ଆବୁଧାବି, ୧୨ା୧୦ (ପି.ଟି.)- କୋଲକାତା ନାଇଟ୍ ରାଇଡର୍ସ (କେକେଆର୍)ର ଓ୍ବେଷ୍ଟଇଣ୍ଡିଆନ ସ୍ପିନର ସୁନୀଲ ନାରିନ୍ଙ୍କ ବୋଲିଂ ଆକ୍ସନକୁ ନେଇ ସନ୍ଦେହ କରାଯାଇଛି। ଏଠାରେ କିଙ୍ଗ୍ସ ଇଲେଭେନ ପଞ୍ଜାବ ବିପକ୍ଷରେ ତାଙ୍କ ଦଳର ଆଇପିଏଲ୍ ମୁକାବିଲା ବେଳେ ସେ ନଜରକୁ ଆସିଛନ୍ତି। ଏହାର ପୁନରାବୃତ୍ତି ହେଲେ ଲିଗ୍ରେ ତାଙ୍କୁ ବୋଲିଂରୁ ବାରଣ କରାଯାଇପାରେ। ଶନିବାର ଅନୁଷ୍ଠିତ ଏହି ମ୍ୟାଚ୍ରେ ୩୨ ବର୍ଷୀୟ ନାରିନ ତାଙ୍କ ୪ ଓଭର ବୋଲିଂରେ ୨ଟି ଉଇକେଟ ଅକ୍ତିଆର କରିଥିଲେ। କେକେଆର୍ ଦୁଇ ଉଇକେଟରେ ବିଜୟ ଲାଭ କରିଥିଲା। ଆଇପିଏଲ୍ର ସସ୍ପେକ୍ଟେଡ୍ ବୋଲିଂ ଆକ୍ସଶନ ପଲିସି ଅନୁସାରେ ନାରିନଙ୍କ ବିରୋଧରେ ଅନ୍-ଫିଲ୍ଡ ଅମ୍ପାୟର ରିପୋର୍ଟ କରିଛନ୍ତି। ଓ୍ବେଷ୍ଟଇଣ୍ଡିଆନ ବୋଲରଙ୍କ ନାମ ଚେତାବନୀ ତାଲିକାରେ ସ୍ଥାନ ପାଇବ ଏବଂ ଟୁର୍ନାମେଣ୍ଟରେ ବୋଲିଂ ପାଇଁ ଅନୁମତି ମିଳିବ। ନାରିନଙ୍କ ବିରୋଧରେ ଯଦି ଆଉଥରେ ରିପୋର୍ଟ ହୁଏ ତେବେ ବିସିସିଆଇ ସସ୍ପେକ୍ଟ ବୋଲିଂ ଆକ୍ସନ କମିଟି ଦ୍ୱାରା କ୍ଲିୟର ନ ହେବା ପର୍ଯ୍ୟନ୍ତ ସେ ଚଳିତ ଡ୍ରିମ୍ ୧୧ ଆଇପିଏଲ୍ ୨୦୨୦ରେ ବୋଲିଂ କରିବାରୁ ବଞ୍ଚତ୍ତ ହେବେ। ସୂଚନାଯୋଗ୍ୟ, ଏହା ପୂର୍ବରୁ ୨୦୧୫ରେ ନାରିନ୍ଙ୍କ ବେଆଇନ ବୋଲିଂ ଆକ୍ସନ ପାଇଁ ଆଇସିସି ତାଙ୍କୁ ଅନ୍ତର୍ଜାତୀୟ କ୍ରିକେଟରୁ ସସ୍ପେଣ୍ଡ କରିଥିଲା। କିନ୍ତୁ ବୋଲିଂ ଆକ୍ସନରେ ସୁଧାର ଆଣିବା ପରେ ୨୦୧୬ରେ ତାଙ୍କୁ ସମସ୍ତ ଫର୍ମାଟ୍ରେ ବୋଲିଂ କରିବା ଲାଗି ଅନୁମତି ମିଳିଥିଲା।
