ବଡବିଲ, ୨୯।୧: କେନ୍ଦୁଝର ଜିଲା ବଡବିଲ ଥାନା ଅନ୍ତର୍ଗତ ପିଏଚ୍ଡି ଅଞ୍ଚଳରେ ଜଣେ ମହିଳାଙ୍କୁ ଯୌତୁକ ଜନିତ ନିର୍ଯାତନା ଓ ତଣ୍ଟି ଚିପି ହତ୍ୟା ଉଦ୍ୟମ ଅଭିଯୋଗରେ ସମ୍ପୃକ୍ତ ଶାଶୁ, ଶ୍ୱଶୂର, ଦେଢଶୂରଙ୍କୁ ପୋଲିସ ଗୁରୁବାର ଗିରଫ କରି କୋର୍ଟ ଚାଲାଣ କରିଛି। ଅଭିଯୁକ୍ତ ସ୍ବାମୀ ଫେରାର ଅଛନ୍ତି।
ସୂଚନା ଅନୁଯାୟୀ, ବଡବିଲ ପୌରପାଳିକା ୮ନମ୍ବର ଓ୍ବାର୍ଡ ପିଏଚଡି ଅଞ୍ଚଳରେ ରହୁଥିବା ଉତ୍ତରପ୍ରଦେଶ ଆମ୍ବେଦକର ନଗର ଜିଲା ଆଶ୍ୱର ଥାନା ଅନ୍ତର୍ଗତ ମହମ୍ମଦପୁର ଅଞ୍ଚଳର ଦିଲୀପ ଜୟସ୍ବାଲଙ୍କ ପୁଅ ପ୍ରିନ୍ସ ଜୟସ୍ବାଲଙ୍କ ସହ ୨୦୨୦ ଜୁନ ୩୦ରେ ରୀନାଙ୍କ ବିବାହ ହୋଇଥିଲା। ବିବାହ ସମୟରେ ରୀନାଙ୍କ ପରିବାର ଲୋକେ ଲକ୍ଷାଧିକ ଟଙ୍କା, ଅଳଙ୍କାର, ଆସବାବ ପତ୍ର ଆଦି ଯୌତୁକ ବାବଦକୁ ଦେଇଥିଲେ। ହେଲେ ବିବାହ ପରେ ରୀନାଙ୍କ ଶାଶୁ ଘର ଲୋକେ ଅଧିକ ୧୦ ଲକ୍ଷ ଟଙ୍କା ଯୌତୁକ ଦାବି କରୁଥିଲେ। ଏ ନେଇ ଥାନାରେ ବାରମ୍ବାର ଅଭିଯୋଗ ଓ ମିଳାମିଶା ହୋଇଥିଲା। ତେବେ ମଙ୍ଗଳବାର ରାତିରେ ରୀନା ଶୋଇଥିବାବେଳେ ସ୍ବାମୀ ପ୍ରିନ୍ସ ରୀନାଙ୍କ ମୁହଁକୁ ଚାପି ଧରି ହତ୍ୟା ଉଦ୍ୟମ କରିଥିଲେ। କୌଣସି ମତେ ରୀନା ସେମାନଙ୍କ କବଳରୁ ଖସି ଆସି ବଡବିଲ ଥାନାର ଦ୍ୱାରସ୍ଥ ହୋଇଥିଲେ। ଅଭିଯୋଗକୁ ଭିତ୍ତି କରି ପୋଲିସ ଏକ ମାମଲା (ନଂ.୧୩/୨୧)ରୁଜୁ କରି ଅଭିଯୁକ୍ତ ଶାଶୁ, ଶ୍ୱଶୂର ଓ ଦେଢଶୂରଙ୍କୁ ଗିରଫ କରିଛି। ଫେରାର ଥିବା ସ୍ବାମୀ ପ୍ରିନ୍ସଙ୍କୁ ଖୁବ ଶୀଘ୍ର ଗିରଫ କରାଯିବ ବୋଲି ବଡବିଲ ଥାନା ଆଇଆଇସି ସୁଶାନ୍ତ ଦାଶ କହିଛନ୍ତି।
