ଭୁବନେଶ୍ୱର,୨୪ା୧୧: ଓଡ଼ିଶାର ଘରେ ଘରେ ପରିଚିତ ଲୋକପ୍ରିୟ କଣ୍ଠଶିଳ୍ପୀ ହ୍ୟୁମାନ ସାଗରଙ୍କ ଅକାଳ ବିୟୋଗ ପରେ ସାରା ସଂଗୀତ ଜଗତରେ ଶୋକର ଛାୟା ଖେଳିଯାଇଛି। AIIMS ଭୁବନେଶ୍ୱରରେ ୭୨ ଘଣ୍ଟା ଧରି ଜୀବନ ସହ ସଂଗ୍ରାମ କରିବା ପରେ ସେ ଶେଷ ନିଶ୍ୱାସ ତ୍ୟାଗ କରିଥିଲେ। ଲକ୍ଷ ଲକ୍ଷ ପ୍ରଶଂସକଙ୍କ ହୃଦୟରେ ସ୍ୱତନ୍ତ୍ର ସ୍ଥାନ ସୃଷ୍ଟି କରିଥିବା ହ୍ୟୁମାନ ସାଗରଙ୍କ ବ୍ୟକ୍ତିଗତ ଜୀବନ କିନ୍ତୁ ଅଶାନ୍ତ ଥିଲା। ତାଙ୍କ ନିକଟତମ ସୂତ୍ରରୁ ଜଣାପଡ଼ିଛି ଯେ, ସେ ଭାବନାଗତ ଏବଂ ବ୍ୟକ୍ତିଗତ ସମସ୍ୟାକୁ ନେଇ ଚୁପ୍ଚାପ୍ ସଂଘର୍ଷ କରୁଥିଲେ, ଯାହାକୁ ସେ କେବେହେଲେ ସାର୍ବଜନୀନ କରିନଥିଲେ।
ଅଧିକାଂଶ ଷ୍ଟେଜ୍ ଶୋ’ ତାଙ୍କ ଟିମ୍ ଦ୍ୱାରା ପରିଚାଳିତ ହେଉଥିବା ବେଳେ, ହ୍ୟୁମାନ୍ ସାଗର ଗୁରୁତ୍ୱପୂର୍ଣ୍ଣ ରେକର୍ଡିଂ ସେସନ୍ ଗୁଡ଼ିକୁ ହଠାତ୍ ବାତିଲ କରିବା ଆରମ୍ଭ କରିଥିଲେ। ତାଙ୍କର ଏହି ଆଚରଣ ସହକର୍ମୀ ଏବଂ ସଂଗୀତ ନିର୍ଦ୍ଦେଶକଙ୍କ ମଧ୍ୟରେ ଚିନ୍ତା ସୃଷ୍ଟି କରିଥିଲା।
ବରିଷ୍ଠ ସଂଗୀତ ନିର୍ଦ୍ଦେଶକ ଶ୍ରୀକାନ୍ତ ଗୌତମ କହିଛନ୍ତି ଯେ, ହ୍ୟୁମାନ ତାଙ୍କ ପାଇଁ ପ୍ରାୟ ୮ରୁ ୧୦ଟି ଗୀତ ଆଲବମ୍ ଏବଂ ସିନେମାରେ ଗାଇଛନ୍ତି। ରେକର୍ଡିଂ ପାଇଁ ତାରିଖ ଦେଇ ମଧ୍ୟ ଦୁଇ ଥର ଆସିପାରି ନଥିଲେ। ଶ୍ରୀକାନ୍ତ ଗୌତମଙ୍କ ମତରେ, “ପରିସ୍ଥିତି ହିଁ ତାଙ୍କୁ ଆସିବାରୁ ଅଟକାଇଥିଲା। ବୋଧହୁଏ ସେ ସୁସ୍ଥ ନଥିଲେ। ସେ ହୁଏତ ଭାବିଥିବେ, ଯଦି ମୁଁ ମୋର ଶ୍ରେଷ୍ଠ ଦେଇପାରିବି ନାହିଁ, ତେବେ ଶ୍ରୀକାନ୍ତ ସାର୍ ନିରାଶ ହେବେ।” ହ୍ୟୁମାନ୍ ସାଗରଙ୍କ ଏପରି ଅକାଳ ବିୟୋଗ ଓଡ଼ିଆ ସଂଗୀତ ଜଗତରେ ଏକ ଶୂନ୍ୟସ୍ଥାନ ସୃଷ୍ଟି କରିଛି।
