କୁଚିଣ୍ଡା,୧୬ା୬(ବିରଞ୍ଚତ୍ ଦର୍କା): ଗ୍ରୀଷ୍ମ ପ୍ରବାହ ବଢିଚାଲିଥିବା ବେଳେ ଗତ କିଛିଦିନ ଧରି କୁଚିଣ୍ଡା ସହରରେ ପାନୀୟଜଳ ସମସ୍ୟା ଉତ୍କଟ ରୂପ ଧାରଣ କରିଛି। ଲୋକେ ପାଣି ମୁନ୍ଦାଏ ପାଇଁ ଦୁର୍ଦ୍ଦଶାର ସମ୍ମୁଖୀନ ହେଉଛନ୍ତି। ଏହି ସମସ୍ୟା ସମାଧାନ ପାଇଁ ଭାଜପା ପକ୍ଷରୁ ଉପଜିଲାପାଳଙ୍କୁ ଦାବିପତ୍ର ପ୍ରଦାନ କରାଯାଇଛି।
କୁଚିଣ୍ଡା ସହରର ଉଭୟ ପାଶର୍ବରେ ଥିବା ଖର୍ଲା ଓ ଭେଡେନ ନଦୀ ପ୍ରବାହିତ ହେଉଥିଲେ ହେଁ ତାହା ଏବେ ଶୁଖିଲା ପଡିଛି। ସରକାରଙ୍କ ଜନସ୍ବାସ୍ଥ୍ୟ ବିଭାଗ ପକ୍ଷରୁ ଖର୍ଲା ନଦୀ ଉପରେ ଏକ ଜଳ ଯୋଗାଣ ପ୍ରକଳ୍ପ କରି କୁଚିଣ୍ଡା ସହରକୁ ପାଇପ୍ ଯୋଗେ ଜଳ ଯୋଗାଇ ଆସୁଛି। ମାତ୍ର ପ୍ରବଳ ଗ୍ରୀଷ୍ମ ଯୋଗୁ ନଦୀର ଜଳସ୍ତର ଶୁଖିଯାଇ ଇନ୍ଟେକ କୂଅକୁ ମଧ୍ୟ ଆବଶ୍ୟକ ପାଣି ଆସୁ ନାହିଁ। ଫଳରେ ଏନ୍ଏସିର ୧୧ଗୋଟି ୱାର୍ଡ ବିଶିଷ୍ଟ କୁଚିଣ୍ଡା ସହରରେ ଜଳ ସଙ୍କଟ ଦେଖାଦେଇଛି। ଜନସ୍ବାସ୍ଥ୍ୟ ବିଭାଗ ଦିନକୁ ଦୁଇ ଓଳି ସ୍ବଳ୍ପ ସମୟ ପାଇଁ ପାଣି ଯୋଗାଣ କରୁଥିଲେ ମଧ୍ୟ ତାହା ସହରର ସମସ୍ତ ୱାର୍ଡର ଆବଶ୍ୟକତା ପୂରଣ କରିପାରୁ ନାହିଁ। ସହରର କିଛି ଅଞ୍ଚଳକୁ ବିଭାଗ ପକ୍ଷରୁ ଟ୍ୟାଙ୍କର ଯୋଗେ ଜଳ ଯୋଗାଣ ହେଉଥିଲେ ବି ତାହା ସମୁଦ୍ରକୁ ଶଙ୍ଖେ ପରି ହୋଇଛି। ଏହି ସମସ୍ୟା ନେଇ କୁଚିଣ୍ଡା ଉପଜିଲାପାଳ ଓ ଜନସ୍ବାସ୍ଥ୍ୟ ବିଭାଗର ନିର୍ବାହୀଯନ୍ତ୍ରୀ ମିଳିତ ଭାବେ ଖର୍ଲା ନଦୀକୁ ଯାଇ ସ୍ଥତି ଅନୁଧ୍ୟାନ କରିଛନ୍ତି। ଏହି ସମସ୍ୟା ସମାଧାନ ନିମନ୍ତେ ବୁଧବାର ଭାଜପା ପକ୍ଷରୁ ଜନସ୍ବାସ୍ଥ୍ୟ ବିଭାଗ ନିର୍ବାହୀଯନ୍ତ୍ରୀଙ୍କୁ ଦାବିପତ୍ର ଦିଆଯାଇଛି। ଦାବିପତ୍ର ପ୍ରଦାନ ସମୟରେ ପୂର୍ବତନ ବିଧାୟକ ତଥା ଭାଜପା ରାଜ୍ୟ ସାଧାରଣ ସମ୍ପାଦକ ରବିନାରାୟଣ ନାଏକ, ପିଙ୍କୁ ପାଣି, ମହେଶ ରାୟ, ପ୍ରାଣବନ୍ଧୁ ନାଥ, ମଣ୍ଡଳ ସଭାପତି ଉପେନ୍ଦ୍ର ପଟେଲ, ଚିତ୍ତରଞ୍ଜନ ଭୋଇ ପ୍ରମୁଖ ଉପସ୍ଥିତ ଥିଲେ। ତୁରନ୍ତ ସମସ୍ୟା ସମାଧାନ ଦିଗରେ ପଦକ୍ଷେପ ନିଆ ନ ଗଲେ ଆଗାମୀ ଦିନରେ ଭାଜପା ଆନ୍ଦୋଳନକୁ ଓହ୍ଲାଇବ ବୋଲି ଚେତାବନୀ ଦିଆଯାଇଛି।
