ଢେଙ୍କାନାଳ,୧୮ା୭(ରତନ ନାୟାର): ଢେଙ୍କାନାଳର ପ୍ରସିଦ୍ଧ ଶୈବପୀଠ କପିଳାସକୁ ଶ୍ରାବଣ ମାସରେ ଜଳଲାଗି ପାଇଁ ଆସୁଥିବା ଶ୍ରଦ୍ଧାଳୁମାନଙ୍କଠାରୁ ଦୁଇଗୁଣା ଟୋଲ୍ ଫି ଆଦାୟ କରାଯାଉଛି। ଏପରି କି ପ୍ରଶାସନ ପକ୍ଷରୁ ପ୍ରସ୍ତୁତି ବୈଠକରେ କରାଯାଇଥିବା ନିଷ୍ପତ୍ତିକୁ ଟୋଲଗେଟ୍ ନିଲାମଧାରୀ ସମ୍ପୂର୍ଣ୍ଣ ଭାବେ ବେଖାତିର କରି ଶ୍ରଦ୍ଧାଳୁମାନଙ୍କୁ ଏପରି ଶୋଷଣ କରୁଥିବାରୁ କାଉଡ଼ିଆମାନଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। ଦେବୋତ୍ତର ବିଭାଗର ରସିଦ ବହିରେ ଉକ୍ତ ବର୍ଦ୍ଧିତ ଟୋଲ୍ ଫି ସମ୍ପର୍କରେ ସ୍ପଷ୍ଟ ଭାବେ ନିଲାମଧାରୀ ଉଲ୍ଲେଖ କରୁଥିଲେ ମଧ୍ୟ ଏ ସମ୍ପର୍କରେ ଜିଲା ପ୍ରଶାସନ ଓ ଦେବୋତ୍ତର ବିଭାଗ ଜାଣି ଅଜଣା ରହିବା ଶ୍ରଦ୍ଧାଳୁମାନଙ୍କୁ ନିରାଶ କରିଛି। ରସିଦ ମାଧ୍ୟମରେ କାହା ସ୍ବାର୍ଥରେ ଏହି ବର୍ଦ୍ଧିତ ଫି ଆଦାୟ କରାଯାଉଛି ସେ ନେଇ ତଦନ୍ତ କରିବାକୁ ଦାବି ହେଉଥିବା ବେଳେ ଦେବୋତ୍ତର ବିଭାଗର କେତେଜଣ କର୍ମଚାରୀଙ୍କ ଏଥିରେ ସମ୍ପୃକ୍ତି ଥିବା ଅଭିଯୋଗ ହେଉଛି। ଏହି ଘଟଣାରେ ତୀବ୍ର ଅସନ୍ତୋଷ ପ୍ରକାଶ କରି ପୂର୍ବତନ ବିଧାୟକ ନବୀନ ନନ୍ଦ ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ଢେଙ୍କାନାଳ ଜିଲାପାଳ ଓ ଦେବୋତ୍ତର ବିଭାଗର ଦୃଷ୍ଟି ଆକର୍ଷଣ କରିଛନ୍ତି। ଶୋଷଣର ଶିକାର ହୋଇଥିବା କେତେଜଣ ଶ୍ରଦ୍ଧାଳୁ ମଧ୍ୟ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଓ ମୁଖ୍ୟ ଶାସନ ସଚିବଙ୍କୁ ଟୁଇଟ୍ ମାଧ୍ୟମରେ ଜଣାଇଛନ୍ତି।
ପୂର୍ବତନ ବିଧାୟକ ନନ୍ଦ ଅଭିଯୋଗ କରିଛନ୍ତି ଯେ, ଶ୍ରାବଣ ମାସରେ କପିଳାସରେ ଶ୍ରଦ୍ଧାଳୁମାନଙ୍କ ଭିଡ଼କୁ ଲକ୍ଷ୍ୟ ରଖି ପ୍ରଶାସନ ପକ୍ଷରୁ ପ୍ରସ୍ତୁତି ବୈଠକ କରାଯାଇଥିଲା। ଏଥିରେ ବାଇକ୍ ପିଛା ୨୦ ଟଙ୍କା, ଚାରିଚକିଆ ଯାନ ପାଇଁ ୫୦ ଟଙ୍କା ଏବଂ ଟ୍ରକ୍, ବସ୍ ଆଦି ଗାଡ଼ି ପିଛା ୧୦୦ ଟଙ୍କା ଲେଖାଏ ଟୋଲ୍ଗେଟ୍ରେ ଆଦାୟ କରାଯିବା ନିମନ୍ତେ ନିଷ୍ପତ୍ତି ହୋଇଥିଲା। କିନ୍ତୁ ପ୍ରଶାସନର ଉକ୍ତ ନିଷ୍ପତ୍ତିକୁ ଟୋଲ୍ଗେଟ୍ ନିଲାମଧାରୀ ସମ୍ପୂର୍ଣ୍ଣ ଭାବେ ବେଖାତିର କରି ଗାଡ଼ିଗୁଡ଼ିକରୁ ୧୫୦, ୨୦୦ ଏବଂ ୩୦୦ ଟଙ୍କା ପର୍ଯ୍ୟନ୍ତ ଆଦାୟ କରୁଛନ୍ତି। ବେଆଇନ ଭାବେ ଆଦାୟ ହେଉଥିବା ଏହି ଅତ୍ୟଧିକ ଅର୍ଥ କାହା ପକେଟକୁ ଯାଉଛି, ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ଏହାର ପ୍ରତିବାଦ କଲେ ଶ୍ରଦ୍ଧାଳୁଙ୍କୁ ଦୁର୍ବ୍ୟବହାର କରାଯାଉଛି। ଏଣେ ପୀଠ, ପାହାଡ଼କୁ ପରିଷ୍କାର ପରିଚ୍ଛନ୍ନ କରାଯାଉନାହିଁ। ଶ୍ରଦ୍ଧାଳୁଙ୍କ ବିଶ୍ରାମ ପାଇଁ କୌଣସି ଜାଗା ନାହିଁ। ରାଜ୍ୟ ସରକାର କପିଳାସ ପୀଠର ଉନ୍ନତି ପାଇଁ ପ୍ରୟାସ ଜାରି ରଖିଥିବା ବେଳେ ଟୋଲଗେଟ୍ ନିଲାମଧାରୀଙ୍କ ସହ ମିଶି ଦେବୋତ୍ତର ବିଭାଗର କେତେଜଣ କର୍ମଚାରୀ ଶ୍ରଦ୍ଧାଳୁମାନଙ୍କୁ ଶୋଷଣ କରିବା ଏହି ଶୈବପୀଠର ସୁନାମରେ ଆଞ୍ଚ ଆଣୁଛି। ଏହା ସ୍ଥାନୀୟ ବୁଦ୍ଧିଜୀବୀଙ୍କ ମନକୁ ଆଘାତ ପହଞ୍ଚାଉଛି। ଜିଲା ପ୍ରଶାସନ ଏ ଦିଗରେ ତୁରନ୍ତ କାର୍ଯ୍ୟାନୁଷ୍ଠାନ ନେବା ପାଇଁ ପୂର୍ବତନ ବିଧାୟକ ନନ୍ଦ ଦାବି କରିଛନ୍ତି। ଏ ସମ୍ପର୍କରେ ଜିଲା ଦେବୋତ୍ତର ଅଧିକାରୀ ତଥା ଉପଜିଲାପାଳ ସ୍ନିଗ୍ଧାରାଣୀ ଧଳ କହିଛନ୍ତି, ଅଭିଯୋଗ ଏବଂ ଟୁଇଟ୍ ବିଷୟରେ ଅବଗତ ଅଛି। ଘଟଣାର ତଦନ୍ତ କରି ସମାଧାନ କରାଯିବ। ଏ ନେଇ ରିପୋର୍ଟ ଦେବାକୁ ଅତିରିକ୍ତ ଦେବୋତ୍ତର ଅଧିକାରୀଙ୍କୁ କୁହାଯାଇଛି।
