ସୁସ୍ଥ ରହିବା ପାଇଁ ପ୍ରତିଦିନ ଫଳ ଖାଇବା ନିହାତି ଆବଶ୍ୟକ ବୋଲି ଡାକ୍ତରମାନେ ପରାମର୍ଶ ଦେଇଥାନ୍ତି। କାରଣ ଏଥିରେ ଭିଟାମିନ ଏବଂ ମିନେରାଲ୍ସ ଭରପୂର ମାତ୍ରାରେ ରହିଛି। ଦିନକୁ ଗୋଟିଏ ସେଓ ଖାଇବା ଜରୁରୀ ବୋଲି ଡାକ୍ତର କୁହନ୍ତି। ସେଓ ଖାଇବା ଦ୍ୱାରା ରୋଗ ଦୂର ହୋଇଥାଏ। ପ୍ରତିଦିନ ଫଳ ଖାଇଲେ ଓଜନ ମଧ୍ୟ ନିୟନ୍ତ୍ରଣରେ ରହିଥାଏ। ଏହା ସହିତ କ୍ରନିକ ରୋଗର ଆଶଙ୍କା ମଧ୍ୟ କମିଯାଏ। ଆୟୁର୍ବେଦ ଅନୁଯାୟୀ, ପ୍ରତିଦିନ ସକାଳେ ଫଳ ଖାଇବା ଦୁଇଗଣ ଲାଭ ଦେଇଥାଏ। ମାତ୍ର ସନ୍ଧ୍ୟାରେ ଫଳ ଖାଇବା ସ୍ବାସ୍ଥ୍ୟ ଉପରେ କୁପ୍ରଭାବ ପକାଇଥାଏ। ଜାଣନ୍ତୁ ଆୟୁର୍ବେଦରେ ସନ୍ଧ୍ୟା ପରେ ଫଳ ଖାଇବା କାହିଁକି ବାରଣ କରାଯାଇଛି…
ଆୟୁର୍ବେଦ ଅନୁଯାୟୀ, ସୂର୍ଯ୍ୟାସ୍ତ ପରେ ଫଳ ଖାଇବା ଦ୍ୱାରା ନିଦ୍ରାରେ ବ୍ୟାହତ ସୃଷ୍ଟି ହୁଏ। ଏହା ସହିତ ହଜମ ପ୍ରକ୍ରିୟା ମଧ୍ୟ ପ୍ରଭାବିତ ହୋଇଥାଏ। ଯେହେତୁ ଆମେ ସମସ୍ତେ ଜାଣୁ ଯେ, ଫଳଗୁଡ଼ିକରେ କାର୍ବୋହାଇଡ୍ରେଟ ଥାଏ ଏବଂ ଏହି କାର୍ବସ ସହଜରେ ଶର୍କରାରେ ପରିଣତ ହୁଏ। ଏହା ଶରୀରକୁ ତତକ୍ଷଣାତ୍ ଶକ୍ତି ପ୍ରଦାନ କରେ। ଫଳ ଖାଇବା ଦ୍ୱାରା ରକ୍ତରେ ଶର୍କରାସ୍ତର ବୃଦ୍ଧି ପାଇଥାଏ। ଏହି କାରଣରୁ, ରାତିରେ ନିଦ ଭାଙ୍ଗିଥାଏ।
ସକାଳେ ଖାଲି ପେଟରେ ଫଳ ଖାଇବା ଅଧିକ ଲାଭଦାୟକ ଅଟେ। ରାତିରେ ପ୍ରାୟ ଦଶ ଘଣ୍ଟା ବିଶ୍ରାମ ପରେ ପେଟ ଖାଲି ରହିଥାଏ। ସକାଳେ ଖାଲି ପେଟରେ ଫଳ ଖାଇବା ଶରୀରକୁ ତୁରନ୍ତ ଶକ୍ତି ପ୍ରଦାନ କରିବା ସହିତ ମେଟାବୋଲିଜିମ୍ ମଧ୍ୟ ବଢ଼ାଇଥାଏ। ମଧ୍ୟାହ୍ନଭୋଜନର ଅଧ ଘଣ୍ଟା ପରେ ଫଳ ଖାଇବା ଉଚିତ୍। ପନିପରିବା ଏବଂ କ୍ଷୀର ସହିତ ଫଳ କେବେବି ଖାଇବା ଉଚିତ୍ ନୁହେଁ। ଏହା ସ୍ବାସ୍ଥ୍ୟ ଉପରେ ଖରାପ ପ୍ରଭାବ ପକାଇଥାଏ।
