ଆନନ୍ଦପୁର,୮।୫(ସ୍ବ.ପ୍ର.): ୫-ଟି ବ୍ୟବସ୍ଥାରେ ବିଦ୍ୟାଳୟ ପ୍ରତି ଛାତ୍ରୀଛାତ୍ରଙ୍କୁ ଆକୃଷ୍ଟ କରିବା, ଉତ୍ତମ ଶୈକ୍ଷିକ ବାତାବରଣ ସୃଷ୍ଟି ଓ ପିଲାମାନଙ୍କୁ ଉତ୍ତମ ଶିକ୍ଷା ପ୍ରଦାନ ପାଇଁ ସରକାର କୋଟିରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ କରୁଛନ୍ତି। ବିଦ୍ୟାଳୟ କର୍ତ୍ତୃପକ୍ଷଙ୍କ ଅବହେଳା ଓ ଦୁର୍ନୀତି ମନୋଭାବ ଲାଗି ବିଦ୍ୟାଳୟର ଶୈକ୍ଷିକ ପରିବେଶ ପ୍ରଭାବିତ ହେବାରେ ଲାଗିଛି। ଏଭଳି ଏକ ଘଟଣା କେନ୍ଦୁଝର ଜିଲା ଆନନ୍ଦପୁର ଉପଖଣ୍ଡ ଫକୀରପୁର ଉଚ୍ଚ ବିଦ୍ୟାଳୟରେ ଦେଖିବାକୁ ମିଳିଛି। ଆନନ୍ଦପୁର ବ୍ଲକ୍ ଶିକ୍ଷାଧିକାରୀଙ୍କ ଅଧୀନରେ ଥିବା ବିଦ୍ୟାଳୟରେ ବିନା ଏସ୍ଏମ୍ସିରେ ଶୈକ୍ଷିକ ଓ ଅଣଶୈକ୍ଷିକ ଅନୁଦାନ ଟଙ୍କା ଉଠାଯାଇଥିବା ଅଭିଯୋଗ ହୋଇଛି, ଯାହାକୁ ନେଇ ଅଭିଭାବକ ଓ ପୁରାତନ ଛାତ୍ରୀଛାତ୍ରଙ୍କ ମହଲରେ ଅସନ୍ତୋଷ ପ୍ରକାଶ ପାଇଛି।
ସୂଚନା ଅନୁଯାୟୀ, ଫକୀରପୁର ଉଚ୍ଚ ବିଦ୍ୟାଳୟରେ ୪ ଜାନୁୟାରୀ ୨୦୨୦ରେ ଏସ୍ଏମ୍ସି(ସ୍କୁଲ ପରିଚାଳନା କମିଟି) ଗଠିତ ହୋଇଥିଲା। ଗାଇଡ୍ଲାଇନ୍ ଅନୁଯାୟୀ ଏସ୍ଏମ୍ସିର ଅବଧି ୩ ବର୍ଷ ରହିଥାଏ। ବିଦ୍ୟାଳୟକୁ ଆସୁଥିବା ଶୈକ୍ଷିକ ଓ ଅଣଶୈକ୍ଷିକ ଅନୁଦାନ ଉକ୍ତ କମିଟିର ଅନୁମୋଦନ ତଥା ଏସ୍ଏମ୍ସି ଅଧ୍ୟକ୍ଷ ଓ ପ୍ରଧାନ ଶିକ୍ଷକଙ୍କ ଦସ୍ତଖତରେ ଉଠାଯିବାର ନିୟମ ରହିଛି। ଏସ୍ଏମ୍ସି ନ ଥିଲେ କେବଳ ୟୁନିଫର୍ମ ବାବଦକୁ ଆସୁଥିବା ଅନୁଦାନ ସିଆରସିସି(କ୍ଲଷ୍ଟର ରିସର୍ଚ୍ଚ ସେଣ୍ଟର କୋ-ଅର୍ଡିନେଟର) ଓ ପ୍ରଧାନ ଶିକ୍ଷକଙ୍କ ମାଧ୍ୟମରେ ଉଠାଯାଇପାରିବ। ପିଟିଏ(ଅଭିଭାବକ ଶିକ୍ଷକ ସଂଘ) ମାଧ୍ୟମରେ ମଧ୍ୟ କୌଣସି ଅନୁଦାନ ଉଠାଯିବାର ଗାଇଡ୍ଲାଇନ୍ ନାହିଁ। ଏସ୍ଏମ୍ସି ଅବଧି ଶେଷ ହୋଇଥିଲେ ଅନ୍ୟ କୌଣସି ଅନୁଦାନ ଉଠାଯାଇପାରିବନି ବୋଲି ଉଲ୍ଲେଖ ରହିଛି। ସମ୍ପୃକ୍ତ ବିଦ୍ୟାଳୟରେ ଏସ୍ଏମ୍ସିର ଅବଧି ଗତବର୍ଷ ଶେଷ ହୋଇଛି। ନୂତନ କମିଟି ଗଠନ ନ ହୋଇ ସ୍ପୋଟର୍ସ ଗ୍ରାଣ୍ଡ ୨୫ ହଜାର, କମ୍ପୋଜିଟ୍ ଗ୍ରାଣ୍ଡ ୫୦ ହଜାର, ୟୁଥ୍ ଏବଂ ଇକୋ କ୍ଲବ୍ ଗ୍ରାଣ୍ଡ ୫ ହଜାର, ସ୍କୁଲ୍ ସେଫ୍ଟି ଗ୍ରାଣ୍ଡ ୨ ହଜାର, ସ୍କିଲ୍ ଡେଭେଲପ୍ମେଣ୍ଟ ଗ୍ରାଣ୍ଡ ୧୩ ଶହ ମୋଟ ୮୩ ହଜାର ୩୦୦ ଟଙ୍କା ଉଠାଣ କରାଯାଇଛି। ୨୦୨୨ରୁ କମିଟିର ଅବଧି ଶେଷ ହୋଇଥିବା ବେଳେ କାହା ଅନୁମୋଦନରେ ଟଙ୍କା ଉଠିଲା ତାହାର ତଦନ୍ତ କରିବାକୁ ପୁରାତନ ଛାତ୍ରୀଛାତ୍ର ଦାବି କରିଛନ୍ତି। ବିଦ୍ୟାଳୟ ଭାରପ୍ରାପ୍ତ ପ୍ରଧାନ ଶିକ୍ଷକ ସଞ୍ଜୟ ବେହେରା କହିଛନ୍ତି, ଅନୁଦାନର ଆବଶ୍ୟକତା ଜରୁରୀ ଥିବାରୁ ପିଟିଏ ମାଧ୍ୟମରେ ଉଠାଯାଇଥିବା ସ୍ବୀକାର କରିଛନ୍ତି। ଆନନ୍ଦପୁର ବ୍ଲକ୍ ଶିକ୍ଷାଧିକାରୀ ତପୋଧନ ସ୍ବାଇଁଙ୍କୁ ପଚରାଯିବାରୁ ବିନା ଏସ୍ଏମ୍ସିରେ ଅନୁଦାନ ଉଠାଯାଇପାରିବ ନାହିଁ। ଯଦି ଉଠିଥିବ, ତେବେ ତଦନ୍ତ କରାଯାଇ ଅନୁଦାନ ରିକଭରି କରାଯିବ ବୋଲି କହିଛନ୍ତି।
