାଲିଗୁଡା, ରାଇକିଆ, ବ୍ରାହ୍ମଣୀଗାଁ, ମୋହନା, ଭଂଜନଗର ଆଦି ଅଞ୍ଚଳକୁ ଯାତ୍ରୀବାହୀ ବସ ଚଳାଚକ ସମ୍ପୂର୍ଣ୍ଣ ବନ୍ଦ ରହିଥିବାବେଳେ ଭାରୀଯାନ ଟ୍ରକ, ମିନି ଟ୍ରକ, ଜିପ ଆଦି ଚଳାଚଳ ସମ୍ପୂର୍ଣ୍ଣ ବନ୍ଦ ହୋଇଯାଇଛି।
କିଛି ସରକାରୀ ବସ ଚଳାଚଳ ହେଉଥିବାବେଳେ ସରକାରୀ ବସ ଡ୍ରାଇଭରଙ୍କୁ ମଧ୍ୟ ଷ୍ଟିୟରିଂ ଛାଡିବାକୁ ଦାରିଙ୍ଗବାଡି ସଙ୍ଘ ପକ୍ଷରୁ ନିବେଦନ କରାଯାଇଛି। ସେମାନଙ୍କ ଦାବିଗୁଡିକ ମଧ୍ୟରେ ଅଟୋ ଚାଳକଙ୍କୁ ସରକାର ଶ୍ରମିକ ଭାବେ ନ ଦେଖି ସେମାନଙ୍କୁ ୱେଲଫେର ବୋର୍ଡରେ ସାମିଲ କରାଇବା ସହ ରାଜପଥର ପ୍ରତି ୧୦ କିମି ଦୂରତାରେ ଶୌଚାଳୟ, ବିଶ୍ରାମ ବ୍ୟବସ୍ଥା, ରାସ୍ତା ଦୁର୍ଘଟଣା ଓ ଅନ୍ୟାନ୍ୟ କାରଣରୁ ଲୋକଙ୍କ ଆକ୍ରୋଶର ଶିକାର ହେଉଛନ୍ତି। ତେଣୁ ସାମାଜିକ ସୁରକ୍ଷା ଯୋଗାଇବା ଗାଡିମୋଟର ଯାଞ୍ଚକୁ ପୋଲିସ ପ୍ରଶାସନ ଦ୍ୱାରା ନ କରାଇବା, ୬୦ ବର୍ଷ ପରେ ପେନସନ ବ୍ୟବସ୍ଥା କରାଇବା ଆଦି ଦାବି ରହିଛି। ଏହି ଆନ୍ଦୋଳନରେ ଦାରିଙ୍ଗବାଡି ଡ୍ରାଇଭର ସଙ୍ଘ ର ସଭାପତି ପ୍ରଭଞ୍ଜନ ନାୟକ, ଉପ ସଭାପତି ସନ୍ତୋଷ ଦିଗାଲ, ସମ୍ପାଦକ ରୁଦ୍ରଦେବ ମଲିକ, ଆଡମିନ ସଞ୍ଜୟ ମାଲବିଶୋଇ, ସଦସ୍ୟ ବିରଞ୍ଚି ବେହେରା ବାସୁଦେବ ନାୟକ,ସଞ୍ଜୟ ନାୟକ,ସମୀର ଦିଗାଲ ପ୍ରମୁଖ ଆନ୍ଦୋଳନରେ ସାମିଲ ହୋଇଛନ୍ତି। ଶାନ୍ତିଶୃଙ୍ଖଳା ତଦାରଖ ପାଇଁ ଡିଏସପି କନକ କୁମାର ମାଝିଙ୍କ ନେତୃତ୍ୱରେ ପୋଲିସ ବାହିନୀ ଉପସ୍ଥିତ ରହିଛନ୍ତି।
