ଭୋଜପୁର, ୫।୮: ଯୌତୁକରେ ମିଳିଲାନି ବିଳାସମୟ ଏସ୍ୟୁଭି କାର। ଶେଷରେ ଘରୁ ନବବିବାହିତ ସ୍ତ୍ରୀକୁ ତଡ଼ିଦେଲେ ଇଣ୍ଡିଆନ୍ ରେଲ୍ଓ୍ବେରେ ଲୋକ ପାଇଲଟ୍ ଥିବା ସ୍ବାମୀ। ଏଭଳି ଏକ ଲଜ୍ଜାଜନକ ଘଟଣା ବିହାରର ଭୋଜପୁରୀ ଜିଲାର ଆରା ସହରରୁ ସାମ୍ନାକୁ ଆସିଛି। ଘଟଣାରୁ ଜଣାପଡ଼ିଛି ଯେ, ବଶିଷ୍ଠ ନଗର ନିବାସୀ ଅବସରପ୍ରାପ୍ତ ଶିକ୍ଷକ ବେଦନାଥ ଶର୍ମାଙ୍କ ଝିଅ ଶୋଭାର ବିବାହ ଗତବର୍ଷ ଜୁନରେ ପିରୋଥାନା ଦୋମନ ଦିହାରର ବିକାଶ ଗୌରବଙ୍କ ସହ ହୋଇଥିଲା। ବିକାଶ ଇଣ୍ଡିଆନ ରେଲ୍ଓ୍ବେରେ ଲୋକ ପାଇଲଟ୍ ଭାବେ ଗୁଜରାତର ସାବରମତୀରେ ପୋଷ୍ଟିଂ ପାଇଥିଲେ। ଝିଅର ବିବାହରେ ବେଦନାଥ ୨୫ ଲକ୍ଷ ଟଙ୍କା ଖର୍ଚ୍ଚ କରିଥିଲେ। କିନ୍ତୁ ବାହାଘର ଦିନ ବରଘର ପକ୍ଷରୁ ଯୌତୁକ ବାବଦକୁ ଏସ୍ୟୁଭି କାର୍ ଦାବି କରିଥିଲେ। ଏହାକୁ ନେଇ କନ୍ୟାଘର ପକ୍ଷ ହରଡ଼ଘଣାରେ ପଡ଼ି ଯାଇଥିଲେ। ତେବେ କୌଣସିମତେ ବରଘର ଲୋକଙ୍କୁ ବୁଝାଇ କନ୍ୟାକୁ ବିଦାୟ ଦେଇଥିଲେ ବେଦନାଥ ଓ ତାଙ୍କ ପରିଜନ। କିନ୍ତୁ ଶଶୁର ଘର ପହଞ୍ଚତ୍ବା ପରେ କାର୍କୁ ନେଇ ଶୋଭାଙ୍କ ଉପରେ ଅତ୍ୟାଚାର ଆରମ୍ଭ ହୋଇଯାଇଥିଲା। ବିକାଶଙ୍କ ସମେତ ତାଙ୍କ ମା’, ମାମୁଁ, ଭାଇ ମିଶି ତାଙ୍କୁ କାର୍ ପାଇଁ ଚାପ ପ୍ରୟୋଗ କରିବା ସହିତ ଧମକ, ଗାଳି ଗୁଲଜ କରିଥିଲେ। ଏପରିକି ମାଡ଼ ମାରିବା ପର୍ଯ୍ୟନ୍ତ କଥା ଯାଇଥିଲା। ଗତ ଲକ୍ ଡାଉନ ପ୍ରାରମ୍ଭରେ ବିକାଶ ବେଲ୍ଟରେ ଶୋଭାଙ୍କ ତଣ୍ଟିକୁ ଚିପି ହତ୍ୟା କରିବାକୁ ଉଦ୍ୟମ କରିଥିଲେ। ଶେଷରେ କାର୍ ପାଇଁ ଶୋଭାଙ୍କୁ ଘରୁ ତଡ଼ି ଦେଇଥିଲେ ସ୍ବାମୀ। ଶୋଭାଙ୍କ ପରିବାର ପକ୍ଷରୁ ସମାଧାନ ପାଇଁ ସମସ୍ତ ପ୍ରକାର ଉଦ୍ୟମ କରାଯାଇଥିଲା। କିନ୍ତୁ କୌଣସି ସୁଫଳ ନ ମିଳିବାରୁ ଶୋଭା ଶେଷରେ ଥାନାରେ ସ୍ବାମୀ ଓ ଶଶୁର ଘର ଲୋକଙ୍କ ବିରୋଧରେ ଏଫ୍ଆଇଆର୍ ରୁଜୁ କରିଛନ୍ତି। କିନ୍ତୁ ଏଫ୍ଆଇଆର୍ ରୁଜୁ ହେବାର ୩ ସପ୍ତାହ ବିତି ଯାଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନିଆଯାଇ ନ ଥିବା ଜଣାପଡ଼ିଛି।
