ସୁନ୍ଦରଗଡ଼,୧୩।୫(ଡି.ଏନ୍.ଏ.): ସୁନ୍ଦରଗଡ଼ ସରକାରୀ ମେଡ଼ିକାଲ ପରିସରରେ ଥିବା ଅତ୍ୟାଧୁନିକ ଭୌତିକ ଚିକିତ୍ସା କେନ୍ଦ୍ରର ଡାକ୍ତର ଓ କର୍ମଚାରୀଙ୍କୁ ୨ ମାସ ହେଲା ଦରମା ମିଳୁନି। ଏ ନେଇ ବାରମ୍ବାର ଦାବି ପରେ ଦରମା ମିଳୁ ନ ଥିବାରୁ ଶୁକ୍ରବାରଠାରୁ ଏଠାରେ କାର୍ଯ୍ୟରତ ଡାକ୍ତର ଓ କର୍ମଚାରୀ କଳା ବ୍ୟାଚ ପରିଧାନ କରି କାର୍ଯ୍ୟ କରୁଛନ୍ତି। ଏଥିସହ ସେମାନେ ପୁଣି ଜିଲା ପ୍ରଶାସନର ଦ୍ବାରସ୍ଥ ହୋଇଛନ୍ତି। ସାମାଜିକ କର୍ମୀ ଡାକ୍ତର ହିମାନଂଶୁ ଷଡ଼ଙ୍ଗୀଙ୍କ ନେତୃତ୍ୱରେ ଏହି ଡାକ୍ତର ଓ କର୍ମଚାରୀମାନେ ଜିଲା ସାମାଜିକ ସୁରକ୍ଷା ଅଧିକାରୀ ଅଶୋକ ହାଓ୍ବାଡା ସିଂଙ୍କୁ ଭେଟି ଦରମା ନ ପାଇ କିଭଳି ହଇରାଣ ହେଉଛନ୍ତି ସେ ସମ୍ପର୍କରେ ଆଲୋଚନା କରିଥିଲେ। ଏଥିସହ ତୁରନ୍ତ ଦରମା ପ୍ରଦାନ ଦିଗରେ ପ୍ରଶାସନ ତରଫରୁ ପଦକ୍ଷେପ ଗ୍ରହଣ କରିବାକୁ ଦାବି କରିଛନ୍ତି। ଡାକ୍ତର ଓ କର୍ମଚାରୀ ଅଭିଯୋଗ କରିଛନ୍ତି ଯେ, ଜିଲା ଖଣିଜ ପ୍ରତଷ୍ଠାନ ପାଣ୍ଠି ସହାୟତାରେ ପରିଚାଳିତ ଏହି ଅତ୍ୟାଧୁନିକ ଭୌତିକ ଚିକିତ୍ସା କେନ୍ଦ୍ରର ପରିଚାଳନା ଦାୟିତ୍ୱ ଦିଲ୍ଲୀର ଏକ ଆଉଟ ସୋର୍ସିଙ୍ଗ ସଂସ୍ଥାକୁ ଦିଆଯାଇଛି। ହେଲେ ଏଠାରେ କାର୍ଯ୍ୟରତ ୨୧ ଡାକ୍ତର ଓ କର୍ମଚାରୀଙ୍କୁ ନିୟମିତଭାବେ ଦରମା ମିଳୁ ନାହିଁ। ଗତ ୨ମାସ ହେବ ଦରମା ମିଳି ନଥିବାରୁ ବାହାରୁ ଆସି ଏଠାରେ କାର୍ଯ୍ୟ କରୁଥିବା ଡାକ୍ତର ଓ କର୍ମଚାରୀ ଘରଭଡ଼ା ଦେଇ ପାରୁନଥିବା ସହ ଚଳିବାରେ ଅସୁବିଧାର ସମ୍ମୁଖୀନ ହେଉଛନ୍ତି। ନିୟମିତ ଦରମା ମିଳୁ ନଥିବା ନେଇ ପୂର୍ବରୁ ଜିଲାପାଳଙ୍କ ନିକଟରେ ଅଭିଯୋଗ କରିଥିଲେ। ଦିନେ ଦୁଇଦିନ ମଧ୍ୟରେ ଦରମା ମିଳିବା ନେଇ ସେ ପ୍ରତିଶ୍ରୁତି ଦେଇଥିଲେ। ହେଲେ ଏଥି ମଧ୍ୟରେ ୧୫ଦିନ ବିତିଯାଇଥିଲେ ମଧ୍ୟ ସେହି ସଂସ୍ଥା ଦରମା ପ୍ରଦାନ କରି ନାହିଁ। ଅନ୍ୟ ପକ୍ଷରେ ରୋଗୀଙ୍କ ଅସୁବିଧାକୁ ଆଖି ଆଗରେ ରଖି ଡାକ୍ତର ଓ କର୍ମଚାରୀ କଳାବ୍ୟାଚ ପରିଧାନ କରି କାର୍ଯ୍ୟ କରୁଛନ୍ତି।
