ନାଇରୋବି,୨୫।୬: ଆମେରିକା, ଅଷ୍ଟ୍ରେଲିଆ ଓ ଭାରତର ଟାର୍ଗେଟରେ ଥିବା ଚାଇନାକୁ ଏବେ ଲାଗିଛି ଡବଲ ଝଟ୍କା। ଚାଇନାର ଗତିବିଧିକୁ ଦେଖି ଏବେ କେନିଆ ଅରବ ଡଲାରର ଏକ ରେଲଓ୍ବେ ପ୍ରୋଜେକ୍ଟକୁ ରଦ୍ଦ କରିଦେଇଥିବା ଜଣାପଡିଛି। କେନିଆ ଅଦାଲତରେ ଏହି ପ୍ରୋଜେକ୍ଟକୁ ବେଆଇନ ବୋଲି ଦର୍ଶାଯାଇଥିବା ବେଳେ ଚାଇନାର କମ୍ପାନୀକୁ ମଧ୍ୟ କଡା ସମାଲୋଚନା କରାଯାଇଛି। ଏହି ରେଲଓ୍ବେ ପ୍ରୋଜେକ୍ଟ ଚାଇନା ପାଇଁ ବହୁ ଗୁରୁତ୍ୱ ରଖୁଥିବା ବେଳେ ରାଷ୍ଟ୍ରପତି ସି ଜିନପିଙ୍ଗ ନିଜେ ଏହାର ଶୁଭେଚ୍ଛା ବାର୍ତ୍ତା ଦେଇଥିଲେ। ସୂଚନାଯୋଗ୍ୟ, ଜିନପିଙ୍ଗ ଚାଇନା ଆଫ୍ରିକା ଶିଖର ସମ୍ମିଳନୀରେ କେନିଆ ସହ ଏକ ଷ୍ଟାଣ୍ଡାର୍ଡ ଗେଜ ରେଲ ଲାଇନ ବିଛାଇବାକୁ ଚୁକ୍ତି କରିଥିଲା। ଏହାସହ ଜିନପିଙ୍ଗ କେନିଆ ରାଷ୍ଟ୍ରପତି ଉହୁରୁ କେନ୍ୟାଟାଙ୍କୁ ମୋମ୍ବାସା ପୋର୍ଟ ପର୍ଯ୍ୟନ୍ତ ମାଲ ପରିବହନକୁ ନେଇ ଶୁଭେଚ୍ଛା ଜଣାଇଥିଲେ। ହେଲେ ଏବେ କେନିଆ ଅଦାଲତ ଚାଇନାକୁ ବଡ ଝଟ୍କା ଦେଇଥିବା ଆଲୋଚନା ହେଉଛି। ସୂଚନାଯୋଗ୍ୟ, କେନିଆ ସହ ଚାଇନା ରେଲଓ୍ବେ ଲାଇନକୁ ନେଇ ୨୦୧୭ରେ ଚୁକ୍ତି କରିଥିଲା। ଅନ୍ୟପଟେ ନେପାଳ କୃଷି ମନ୍ତ୍ରଣାଳୟର ଏକ ରିପୋର୍ଟ ଅନୁଯାୟୀ, ଦେଶର ପାଖାପାଖି ୧୦ ସ୍ଥାନରେ ଚାଇନା କବ୍ଜା କରିଥିବା ଦର୍ଶାଯାଇଛି। ଏହାସହ ୩୩ ହେକ୍ଟର ନେପାଳ ଜମିରେ ନଦୀର ଧାରାକୁ ବଦଳାଇ ଦେଇଛି ଚାଇନା। ଏବେ ଏହାକୁ ନେଇ ନେପାଳରେ ଚାଇନା ବିରୋଧରେ ସ୍ବର ଉତ୍ତୋଳନ ହେଉଥିବା ଜଣାପଡିଛି।
