ନୂଆଦିଲ୍ଲୀ,୧୦।୧୦: ତାଲିବାନ ବୈଦେଶିକ ମନ୍ତ୍ରୀ ଆମିର ଖାନ ମୁତ୍ତାକୀ ଶୁକ୍ରବାର ଭାରତ ଗସ୍ତରେ ଆସି ଆଫଗାନିସ୍ତାନ ମାଟି କୌଣସି ଦେଶ ବିରୋଧରେ ବ୍ୟବହାର ହେବାକୁ ଦିଆଯିବ ନାହିଁ ବୋଲି ପ୍ରତିଶ୍ରୁତି ଦେଇଛନ୍ତି, ଯାହାକୁ ପାକିସ୍ତାନ ଉପରେ ଏକ ପରୋକ୍ଷ ଆକ୍ଷେପ ଭାବେ ଦେଖାଯାଉଛି। ତାଙ୍କ ପ୍ରଥମ ଭାରତ ଗସ୍ତରେ ମୁତ୍ତାକୀ ପାକିସ୍ତାନକୁ ଚେତାବନୀ ଦେଇ କହିଛନ୍ତି, “ଆଫଗାନଙ୍କ ସାହସର ପରୀକ୍ଷା କରନ୍ତୁ ନାହିଁ।” ପାକିସ୍ତାନ ସୀମାନ୍ତ ନିକଟରେ ତେହରିକ-ଏ-ତାଲିବାନ ପାକିସ୍ତାନ (ଟିଟିପି) କ୍ୟାମ୍ପକୁ ଟାର୍ଗେଟ କରି କାବୁଲରେ କ୍ରସ-ବର୍ଡର ଆକ୍ରମଣ କରିବା ପରେ ଏହି କଠୋର ଚେତାବନୀ ଦିଆଯାଇଛି।
ମୁତ୍ତାକୀ କହିଛନ୍ତି, “ପାକିସ୍ତାନର ଏହି କାର୍ଯ୍ୟ ଭୁଲ ଅଟେ। ୪୦ ବର୍ଷ ପରେ ଆଫଗାନିସ୍ତାନରେ ଶାନ୍ତି ଓ ପ୍ରଗତି ଆସିଛି। ଯଦି କେହି ଏହାର ପରୀକ୍ଷା କରିବାକୁ ଚାହୁଁଛନ୍ତି, ତେବେ ସେମାନେ ସୋଭିଏତ ଯୁନିଅନ, ଆମେରିକା ଓ ନାଟୋଙ୍କୁ ପଚାରନ୍ତୁ, ଯେଉଁମାନେ ଆଫଗାନିସ୍ତାନ ସହ ଖେଳ ଖେଳିବାର ପରିଣାମ ଜାଣିଛନ୍ତି।”
ନୂଆଦିଲ୍ଲୀର ହାଇଦ୍ରାବାଦ ହାଉସରେ ମୁତ୍ତାକୀ ଭାରତୀୟ ବୈଦେଶିକ ମନ୍ତ୍ରୀ ଡ. ଏସ ଜୟଶଙ୍କରଙ୍କ ସହ ଉଚ୍ଚସ୍ତରୀୟ ବୈଠକ କରିଛନ୍ତି। ଜୟଶଙ୍କର ଘୋଷଣା କରିଛନ୍ତି ଯେ ଭାରତ କାବୁଲରେ ନିଜର ଦୂତାବାସ ପୁନର୍ବାର ଖୋଲିବ। ସେ ଆଫଗାନିସ୍ତାନର ସାର୍ବଭୌମତ୍ୱ, ଆଞ୍ଚଳିକ ଅଖଣ୍ଡତା ଓ ସ୍ୱାଧୀନତା ପ୍ରତି ଭାରତର ସମର୍ଥନକୁ ପୁନର୍ବ୍ୟକ୍ତ କରିଛନ୍ତି।
ମୁତ୍ତାକୀ ଆଞ୍ଚଳିକ ସ୍ଥିରତା ପାଇଁ ଆଫଗାନିସ୍ତାନର ପ୍ରତିବଦ୍ଧତା ଉପରେ ଜୋର ଦେଇ କହିଛନ୍ତି, “ଆମେ ସୁରକ୍ଷା ସହଯୋଗ ଉପରେ ବିସ୍ତୃତ ଆଲୋଚନା କରିଛୁ। ଆଫଗାନ ଭୂମି କୌଣସି ଦେଶ ବିରୋଧରେ ବ୍ୟବହାର ହେବାକୁ ଦିଆଯିବ ନାହିଁ।” ସେ ଦ୍ୱିପାକ୍ଷିକ ବାଣିଜ୍ୟରେ ବାଧା ହଟାଇବା ପାଇଁ ଏକ ଯୁଗ୍ମ ବାଣିଜ୍ୟ କମିଟି ଗଠନ କରାଯିବ ବୋଲି ଘୋଷଣା କରିଛନ୍ତି।
ମୁତ୍ତାକୀ ପାକିସ୍ତାନର କ୍ରସ-ବର୍ଡର କାର୍ଯ୍ୟକୁ ନିନ୍ଦା କରି କହିଛନ୍ତି, “ଏହି ପଦ୍ଧତିରେ ସମସ୍ୟାର ସମାଧାନ ହେବ ନାହିଁ। ଆଫଗାନ ଜନତାଙ୍କ ଧୈର୍ଯ୍ୟ ଓ ସାହସର ପରୀକ୍ଷା କରାଯିବା ଉଚିତ ନୁହେଁ।” ସେ ବ୍ରିଟିଶ, ସୋଭିଏତ ଓ ଆମେରିକାଙ୍କ ଐତିହାସିକ ଶିକ୍ଷାକୁ ମନେ ରଖିବାକୁ ପରାମର୍ଶ ଦେଇଛନ୍ତି।
ଜୟଶଙ୍କର କ୍ରସ-ବର୍ଡର ଆତଙ୍କବାଦର ସାଧାରଣ ଚ୍ୟାଲେଞ୍ଜ ଉପରେ ଆଲୋକପାତ କରି ଆତଙ୍କବାଦ ବିରୋଧରେ ମିଳିତ ପ୍ରୟାସର ଆବଶ୍ୟକତା ଉପରେ ଜୋର ଦେଇଛନ୍ତି। ସେ ଆଫଗାନିସ୍ତାନ ପାଇଁ ଛଅଟି ନୂଆ ପ୍ରକଳ୍ପ, ୨୦ଟି ଆମ୍ବୁଲାନ୍ସ, ଏମଆରଆଇ ଓ ସିଟି ସ୍କାନ ମେସିନ, ଟିକା, କର୍କଟ ଔଷଧ ଏବଂ ମାଦକ ପୁନର୍ବାସନ ସହାୟତା ଘୋଷଣା କରିଛନ୍ତି। ପ୍ରତୀକାତ୍ମକ ଭାବେ ସେ ମୁତ୍ତାକୀଙ୍କୁ ପାଞ୍ଚଟି ଆମ୍ବୁଲାନ୍ସ ହସ୍ତାନ୍ତର କରିଛନ୍ତି।
