ଭୁବନେଶ୍ୱର, ୧୪।୧ (ବ୍ୟୁରୋ): ହକି ବିଶ୍ୱକପ୍କୁ ଆଉଟିକେ ରଙ୍ଗାରଙ୍ଗ କରିବା ପାଇଁ ଆସନ୍ତା ୧୫ ତାରିଖରୁ ପ୍ରଦର୍ଶନୀ ପଡ଼ିଆରେ ଆରମ୍ଭ ହେଉଛି ଭୁବନେଶ୍ୱର ସିଟି ଫେଷ୍ଟିଭାଲ ‘ଡଟ୍ ଫେଷ୍ଟ’ର ୨ୟ ସଂସ୍କରଣ। ରାଜ୍ୟ ତଥା ଦେଶବିଦେଶର କଳାକାରଙ୍କ ନୃତ୍ୟ, ଗୀତ ସାଙ୍ଗକୁ ଖାଦ୍ୟପେୟ, ମାର୍କେଟିଂ, କାହାଣୀ ଶୁଣା ଏବଂ ବୁଲାବୁଲିରେ ମଜିବେ ଅତିଥି, ଖେଳାଳି ଓ ରାଜଧାନୀବାସୀ। ଏଥିପାଇଁ ସମସ୍ତ ପ୍ରସ୍ତୁତି ସରିଥିବାବେଳେ ଲୋକଙ୍କ ମଧ୍ୟରେ ଏବେଠାରୁ ଆରମ୍ଭ ହୋଇଗଲାଣି କାଉଣ୍ଟଡାଉନ୍। ଉଦ୍ଘାଟନୀ ଉତ୍ସବରେ କୋରିଆନ ଗ୍ରୁପ୍ ‘ବ୍ଲାକ୍ସ୍ବାନ୍’ ସହ ଗୁରୁ ରନ୍ଧାଓ୍ବା ଓ ଦିଶା ପଟାନୀ ଆକର୍ଷଣ ସାଜିବେ। ଏଥିସହ ବିଭିନ୍ନ ଦିନରେ ଜାତୀୟ ତଥା ଅନ୍ତର୍ଜାତୀୟ ଖ୍ୟାତିସମ୍ପନ୍ନ କଳାକାରଙ୍କ ସହ ଓଡିଶାର ୧୧ ଷ୍ଟାର୍ କଳାକାର ମଞ୍ଚରେ ଜଲଓ୍ବା ଦେଖାଇବେ। ଏମାନଙ୍କ ମଧ୍ୟରେ ଦୀପ୍ତିରେଖା ପାଢୀ, ପ୍ରଜ୍ଞା
ହୋତା, ଲିସା ମିଶ୍ର, ଋତୁରାଜ ମହାନ୍ତି, ସୁସ୍ମିତା ଦାସ, ରାପର୍ ବିଗ୍ଡିଲ୍, ଅଶାଙ୍କ ଶେଖର, ସ୍ବୟମ ପାଢୀ, ସତ୍ୟଜିତ ଜେନା ଓ ଅସୀମା ପଣ୍ଡା ରହିଛନ୍ତି। ସେହିଭଳି ଇଡ୍କୋ ପ୍ରଦର୍ଶନୀ ପଡ଼ିଆ ନିକଟରେ ହେବାକୁ ଥିବା ଫ୍ଲି ମାର୍କେଟ ବା ନାଇଟ ବଜାରରେ ହୋଇଥିବା ୩ଟି ମଞ୍ଚରେ ୮୦୦ରୁ ଊର୍ଦ୍ଧ୍ୱ ଅନ୍ୟ ଆଞ୍ଚଳିକ କଳାକାରମାନେ ସମ୍ବଲପୁରୀ ନୃତ୍ୟ, ଢେମସା ନୃତ୍ୟ, ଘୁମୁରା,
ପାଇକ ଆଖଡା, ନବଦୁର୍ଗା ନୃତ୍ୟ, ଯୋଡି ଶଙ୍ଖ, ଫେଟ ଫାଇଟର୍ସ, ମାଲଖମ୍ବ ପ୍ରଭୃତି କାର୍ଯ୍ୟକ୍ରମ ସହିତ ଲୋକଙ୍କ ମନୋରଞ୍ଜନ କରିବେ। ନୋଡାଲ ଅଧିକାରୀ ତଥା ଶ୍ରମ ଆୟୁକ୍ତ ତିରୁମାଳା ନାୟକ କହିଛନ୍ତି, ଚଳିତବର୍ଷ ଡଟ୍ଫେଷ୍ଟକୁ ଆହୁରି ଆକର୍ଷଣୀୟ କରିବା ପାଇଁ ଉଭୟ ଆଞ୍ଚଳିକ ଓ ଜାତୀୟ କଳାକାରଙ୍କ ପାଇଁ ଏକ ପ୍ଲାଟ୍ଫର୍ମ ସୃଷ୍ଟି କରାଯାଇଛି। ଓଡିଶା ପ୍ରତିଭାର ଗନ୍ତାଘର ଏବଂ ଏହା ଆମ କାର୍ଯ୍ୟକ୍ରମ ମାଧ୍ୟମରେ ଲୋକଲୋଚନକୁ ଆସୁଥିବାରୁ ଅତ୍ୟନ୍ତ ଖୁସି ଲାଗୁଛି ବୋଲି ମତ ଦେଇଛନ୍ତି।
