ବେଙ୍ଗାଲୁରୁ, ୫ା୯: କର୍ନାଟକର ମାଙ୍ଗାଲୁରୁରେ ରବିବାର ପୋଲିସ କୁକୁର ଗୀତାର ଶେଷକୃତ୍ୟ ସମ୍ପନ୍ନ କରାଯାଇଛି। ୧୧ ବର୍ଷ ବୟସରେ ଶନିବାର ଲାବ୍ରେଡର ପ୍ରଜାତିର ଏହି କୁକୁର ଆଖି ବୁଜିଥିଲା। ୨୦୧୧ ମେ ୨୧ରେ ଜନ୍ମିତ ଗୀତା ପୋଲିସ ବାହିନୀରେ ସେହିବର୍ଷ ଅଗଷ୍ଟ ୧୯ରେ ସାମିଲ ହୋଇଥିଲା। ଭିଭିଆଇପିଙ୍କ ଗସ୍ତବେଳେ ସୁରକ୍ଷା ଓ ବିସ୍ଫୋରକ ଠାବ କାର୍ଯ୍ୟରେ ଏହାକୁ ନିୟୋଜିତ କରାଯାଉଥିଲା। ମାଙ୍ଗାଲୁରୁର ଡିଏଆର୍ ଗ୍ରାଉଣ୍ଡ୍ରେ ରବିବାର ପୂର୍ବାହ୍ନ ୮ଟାରେ ଗୀତାକୁ ରାଷ୍ଟ୍ରୀୟ ସମ୍ମାନ ସହ ସମାଧି ଦିଆଯାଇଥିବା ପୋଲିସ କମିଶନର ଏମ୍. ଶଶିକୁମାର କହିଛନ୍ତି।