ଭୁବନେଶ୍ୱର, ୧୨ା୮(ବ୍ୟୁରୋ): ୨୦୧୯ରେ ରେଳ ମନ୍ତ୍ରଣାଳୟ ପୂର୍ବତଟ ରେଳପଥ ଜୋନ୍ରୁ ଓ୍ବାଲ୍ଟିୟର ଡିଭିଜନ ଅଲଗା କରିନେଇ ଆନ୍ଧ୍ରପ୍ରଦେଶ ପାଇଁ ଏକ ସ୍ବତନ୍ତ୍ର ରେଳ ଜୋନ୍ ପ୍ରତିଷ୍ଠାର ଘୋଷଣା କରିଛି। ଏହି ନିଷ୍ପତ୍ତି ଯୋଗୁ ଇଷ୍ଟକୋଷ୍ଟ ଜୋନ୍ର ବଡ଼ କ୍ଷତି ହେବାକୁ ଯାଉଛି। ଏହାଦ୍ୱାରା ଇଷ୍ଟ କୋଷ୍ଟ ବାର୍ଷିକ ୫ରୁ ୧୦ ହଜାର କୋଟି ଟଙ୍କା ହରାଇବ ବୋଲି ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀକାନ୍ତ ଜେନା ଅଭିଯୋଗ ଆଣିିଛନ୍ତି। ଏନେଇ ବୁଧବାର ଶ୍ରୀକାନ୍ତ ବୁଧବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖିଛନ୍ତି।
ଶ୍ରୀକାନ୍ତ ତାଙ୍କ ଚିଠିରେ ଉଲ୍ଲେଖ କରିଛନ୍ତି, ଇଷ୍ଟକୋଷ୍ଟ ରେଲଓ୍ବେ ଜୋନ ୧୯୯୬ରେ ତତ୍କାଳୀନ ୟୁନାଇଟେଡ୍ ଫ୍ରଣ୍ଟ ସରକାରଙ୍କ ନିଷ୍ପତ୍ତି ଅନୁସାରେ ପ୍ରତିଷ୍ଠା ହୋଇଥିଲା। ଏହାକୁ ତତ୍କାଳୀନ ପ୍ରଧାନମନ୍ତ୍ରୀ ଏଚ୍.ଡି. ଦେବେଗୌଡ଼ା, ତତ୍କାଳୀନ ରେଳମନ୍ତ୍ରୀ ରାମବିଳାସ ପାଶ୍ୱାନଙ୍କ ଦ୍ୱାରା ଉଦ୍ଘାଟିତ ହୋଇଥିଲା। ଏହି ଉତ୍ସବରେ ସେ ମଧ୍ୟ କେନ୍ଦ୍ରମନ୍ତ୍ରୀ ଭାବେ ଉପସ୍ଥିତ ଥିଲେ। ପୂର୍ବତନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକ ବିଶିଷ୍ଟ ଅତିଥି ଭାବେ ଉପସ୍ଥିତ ଥିଲେ। ଏହା ଦେଶର ସମସ୍ତ ରେଳଜୋନ୍ ମଧ୍ୟରେ ଏକ ନମ୍ବର ହୋଇପାରିଛି। ଏଠାରୁ ପ୍ରତିବର୍ଷ ୨୫ ହଜାର କୋଟି ଟଙ୍କାରୁ ଅଧିକ ଲାଭ ହେଉଛି। ଏହି ରେଳ ଜୋନ ପ୍ରତିଷ୍ଠା ଲାଗି ବହୁ ଛାତ୍ର ଓ ଯୁବନେତା ଦିଲ୍ଲୀର ତିହାର ଜେଲଠାରୁ ଆରମ୍ଭ କରି କଟକ ଓ ଖୋର୍ଦ୍ଧା ଜେଲରେ ସମୟ କଟାଇଛନ୍ତି। ତେଣୁ ଉକ୍ତ ରେଳଜୋନ୍କୁ ସଂକୀର୍ଣ୍ଣ କରା ନ ଯାଉ। ଏପରିକି ରେଲଓ୍ବରେ ଚାକିରି କ୍ଷେତ୍ରରେ ଓଡିଆ ପିଲାଙ୍କ ସଂଖ୍ୟା ଅତି ନଗଣ୍ୟ। ଯଦି କେନ୍ଦ୍ର ସରକାର ନୀତିଗତ ଭାବେ ରାଜ୍ୟ ଓ କେନ୍ଦ୍ରିକ ରେଳଜୋନ କରିବାକୁ ଯାଉଛନ୍ତି ତେବେ ଦକ୍ଷିଣ-ପୂର୍ବ ରେଳବାଇର ଚକ୍ରଧରପୁର ଓ ଖଡଗପୁର ଡିଭିଜନର ଓଡିଶା ଅଞ୍ଚଳକୁ ଇଷ୍ଟ କୋଷ୍ଟ ଜୋନ୍ରେ ମିଶାଇ ଦିଆଯାଉ ବୋଲି ସେ କହିଛନ୍ତି।
ଅଶ୍ୱିନୀ ବୈଷ୍ଣବ ବିଜେଡି ସମର୍ଥନରେ ରାଜ୍ୟ ସଭାକୁ ଯାଇ ରେଳମନ୍ତ୍ରୀ ହୋଇଛନ୍ତି। ମୁଖ୍ୟମନ୍ତ୍ରୀ ନିଜେ ପ୍ରଧାନମନ୍ତ୍ରୀ ଓ ରେଳମନ୍ତ୍ରୀଙ୍କ ଉପରେ ଚାପ ପକାଇ ଓଡ଼ିଶାର ବୃହତର ସ୍ବାର୍ଥ ଦୃଷ୍ଟିରୁ ଆଗେଇ ଆସନ୍ତୁ ବୋଲି ଶ୍ରୀକାନ୍ତ ଉଲ୍ଲେଖ କରିଛନ୍ତି।
