ବିଷମକଟକ,୧୩।୫(ଡି.ଏନ.ଏ.): ବିଷମକଟକ ବ୍ଲକ ନିୟମଗିରି ପାହାଡ଼ ପାଦଦେଶରେ ଥିବା ବାଲାପାଇ ଗ୍ରାମର ଟିମି ପୁଷିକାଙ୍କୁ ଓପିଲିପି ପ୍ରତାରଣା କରିଥିବା ନେଇ କୌଣସି ସତ୍ୟତା ନାହିଁ ବୋଲି ଶୁକ୍ରବାର ଅତିରିକ୍ତ ଜିଲାପାଳ ଧର୍ମାନନ୍ଦ ବେହେରା ସୂଚନା ଦେଇଛନ୍ତି।
ଟିମି ଗୁରୁବାର ରାୟଗଡ଼ା ଯାଇ ଅତିରିକ୍ତ ଜିଲାପାଳ ବେହେରାଙ୍କୁ ଓଡ଼ିଶା ଆଦିବାସୀ ଜନଜାତି ସଶକ୍ତୀକରଣ ଓ ଜୀବିକା ଉନ୍ନତୀକରଣ (ଓପିଲିପି) ସଂସ୍ଥା ବିରୋଧରେ ଅଭିଯୋଗ କରିଥିଲେ। ଶୁକ୍ରବାର ବ୍ଲକରେ ଏମଜିଏନଆରଇଜିଏସର ଜନଶୁଣାଣି କାର୍ଯ୍ୟକ୍ରମରେ କିଞ୍ଜାମଯୋଡି ଗ୍ରାମ ଓପିଲିପି ସଂସ୍ଥାର ସଭାପତି ଓ ଅନ୍ୟାନ୍ୟ ସଦସ୍ୟଙ୍କ ସହିତ ଗ୍ରାମବାସୀ ଆସି ଟିମିଙ୍କ ଅଭିଯୋଗ ମିଛ ବୋଲି ଅତିରିକ୍ତ ଜିଲାପାଳଙ୍କୁ ଲିଖିତ ଭାବେ ଜଣାଇଥିଲେ। ଏହାକୁ ଭିତ୍ତିକରି ଅତିରିକ୍ତ ଜିଲାପାଳ ଓ ବିଷମ କଟକ ଗୋଷ୍ଠୀ ଉନ୍ନୟନ ଅଧିକାରୀ ସଦାଶିବ ନାୟକ, ଅଧ୍ୟକ୍ଷ ଯଶୋଦା ହୁଇକ, ଉପାଧ୍ୟକ୍ଷ ଦେବୀ ପ୍ରସାଦ ପଟ୍ଟନାୟକ ବାଲାପାଇ ଗ୍ରାମକୁ ଯାଇ ଟିମିଙ୍କୁ ଭେଟିଥିଲେ। ଟିମି କହିଥିଲେ ରାୟଗଡ଼ାର ୩ଜଣ ଗଣମାଧ୍ୟମ ପ୍ରତିନିଧି ବାଧ୍ୟ କରି ଓପିଲିପି ନାଁରେ ମିଥ୍ୟା ଅଭିଯୋଗ କରିବା ପାଇଁ କହିଥିଲେ। ଆଳୁ ବିହନ ଓ ଟଙ୍କା ପ୍ରଲୋଭନ ଦେଖାଇ ଓପିଲିପି ସଂସ୍ଥା ବିରୋଧରେ ମୋ ଦ୍ୱାରା କୁହାଇଛନ୍ତି। ସେ ଗ୍ରାମର ବାରିକଙ୍କ ଠାରୁ ବେଳେ ଧାର ନେଇଥାନ୍ତି । କିନ୍ତୁ ଓପିଲିପିର କୌଣସି କର୍ମଚାରୀଙ୍କୁ କେବେ ଲାଞ୍ଚ ଦେଇନାହାନ୍ତି କି ତାଙ୍କୁ କେହି ଲାଞ୍ଚ ମାଗିନାହାନ୍ତି ବୋଲି କହିଥିଲେ। ଟିମିଙ୍କ ଅଭିଯୋଗ ପଛରେ ଓପିଲିପି ସଂସ୍ଥାର କୌଣସି କର୍ମଚାରୀ ସମ୍ପୃକ୍ତି ନାହିଁ । କେତେଜଣ ସାମ୍ବାଦିକ ତାଙ୍କୁ ଏଭଳି ପ୍ରବର୍ତାଇଥିବା ଅତିରିକ୍ତ ଜିଲାପାଳ ଧର୍ମାନନ୍ଦ ବେହେରା ସୂଚନା ଦେଇଛନ୍ତି ।
ଓପିଲିପି ସଂସ୍ଥା ଦ୍ୱାରା ଅଞ୍ଚଳରେ ବିଭିନ୍ନ ପ୍ରକାର ଉନ୍ନୟନମୂଳକ କାର୍ଯ୍ୟକ୍ରମ ହୋଇଛିା ଯାହାଦ୍ୱାରା ଅଞ୍ଚଳବାସୀଙ୍କର ଆର୍ଥିକ ଓ ସାମାଜିକ ବିକାଶ ହୋଇଛି । ଏଣୁ ଓପିଲିପି ସଂସ୍ଥା ନାମରେ ଅଯଥା ମିଥ୍ୟା ଅଭିଯୋଗ କରିବାକୁ ଯଦି ଆଗାମୀ ଦିନରେ କୌଣସି ସାମ୍ବାଦିକ ପ୍ରବର୍ତ୍ତାଇବାକୁ ଚେଷ୍ଟା କରନ୍ତି ତା’ହେଲେ ସେମାନଙ୍କୁ ଅଞ୍ଚଳରେ ପୁରାଇଦେବୁ ନାହିଁ ବୋଲି କିଞ୍ଜାମଯୋଡିବାସୀ କହିଛନ୍ତି । ଜନଶୁଣାଣିରେ ଅଭିଯୋଗ ପତ୍ର ପ୍ରଦାନ ସମୟରେ ଡମ୍ପ ପୁଷିକା, ଜଟିଆ ପି ଓ ଶତାଧିକ ଗ୍ରାମବାସୀ ଉପସ୍ଥିତ ଥିଲେ ।
