ଜେନାପୁର,୨୯ା୫(ଡି.ଏନ.ଏ.): ଲୋକଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇ ଦେବା ନିମନ୍ତେ ନିର୍ମିତ ହୋଇଛି ଗ୍ରାମ୍ୟ ପାନୀୟ ଜଳ ପ୍ରକଳ୍ପ। କିନ୍ତୁ କେତକ ସ୍ଥାନରେ ତାହା ଗରିବ ଜନସାଧାରଣଙ୍କ ହିତରେ ଆଦୌ ଆସୁ ନ ଥିବା ଅଭିଯୋଗ ହୋଇଛି। ଏମିତି ଏକ ଘଟଣା ଦେଖିବାକୁ ମିଳିଛି ଯାଜପୁର ଜିଲା ଧର୍ମଶାଳା ବ୍ଲକ ଅନ୍ତର୍ଗତ ତାଳଜଙ୍ଗ ପଞ୍ଚାୟତର ବଳରାମପୁର ପାହାଡ଼ ପାଦଦେଶରେ ଥିବା ନୂଆ ତାଳଜଙ୍ଗ ଗ୍ରାମର ୪ ନମ୍ବର ୱାର୍ଡରେ। ଏଠାରେ ବିଶୁଦ୍ଧ ପାନୀୟ ଜଳ ସମସ୍ୟା ଦେଖିବାକୁ ମିଳିଛି। ଏହି ଗ୍ରାମରେ ୫୦୦ ଲୋକ ବସବାସ କରୁଛନ୍ତି। ପଞ୍ଚାୟତରେ ୧୦ ବର୍ଷ ତଳେ ସ୍ଥାପିତ ହୋଇଛି ଏକ ପ୍ରକଳ୍ପ। କିନ୍ତୁ ଏହି ପ୍ରକଳ୍ପରୁ ୪ ନମ୍ବର ୱାର୍ଡକୁ ବିଶୁଦ୍ଧ ପାନୀୟ ଜଳ ଯାଇ ପାରୁନାହିଁ। ଲୋକଙ୍କ କହିବା ମୁତାବକ, ପ୍ରକଳ୍ପ ପ୍ରତିଷ୍ଠା ହେବା ଦିନଠାରୁ ସାହିକୁ ପାଇପ୍ ସଂଯୋଗ କରାଯାଇ ନାହିଁ। ସାହିର ଲୋକେ ପାଣିଟୋପାଏ ପାଇବା ପାଇଁ ବିଭିନ୍ନ ସମୟରେ ନାନା ସମସ୍ୟାର ସମ୍ମୁଖୀନ ହେଉଛନ୍ତି। ଏହି ସାହିରେ ୩ ନଳକୂପ ଅଛି। ହେଲେ ସେ ସବୁ ଅଚଳ। ୨ କୂଅ ଶୁଖିଲା ପଡ଼ଛି। ଦୀର୍ଘ ବର୍ଷ ଧରି ଅଚଳ ହୋଇ ପଡ଼ିଥିବା ଏକ ବୋରିଙ୍ଗରୁ ଢାଳ ସାହାଯ୍ୟରେ ପାଣି ଯାହା ବାହାରୁଛି ସେଥିରେ ଲୋକେ ଚଳୁଛନ୍ତି। କୂଅରୁ ବାହାରୁଥିବା ପାଣି ସମୁଦ୍ରକୁ ଶଙ୍ଖେ ବୋଲି ଗ୍ରାମବାସୀ କହିଛନ୍ତି। ଏ ସମ୍ପର୍କରେ ପ୍ରତିକ୍ରିୟା ପାଇଁ ବିଡିଓ ଦେବେନ୍ଦ୍ର ପ୍ରସାଦ ବଳଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ତାହା ସମ୍ଭବ ହୋଇ ପାରିନାହିଁ। ଏଥିପ୍ରତି ଜିଲାପାଳ ତୁରନ୍ତ ଦୃଷ୍ଟିକୁ ଗ୍ରାମବାସୀ ଦାବି କରିଛନ୍ତି।
