ପୋର୍ଟଲାଣ୍ଡରୁ ଓଣ୍ଟାରିଓ ଯାଉଥିବା ଆଲାସ୍କା ଏୟାରଲାଇନ୍ସର ବୋଇଂ ୭୩୭-୯ ମାକ୍ସ ବିମାନରୁ ଉଡ଼ନ୍ତା ଅବସ୍ଥାରେ ଗୋଟିଏ ଡୋର ସମ୍ପୂର୍ଣ୍ଣ ବାହାରିଯିବାରୁ ଯାତ୍ରୀମାନଙ୍କ ମଧ୍ୟରେ ଆତଙ୍କ ଖେଳିଯାଇଥିଲା। ଶୁକ୍ରବାର ସନ୍ଧ୍ୟାରେ ଉଡ଼ାଣ ଭରିବାର କିଛି ସମୟ ପରେ ଏଭଳି ଅଘଟଣ ଘଟିଥିଲା। ବିମାନରେ ୧୭୧ ଯାତ୍ରୀ ଏବଂ ୬ ଜଣ କ୍ରିଉ ସଦସ୍ୟ ଥିଲେ। ସେତେବେଳକୁ ବିମାନ ୧୬,୩୨୫ ଫୁଟ୍ ଉଚ୍ଚରେ ଉଡ଼ୁଥିଲା। ଏହାକୁ ଫେରାଇ ଅଣାଯାଇ ପୋର୍ଟଲାଣ୍ଡ ଏୟାରପୋର୍ଟରେ ଜରୁରୀ ଅବତରଣ କରାଯାଇଥିଲା। ଫଳରେ ଯାତ୍ରୀମାନଙ୍କର କୌଣସି କ୍ଷତି ହୋଇନାହିଁ। ତେବେ କ’ଣ ପାଇଁ ଏଭଳି ଅଘଟଣ ଘଟିଲା ତା’ର ତଦନ୍ତ କରାଯାଉଥିବା ଆଲାସ୍କା ଏୟାରଲାଇନ୍ସ ପକ୍ଷରୁ କୁହାଯାଇଛି। ଆମେରିକା ଜାତୀୟ ପରିବହନ ନିରାପତ୍ତା ବୋର୍ଡ (ଏନ୍ଟିଏସ୍ବି) ମଧ୍ୟ ଘଟଣାର ତଦନ୍ତ କରୁଛି। ଆଲାସ୍କା ଏୟାରଲାଇନ୍ସ ବୋଇଂ ୭୩୭-୯ ବିମାନଗୁଡ଼ିକର ଉଡ଼ାଣକୁ ସାମୟିକ ଭାବେ ବନ୍ଦ କରିଦେଇଛି। ଡୋର ବାହାରିଯିବା ଯୋଗୁ ଯାତ୍ରୀ ଓ କର୍ମଚାରୀମାନଙ୍କ ସୁରକ୍ଷାକୁ ନେଇ ଏୟାରଲାଇନ୍ସ ସିଇଓ ବେନ୍ ମିନିକୁସି ଚିନ୍ତାବ୍ୟକ୍ତ କରିଛନ୍ତି।
