ମହାକାଳପଡ଼ା, ୨୯ା୪(ପ୍ରତାପ ଚନ୍ଦ୍ର ସ୍ବାଇଁ):କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ରାମନଗର ପଞ୍ଚାୟତ ମହାନଦୀ-ବାହାକୁଦ-ମୂଷାଡ଼ିଆ ଫେରିଘାଟରେ ଯାତ୍ରୀବାହୀ ଡଙ୍ଗା ଚଳାଚଳକୁ ନେଇ ଆଶଙ୍କା ସୃଷ୍ଟି ହୋଇଛି। ଏକ ସପ୍ତାହଧରି ଦକ୍ଷିଣ ଦିଗରୁ ପ୍ରବଳ ପବନ ବହିବା ଯୋଗୁ ସାମୁଦ୍ରିକ ଜୁଆର ଭଟ୍ଟାରେ ଯାତ୍ରୀବାହୀ ଡଙ୍ଗା ଚଳାଚଳରେ ସମସ୍ୟା ଦେଖାଯାଇଛି। ମହାନଦୀ ମଝିରେ ପାରାଦୀପର ଏକ ପ୍ରମୁଖ ଶିଳ୍ପ କାରଖାନାର ଡ୍ରେଜିଂ ଭେସଲର୍ ଦୀର୍ଘମାସ ଧରି ଲଙ୍ଗର ପକାଇ ରହିଛି। ଏହି ବିଶାଳ ଭେସଲର୍ ବାଲି ଡ୍ରେଜିଂ ପାଇଁ ରହିଥିବା ସ୍ଥାନୀୟ ଲୋକେ କହିଛନ୍ତି। ଏହି ୧ କିମି ଦୂର ବୁଲି ଡଙ୍ଗା ଯାଉଥିବାରୁ କୌଣସି କାରଣରୁ ବଡ଼ଧରଣର ଦୁର୍ଘଟଣା ଆଶଙ୍କା ରହିଛି ବୋଲି ଡଙ୍ଗାରେ ଯାତାୟାତ କରୁଥିବା ଲକ୍ଷ୍ମଣ ଦାସ, ଭବସିନ୍ଧୁ ମଣ୍ଡଳ, କାଳିନ୍ଦୀ ଦାସ, ହରେନ୍ ମଣ୍ଡଳ ପ୍ରମୁଖ କହିଛନ୍ତି। ଜିଲା ପ୍ରଶାସନ ପକ୍ଷରୁ ଏହି ଭେସଲର୍କୁ ମହାନଦୀ ଅନ୍ୟ ଶିଳ୍ପ ପ୍ଲାଣ୍ଟ ପାର୍ଶ୍ୱକୂଳକୁ ନେବା ପାଇଁ ସେମାନେ ଦାବି କରିଛନ୍ତି। ସୋମବାର ଅପରାହ୍ନରେ ଏକ ଯାତ୍ରୀବାହୀ ଡଙ୍ଗା ବାହାକୁଦ ଘାଟକୂଳରୁ ପାରାଦୀପ ପାର୍ଶ୍ୱକୁ ମହାନଦୀରେ ଯାଉଥିବା ବେଳେ ହଠାତ୍ ପ୍ରବଳ ପବନ ବହିବା ଯୋଗୁ ବାଙ୍କ ବୁଲାଇବା ବେଳେ ନିଶ୍ଚିତ ଏକ ଅଘଟଣରୁ ବର୍ତ୍ତିଯାଇଥିବା ଦେଖିବାକୁ ମିଳିଥିଲା। ଏ ସଂକ୍ରାନ୍ତରେ କେନ୍ଦ୍ରାପଡ଼ା ଜିଲାପାଳ ରଘୁରାମ ଆର୍. ଆୟରଙ୍କୁ ପଚାରିବାରେ ଘଟଣାସ୍ଥଳ ତଦାରଖ କରିବା ପରେ ପଦକ୍ଷେପ ଗ୍ରହଣ କରାଯିବ ବୋଲି କହିଛନ୍ତି।