ଓ୍ବାଶିଂଟନ,୧୨।୬: ଆମେରିକା ଏବଂ ଇରାନ ମଧ୍ୟରେ ଚାଲିଥିବା ବିବାଦ ମଧ୍ୟରେ, ଡୋନାଲ୍ଡ ଟ୍ରମ୍ପ ଏକ ଶାନ୍ତି ଚୁକ୍ତିନାମା ସମ୍ପର୍କରେ ଏକ ଗୁରୁତ୍ୱପୂର୍ଣ୍ଣ ବିବୃତ୍ତି ଦେଇଛନ୍ତି। ଗୁରୁବାର ଦିନ, ଆମେରିକା ରାଷ୍ଟ୍ରପତି ଦାବି କରିଛନ୍ତି ଯେ ଚୁକ୍ତିନାମାର ସର୍ତ୍ତାବଳୀକୁ ଅନୁମୋଦନ କରାଯାଇଛି ଏବଂ ଏହି ସପ୍ତାହରେ ତେହେରାନ ସହିତ ଏକ ଚୁକ୍ତି ହୋଇପାରେ । ସେ କହିଛନ୍ତି ଯେ ସ୍ଥାନ ଏବଂ ସମୟ ଖୁବ୍ ଶୀଘ୍ର ଘୋଷଣା କରାଯିବ । ଚୁକ୍ତିନାମା ଚୂଡ଼ାନ୍ତ ହେବା ପରେ, ହର୍ମୁଜ୍ ପ୍ରଣାଳୀ ମଧ୍ୟ ଖୋଲିଯିବ, ଯଦିଓ ସେ ପର୍ଯ୍ୟନ୍ତ ଅବରୋଧ ବଳବତ୍ତର ରହିବ। ଇରାନ ମଧ୍ୟ ଟ୍ରମ୍ପଙ୍କ ଦାବିର ଜବାବ ଦେଇଛି ।
ଟ୍ରମ୍ପ୍ କହିଛନ୍ତି, “ଆମେ ଇରାନ ସହିତ ଯୁଦ୍ଧ ସମ୍ପର୍କରେ ଏକ ଚମତ୍କାର ଚୁକ୍ତିରେ ପହଞ୍ଚିଛୁ।” ସେ ଆହୁରି ମଧ୍ୟ କହିଛନ୍ତି, ” ଚୁକ୍ତି ସ୍ୱାକ୍ଷରିତ ହେବା ମାତ୍ରେ ହର୍ମୁଜ୍ ପ୍ରଣାଳୀ ଆନୁଷ୍ଠାନିକ ଭାବରେ ଖୋଲିଯିବ । ଯାହା ବହୁତ ଶୀଘ୍ର ହୋଇପାରେ, ହୁଏତ ଏହି ସପ୍ତାହର ଶେଷ ସୁଦ୍ଧା ୟୁରୋପରେ ହୋଇପାରେ।” ଟ୍ରମ୍ପ୍ ଉଲ୍ଲେଖ କରିଛନ୍ତି ଯେ, ଇସ୍ରାଏଲୀ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ବ୍ୟତୀତ, ସେ ୟୁଏଇ, କତାର, ସାଉଦି ଆରବ, ବାହାରିନ୍, କୁଏତ୍ ଏବଂ ଅନ୍ୟାନ୍ୟ ରାଷ୍ଟ୍ରର ନେତାମାନଙ୍କ ସହିତ କଥା ହୋଇଛନ୍ତି। ସେ କହିଛନ୍ତି ଯେ ସେ ଶୀଘ୍ର ତୁର୍କୀ ରାଷ୍ଟ୍ରପତି ଏର୍ଡୋଗାନଙ୍କ ସହ କଥା ହେବେ ।
ଟ୍ରମ୍ପ କହିଛନ୍ତି ଯେ ଏହି ଚୁକ୍ତି ସହିତ, ଇରାନ ପାଖରେ ପରମାଣୁ ଅସ୍ତ୍ର ରଖିବାର ସମସ୍ୟା ମଧ୍ୟ ସମାଧାନ ହୋଇଛି । ସେ କହିଛନ୍ତି, “ସର୍ବାଧିକ ଗୁରୁତ୍ୱପୂର୍ଣ୍ଣ କଥା ହେଉଛି ଆମର ଏକ ଚୁକ୍ତି ଅଛି ଯାହା ଅନୁଯାୟୀ ଇରାନ କେବେ ପରମାଣୁ ଅସ୍ତ୍ର ନିର୍ମାଣ କରିପାରିବ ନାହିଁ ଏବଂ ଏହି ଚୁକ୍ତିକୁ ସୁରକ୍ଷିତ ରଖିବାରେ ଆମର ସମ୍ପୂର୍ଣ୍ଣ ଉଦ୍ଦେଶ୍ୟ ଥିଲା। ତେଣୁ, ଏହା ଏକ ପ୍ରମୁଖ ସଫଳତା।”
ଅନ୍ୟପକ୍ଷରେ ଟ୍ରମ୍ପଙ୍କ ଶାନ୍ତି ଚୁକ୍ତି ଚୂଡ଼ାନ୍ତ ହେବା ନେଇ ଇରାନର ବିବୃତ୍ତି ମଧ୍ୟ ସାମ୍ନାକୁ ଆସିଛି। ବୈଦେଶିକ ମନ୍ତ୍ରୀଙ୍କ ମୁଖପାତ୍ର କହିଛନ୍ତି ଯେ ଚୁକ୍ତି ଉପରେ ଇରାନ ଏପର୍ଯ୍ୟନ୍ତ କୌଣସି ଚୂଡ଼ାନ୍ତ ନିଷ୍ପତ୍ତି ନେଇ ନାହିଁ। ଇରାନର ନ୍ୟୁଜ୍ ଏଜେନ୍ସି ଅନୁଯାୟୀ ସେ କହିଛନ୍ତି ଯେ ଚୁକ୍ତିନାମା ଉପରେ ଇରାନ ଚୂଡ଼ାନ୍ତ ନିଷ୍ପତ୍ତି ନେଇ ନାହିଁ । ସେ ଆହୁରି ମଧ୍ୟ କହିଛନ୍ତି ଯେ ‘ଡ୍ରାଫ୍ଟ ଚୁକ୍ତିନାମା ଉପରେ ସମ୍ପୃକ୍ତ ଅଧିକାରୀମାନେ ସହମତ ହେବା ପରେ ଇରାନ ସରକାର ଏକ ଆନୁଷ୍ଠାନିକ ଘୋଷଣା କରିବେ ।’