ଗୁଣପୁର,୧।୬(ସଂକେତ ପାତ୍ର): ରାୟଗଡ଼ା ଜିଲାର ଗୁଣପୁର ସହର ପୁରୁଣା ବସ୍ଷ୍ଟାଣ୍ଡ ଅଞ୍ଚଳସ୍ଥ ବେବର୍ତ୍ତା ସାହିର ବାସିନ୍ଦା ତଥା ସମାଜସେବୀ ଚିନାରି ସୁଧାରାଣୀ (୪୩ଙ୍କୁ ତାଙ୍କର ଉଲ୍ଲେଖନୀୟ ସାମାଜିକ ଓ ଧାର୍ମିକ ସେବା ପାଇଁ ଆମେରିକାସ୍ଥିତ ୟୁନାଇଟେଡ ଟେକ୍ନୋଲୋଜି ରିସର୍ଚ୍ଚ ୟୁନିଭରସିଟି ପକ୍ଷରୁ ସମ୍ମାନସୂଚକ ଡକ୍ଟରେଟ୍ (Honorary Doctorate) ପ୍ରଦାନ କରାଯାଇଛି । ୨୮ ମେ ୨୦୨୬ ତାରିଖରେ ସିକନ୍ଦରାବାଦରେ ଆୟୋଜିତ ବିଶ୍ୱବିଦ୍ୟାଳୟର 38th Graduation and Convocation Ceremony ଅବସରରେ ତାଙ୍କୁ ଏହି ସମ୍ମାନ ପ୍ରଦାନ କରାଯାଇଥିଲା।
ସମାରୋହରେ ବିଧାୟକ ଏନ. ନବୀନ ଯାଦବ ଓ ଅନ୍ୟାନ୍ୟ ବିଶିଷ୍ଟ ଅତିଥିମାନେ ଉପସ୍ଥିତ ରହି ସୁଧାରାଣୀଙ୍କୁ ସମ୍ମାନିତ କରିଥିଲେ। ଗୁଣପୁର କଲେଜରୁ +୨ ବିଜ୍ଞାନରେ ଶିକ୍ଷା ଗ୍ରହଣ କରିଥିବା ସୁଧାରାଣୀ ଜଣେ ଗୃହିଣୀ ହୋଇଥିଲେ ମଧ୍ୟ ଦୀର୍ଘଦିନ ଧରି ସମାଜସେବା, ଧାର୍ମିକ ଓ ସାଂସ୍କୃତିକ କ୍ଷେତ୍ରରେ ନିଜକୁ ନିୟୋଜିତ କରିଆସୁଛନ୍ତି। ତାଙ୍କର ନିଷ୍ଠାପର ସେବାକୁ ସ୍ୱୀକୃତି ଦେଇ ସାମାଜିକ ସେବା ବିଭାଗରେ ଏହି ଡକ୍ଟରେଟ୍ ପ୍ରଦାନ କରାଯାଇଛି । ସୁଧାରାଣୀଙ୍କର ପ୍ରମୁଖ ସଫଳତା ମଧ୍ୟରେ ୧୦୦୦ ମହିଳାଙ୍କୁ ନେଇ ସହସ୍ର କୋଲାଟା ଆୟୋଜନ, କୋଟି ଦୀପୋତ୍ସବ ପରି ବୃହତ୍ ଧାର୍ମିକ କାର୍ଯ୍ୟକ୍ରମର ସଫଳ ସଂଗଠନ ଉଲ୍ଲେଖନୀୟ। ସେହିପରି କନ୍ୟାକା ପରମେଶ୍ୱରୀ ମନ୍ଦିରରେ ୧୫୦ ଜଣ ମହିଳାଙ୍କ ସହଯୋଗରେ ବିଭିନ୍ନ ନିଶୁଳ୍କ ଚିକିତ୍ସା ଶିବିର ଆୟୋଜନ କରି ସାଧାରଣ ଲୋକଙ୍କ ସେବାରେ ଅବଦାନ ରଖିଆସୁଛନ୍ତି ।ଏହାପୂର୍ବରୁ ସେ Wonder Book of World Records ପକ୍ଷରୁ ବିଶ୍ୱ ରେକର୍ଡ ସମ୍ମାନ ମଧ୍ୟ ହାସଲ କରିଥିଲେ।
ସମ୍ମାନସୂଚକ ଡକ୍ଟରେଟ୍ ପ୍ରାପ୍ତି ପରେ ସୁଧାରାଣୀ କହିଛନ୍ତି, “ଏହି ସମ୍ମାନ ମୋର ଦାୟିତ୍ୱକୁ ଆହୁରି ବଢ଼ାଇ ଦେଇଛି। ମୁଁ ଜଣେ ବୈଶ୍ୟ ମହିଳା ଭାବେ ଗର୍ବିତ। ମୋର ସାମାଜିକ ଓ ଧାର୍ମିକ ସେବାକୁ ସ୍ୱୀକୃତି ମିଳିଥିବାରୁ ମୁଁ ଅତ୍ୟନ୍ତ ଆନନ୍ଦିତ । ଆଗାମୀ ଦିନରେ ଆହୁରି ଅଧିକ ସେବା କରିବା ପାଇଁ ଭଗବାନ ମୋତେ ଶକ୍ତି ଓ ସାମର୍ଥ୍ୟ ପ୍ରଦାନ କରନ୍ତୁ ବୋଲି ପ୍ରାର୍ଥନା କରୁଛି ।”ସୁଧାରାଣୀଙ୍କ ଏହି ସଫଳତା ପାଇଁ ଗୁଣପୁର ସମେତ ସମଗ୍ର ରାୟଗଡ଼ା ଜିଲାରେ ଆନନ୍ଦର ଲହରୀ ଖେଳିଯାଇଥିବା ବେଳେ ବିଭିନ୍ନ ସାମାଜିକ, ସାଂସ୍କୃତିକ ଓ ଧାର୍ମିକ ସଂଗଠନ ପକ୍ଷରୁ ତାଙ୍କୁ ଶୁଭେଚ୍ଛା ଓ ଅଭିନନ୍ଦନ ଜଣାଯାଇଛି ।
