ପୁରୀ,୮ା୪(ଅଜିତ୍ ମହାନ୍ତି): ଶ୍ରୀକ୍ଷେତ୍ରରୁ ଆରମ୍ଭ ହୋଇଥିଲା ଦେଶର ପ୍ରଥମ ‘ସୁଜଳ ଡ୍ରିଙ୍କ୍ ଫ୍ରମ୍ ଟ୍ୟାପ୍’ ଯୋଜନା। ପୁରୀ ସହରବାସୀଙ୍କ ସମେତ ଶ୍ରଦ୍ଧାଳୁ ଓ ପର୍ଯ୍ୟଟକଙ୍କୁ ୨୪ ଘଣ୍ଟିଆ ବିଶୁଦ୍ଧ ପାନୀୟଜଳ ଯୋଗାଇଦେବା ସହ ପ୍ଲାଷ୍ଟିକ ପାଣି ବୋତଲ ବ୍ୟବହାର ବନ୍ଦ କରାଇବା ଏହି ଯୋଜନାର ଉଦ୍ଦେଶ୍ୟ ଥିଲା। କିଛି ବର୍ଷ ଧରି ପ୍ରକଳ୍ପ ଠିକ୍ ଭାବେ ଚାଲିଲା। ଲୋକେ ଟ୍ୟାପ୍ଗୁଡ଼ିକରୁ ବିଶୁଦ୍ଧ ପାଣି ପାଇ ଖୁସିହେଲେ। ହେଲେ ସମ୍ପ୍ରତି ଅନେକ ଟ୍ୟାପ୍ ଭାଙ୍ଗିଗଲାଣି। ସେହିପରି କେତେକ ଟ୍ୟାପ୍ରୁ ଗୋଳିଆ ପାଣି ବାହାରୁଛି। ଫଳରେ ଏହି ଯୋଜନା ବିଫଳ ହୋଇଥିବା ନେଇ ସାଧାରଣରେ ଅଭିଯୋଗ ହେଉଛି।
ସୂଚନା ଅନୁଯାୟୀ, ୨୦୨୧ ଜୁଲାଇ ୨୬ରେ ପୁରୀ ସହରରେ ‘ସୁଜଳ ଡ୍ରିଙ୍କ୍ ଫ୍ରମ୍ ଟ୍ୟାପ୍’ ଯୋଜନାର ଶୁଭାରମ୍ଭ ହୋଇଥିଲା। କେନ୍ଦ୍ର ସରକାରଙ୍କ ଅମୃତ ଯୋଜନାରେ ଓଡ଼ିଶା ସରକାର ଶ୍ରୀକ୍ଷେତ୍ରରେ ପ୍ରଥମେ ଏହି ପ୍ରକଳ୍ପ କାର୍ଯ୍ୟକାରୀ କରିଥିଲେ। ପ୍ରଥମ ପର୍ଯ୍ୟାୟରେ ଶ୍ରୀମନ୍ଦିରଠାରୁ ଗୁଣ୍ଡିଚା ମନ୍ଦିର ପର୍ଯ୍ୟନ୍ତ ବିଭିନ୍ନ ସ୍ଥାନରେ ପ୍ରାୟ ୧୫୯ଟି ଏବଂ ଆଚାର୍ଯ୍ୟ ହରିହର ଛକଠାରୁ ବଳିଆପଣ୍ଡା ପର୍ଯ୍ୟନ୍ତ ଅଞ୍ଚଳରେ ପ୍ରାୟ ୫୫ଟି ଟ୍ୟାପ୍ ବ୍ୟବସ୍ଥା କରାଯାଇଥିଲା। ପରେ ଅନ୍ୟାନ୍ୟ ସ୍ଥାନରେ ଟ୍ୟାପ୍ ବ୍ୟବସ୍ଥା ହୋଇଥିଲା। ପୁରୀବାସୀଙ୍କ ସମେତ ଶ୍ରଦ୍ଧାଳୁ ଓ ପର୍ଯ୍ୟଟକ ବିଶୁଦ୍ଧ ପାଣି ପାଇ ଉପକୃତ ହେଲେ। ଶ୍ରଦ୍ଧାଳୁ ଓ ପର୍ଯ୍ୟଟକଙ୍କୁ ଆଉ ପ୍ଲାଷ୍ଟିକ ପାଣି ବୋତଲର ଆବଶ୍ୟକତା ପଡ଼ିଲା ନାହିଁ। ପୂର୍ବରୁ ସେମାନେ ପ୍ଲାଷ୍ଟିକ ବୋତଲରେ ପାଣି ଆଣୁଥିଲେ। ସେହିପରି ବଜାରରୁ ମଧ୍ୟ ପାଣି ବୋତଲ କିଣୁଥିଲେ। ପାଣି ପିଇ ସାରି ବୋତଲକୁ ଏଣେତେଣେ ଫିଙ୍ଗି ଦେଉଥିଲେ। ଫଳରେ ସହରରେ ପ୍ଲାଷ୍ଟିକ ବର୍ଜ୍ୟ ବଢୁଥିଲା। ଏହି ପ୍ଲାଷ୍ଟିକ ବର୍ଜ୍ୟ ରୋକିବାକୁ ‘ଡ୍ରିଙ୍କ୍ ଫ୍ରମ୍ ଟ୍ୟାପ୍’ ବ୍ୟବସ୍ଥା ଏକ ଭଲ ପଦକ୍ଷେପ ଥିଲା। ତେବେ ମାତ୍ର ଅଢେଇ ବର୍ଷ ଭିତରେ ଉକ୍ତ ବ୍ୟବସ୍ଥାର ଦୟନୀୟ ଚିତ୍ର ଦେଖିବାକୁ ମିଳୁଛି। କେଉଁଠି ଟ୍ୟାପ୍ ଅଚଳ ହୋଇପଡ଼ିଛି ତ ଆଉ କେଉଁଠାରେ ଅପରିଷ୍କାର ପାଣି ବାହାରୁଛି। ସେହିପରି କେତେକ ଟ୍ୟାପ୍ରେ ଲୋକେ ଗୋଡ଼ହାତ ଧୋଉଥିବାବେଳେ ଅନ୍ୟ କେଉଁଠି ଯାତ୍ରୀମାନେ ସେମାନଙ୍କ ଲୁଗା ସଫା କରୁଥିବା ଦେଖିବାକୁ ମିଳୁଛି। ସେହିଭଳି ବେଳାଭୂମି ଅଞ୍ଚଳରେ କେଉଁଠି ପାଇପ ଫାଟିଛି ତ ଆଉ କେଉଁଠାରେ ନର୍ଦ୍ଦମା ନିକଟରେ ଟ୍ୟାପ ରହିଛି। ପର୍ଯ୍ୟଟକ ଓ ସ୍ଥାନୀୟ ବାସିନ୍ଦା ପୂତିଗନ୍ଧମୟ ପରିବେଶରେ ପାଣି ପିଇବାକୁ ନାକ ଟେକୁଛନ୍ତି। ଟ୍ୟାପ୍ ପ୍ଲାଟଫର୍ମରେ ଶିଉଳି ଲାଗିଲାଣି। ଅନେକ ଟ୍ୟାପ୍ ଭାଙ୍ଗିଯାଇଥିବାରୁ ପାଣି ନଷ୍ଟ ହେବାରେ ଲାଗିଛି। ଏସବୁ ଟ୍ୟାପ୍ର ପରିଚାଳନା ବ୍ୟବସ୍ଥା ଦାୟିତ୍ୱରେ ଥିବା ୱାଟ୍କୋ ଚୁପ୍ ବସିଛି। ଫଳରେ ଶ୍ରଦ୍ଧାଳୁ ଓ ପର୍ଯ୍ୟଟକ ଦୋକାନରୁ ପାଣିବୋତଲ କିଣିବାକୁ ବାଧ୍ୟ ହେଉଛନ୍ତି। ଅନେକ ସମୟରେ ଟ୍ୟାପ୍ରୁ ବାହାରୁଥିବା ଗୋଳିଆ ପାଣି ପିଇ ଲୋକେ ଅସୁସ୍ଥ ହେଉଥବବା ଶୁଣିବାକୁ ମିଳୁଛି। ତେଣୁ ସରକାର ଏଥିପ୍ରତି ଦୃଷ୍ଟି ଦେଇ ତୁରନ୍ତ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି।