ମୁରାଦାବାଦ,୧୯।୭: ମଣିଷଙ୍କ ମଧ୍ୟରେ ଜଣେ ଅନ୍ୟଙ୍କୁ ରକ୍ତଦାନ କରିବା ଏକ ସାଧାରଣ ଘଟଣା। ତେବେ ଗୋଟିଏ କୁକୁର ନିଜ ସାଥୀ କୁକୁରର ଜୀବନ ବଞ୍ଚାଇବା ପାଇଁ ରକ୍ତଦାନ କରିଥିବା ଶୁଣିଲେ ଯେକେହି ଆଶ୍ଚର୍ଯ୍ୟ ହେବେ। ଏଭଳି ଘଟଣା ଉତ୍ତରପ୍ରଦେଶର ମୁରାଦାବାବରେ ଘଟିଛି। ବୁଧବଜାର ଅଞ୍ଚଳରେ ବାସ କରୁଥିବା ହନି ସେହଗଲଙ୍କ ଘରେ ଲାବ୍ରାଡର ପ୍ରଜାତିର ଦେଢ଼ ମାସର କୁକୁର ଛୁଆ ସିମ୍ବାର ଦେହ ଅଚାନକ ଖରାପ ହୋଇଯାଇଥିଲା। ହନିଙ୍କ ପଡ଼ୋଶୀ ସଞ୍ଜୟ ମଦାନଙ୍କ ଘରେ ଥିବା ଗୋଲଡେନ୍ ରିଟ୍ରିଭର ପ୍ରଜାତିର କୁକୁର ଜ୍ୟାକ୍ ହସ୍ପିଟାଲରେ ପହଞ୍ଚି ରକ୍ତଦାନ କରି ସିମ୍ବାର ଜୀବନ ବଞ୍ଚାଇଛି। ଏବେ ଏହି ଘଟଣା ସୋସିଆଲ୍ ମିଡ଼ିଆରେ ଭାଇରାଲ ହେବାରେ ଲାଗିଛି। ସିମ୍ବା ଏବଂ ଜ୍ୟାକ୍ ସବୁଦିନ ସକାଳେ ମାଲିକଙ୍କ ସହିତ ବାହାରକୁ ବୁଲିଗଲାବେଳେ ପରସ୍ପରକୁ ଭେଟିଥାନ୍ତି। ଖୁସିରେ ଖେଳକୁଦ କରିଥାନ୍ତି। ତେବେ ଗତ କିଛି ଦିନ ଧରି ସିମ୍ବା ଆଉ ବାହାରକୁ ଆସୁ ନ ଥିଲା। ଏନେଇ ହନି ସଞ୍ଜୟଙ୍କୁ ପଚାରିଥିଲେ। ସିମ୍ବାର ଦେହ ଖରାପ ରହିଛି ଏବଂ ରକ୍ତ ନ ମିଳିଲେ ଅବସ୍ଥା ଗୁରୁତର ହେବ ବୋଲି ସଞ୍ଜୟ କହିଥିଲେ। ଏହାପରେ ହନି ତାଙ୍କ କୁକୁର ଜ୍ୟାକ୍କୁ ଧରି ରକ୍ତଦାନ ପାଇଁ ହସ୍ପିଟାଲରେ ପହଞ୍ଚିଥିଲେ। ଡାକ୍ତର ବି.ବି.ସିଂ ଉଭୟଙ୍କର ସିବିସି ଅର୍ଥାତ୍ କମ୍ପ୍ଲିଟ୍ ବ୍ଲଡ୍ କାଉଣ୍ଟ୍ ଯାଞ୍ଚ କରିବା ପରେ ରକ୍ତଦାନ ପାଇଁ ଅନୁମତି ପ୍ରଦାନ କରିଥିଲେ। ଗୋଟିଏ କୁକୁରର ସିବିସି ଅନ୍ୟ କୁକୁର ସହିତ ମେଳ ଖାଇବା ବିରଳ ଘଟଣା ବୋଲି ସେ କହିଛନ୍ତି। ରକ୍ତଦାନ କରି ସିମ୍ବାର ଜୀବନ ବଞ୍ଚାଇଥିବାରୁ ଡାକ୍ତର ଜ୍ୟାକ୍ ସହିତ ହ୍ୟାଣ୍ଡ୍ସେକ୍ କରି ସାବାସୀ ଦେଇଥିଲେ।
