ମଙ୍ଗୁଳି-ଜଗତପୁର,୮ା୫(ଡି.ଏନ.ଏ.): ଟାଙ୍ଗୀ-ଚୌଦ୍ୱାର ବ୍ଲକ ଅଧୀନ କୟଳପଡା ପଞ୍ଚାୟତର ୨୦ ଓ ୨୧ ନମ୍ବର ୱାର୍ଡରେ ପ୍ରାୟ ଏକବର୍ଷ ହେବ ପାନୀୟଜଳ ସମସ୍ୟା ଲାଗିରହିଛି। ଏ ସମ୍ପର୍କରେ ଗ୍ରାମବାସୀ ବାରମ୍ବାର ବିଡିଓ ଆଶୁତୋଷ ମିଶ୍ରଙ୍କ ନିକଟରେ ଅଭିଯୋଗ କରିଥିଲେ ମଧ୍ୟ ସୁଫଳ ମିଳିପାରି ନାହିଁ। ଫଳରେ ରବିବାର ୨୦ ନମ୍ବର ଓ୍ବାର୍ଡର ଓ୍ବାର୍ଡମେମ୍ବର ସତ୍ୟସୁନ୍ଦର ପ୍ରଧାନ ଓ ୨୧ ନମ୍ବର ଓ୍ବାର୍ଡର ଓ୍ବାର୍ଡମେମ୍ବର ଗେଲ୍ଲୀ ମହାନ୍ତି(୬୫) ଟ୍ୟାଙ୍କର ଯୋଗେ ଗ୍ରାମବାସୀଙ୍କୁ ପାନୀୟଜଳ ଯୋଗାଇ ଦେଇଛନ୍ତି।
ମିଳିଥିବା ସୂଚନା ଅନୁଯାୟୀ, ଉପରୋକ୍ତ ଦୁଇଟି ଓ୍ବାର୍ଡରେ ପାନୀୟ ଜଳ ସମସ୍ୟା ଦେଖାଦେଇଛି। ଏ ସମ୍ପର୍କରେ ଅଭିଯୋଗ ହେଲେ ମଧ୍ୟ ସମସ୍ୟାର ସମାଧାନ ହୋଇପାରିନାହିଁ। ଫଳରେ ଓ୍ବାର୍ଡବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଏ ନେଇ ସ୍ଥାନୀୟ ପୂର୍ବତନ ସରପଞ୍ଚ ରଶ୍ମିରଞ୍ଜନ ପ୍ରଧାନ ଓ ଜିଲା ପରିଷଦ ସଦସ୍ୟ ଶ୍ରୀଧର ରାଉଳଙ୍କ ନେତୃତ୍ୱରେ ଗ୍ରାମର ଶତାଧିକ ଜନସାଧାରଣ ଗତମାସ ୨୫ ତାରିଖରେ ବ୍ଲକ କାର୍ଯ୍ୟାଳୟ ସମ୍ମୁଖରେ ଗରା, ମାଠିଆ ରଖି ଧାରଣା ଦେଇଥିଲେ। ଏକ ମାସ ମଧ୍ୟରେ ଏହାର ସ୍ଥାୟୀ ସମାଧାନ କରାଯିବ ଓ ଏହି ୧ ମାସ ମଧ୍ୟରେ ପଞ୍ଚାୟତ ପକ୍ଷରୁ ଉକ୍ତ ଦୁଇଟି ୱାର୍ଡକୁ ଟ୍ୟାଙ୍କର ଯୋଗେ ପାଣି ଯୋଗାଇ ଦିଆଯିବ ବୋଲି ବିଡିଓ ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିଲା। ହେଲେ ଏହାପରେ ଉକ୍ତ ଓ୍ବାର୍ଡ ଦୁଇଟିରେ ପାନୀୟଜଳ ଯୋଗାଇ ଦିଆଯାଇ ନ ଥିଲା। ଏ ନେଇ ପୂର୍ବତନ ସରପଞ୍ଚ ପ୍ରଧାନ କହିଛନ୍ତି, ବିଡିଓ ଦୁଇ ଦିନ ମଧ୍ୟରେ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ(ପିଇଓ) ଲକ୍ଷ୍ମୀଧର ପତ୍ରିଙ୍କୁ ନିର୍ଦ୍ଦେଶ ଦେବା ସହ ଉକ୍ତ ଓ୍ବାର୍ଡ ଦ୍ୱୟକୁ ଟ୍ୟାଙ୍କର ଯୋଗେ ଜଳଯୋଗାଣ ପାଇଁ ଚିଠି ଲେଖିଥିଲେ। ଇତିମଧ୍ୟରେ ୧୦ ଦିନି ବିତିଯାଇଥିଲେ ମଧ୍ୟ ବିଡିଓଙ୍କ ନିର୍ଦ୍ଦେଶ ପାଳନ କରାଯାଇନାହିଁ। ଆସନ୍ତା ୨ ଦିନ ମଧ୍ୟରେ ଦାବି ପୂରଣ କରା ନ ଗଲେ ପଞ୍ଚାୟତ କାର୍ଯ୍ୟାଳୟ ଓ ବିଡିଓଙ୍କ କାର୍ଯ୍ୟାଳୟରେ ତାଲା ପକାଇବୁ ବୋଲି ସେ କହିଛନ୍ତି। ଅପରପକ୍ଷରେ ପିଇଓ ପତ୍ରି କହିଛନ୍ତି, ବିଡିଓଙ୍କ ନିର୍ଦ୍ଦେଶରେ ପାଣି ଯୋଗାଇବା ପାଇଁ ସବୁ ବନ୍ଦୋବସ୍ତ କରାଯାଇଥିଲା। କିନ୍ତୁ ସ୍ଥାନୀୟ ସରପଞ୍ଚ କହିଲେ ପଞ୍ଚାୟତ ଟଙ୍କାରେ ଜଳଯୋଗାଣ କରାଯିବ ନାହିଁ। ଏଥିଯୋଗୁ ଜଳଯୋଗାଣ ହୋଇପାରିନାହିଁ। ଏ ନେଇ ସ୍ଥାନୀୟ ସରପଞ୍ଚ ଶୈଳବାଳା ନାୟକ କହିଛନ୍ତି, ପାଣି ପାଇଁ ନୂତନ ବୋରିଂ ଖୋଳାଯାଇ ସେଥିରେ ମୋଟର ସଂଯୋଗ କରାଯାଇଛି। କେବଳ ପାଇପ ବିଛା କାର୍ଯ୍ୟ ସରିଲେ ଆସନ୍ତା ୧୫ ତାରିଖ ମଧ୍ୟରେ ପାଣି ଯୋଗାଇ ଦିଆଯିବ। ସେଥିପାଇଁ ପଞ୍ଚାୟତ ଟଙ୍କା ଅଯଥାରେ ଖର୍ଚ୍ଚ କରାଯିବ ନାହିଁ ବୋଲି ପିଇଓଙ୍କୁ କହିଥିଲେ। ଅପରପକ୍ଷରେ ବିଡିଓଙ୍କୁ ଫୋନ୍ ଯୋଗେ ଯୋଗାଯୋଗ କରାଯାଇଥିଲେ ମଧ୍ୟ ପ୍ରତିକ୍ରିୟା ମିଳିପାରି ନାହିଁ। ଗ୍ରାମର ଦୀପ୍ତି ବେଉରା, ଚତୁର୍ଭୁଜ ନାୟକ, ମନୋଜ ଲେଙ୍କା, ବସନ୍ତ ବରାଳ, ଅନିଲ ନାୟକ, ଦିଲୀପ ନାୟକ, ଜ୍ଞାନରଞ୍ଜନ ମହାନ୍ତି, ଜୟଦେବ ମହାନ୍ତି, ଅଞ୍ଜନ ସାହୁ, ସୁନାକର ବେଉରା, ଅକ୍ଷୟ ପ୍ରଧାନ ପ୍ରମୁଖ ପାନୀୟ ଜଳ ଯୋଗାଇବାରେ ଓ୍ବାର୍ଡମେମ୍ବରଙ୍କୁ ସହଯୋଗ କରିଥିଲେ।
