ଅନୁଗୋଳ ଅଫିସ,୧୫।୩: ଅନୁଗୋଳ ଉପଖଣ୍ଡରେ ଡିଜେ ସାଉଣ୍ଡ ଉପରେ ସମ୍ପୂର୍ଣ୍ଣ ରୋକ୍ ଲଗାଇଛି ପ୍ରଶାସନ। ଅନୁଗୋଳ ଉପଜିଲାପାଳଙ୍କ କାର୍ଯ୍ୟାଳୟ ପକ୍ଷରୁ ଏ ନେଇ ବିଜ୍ଞପ୍ତି ନମ୍ବର ୧୮୨୮ ମାଧ୍ୟମରେ ଏହି ସୂଚନା ପ୍ରଦାନ କରାଯାଇଛି। କେଉଁ କାରଣ ପାଇଁ ଏହାକୁ ବନ୍ଦ କରାଯାଇଛି ଓ କୌଣସି ବ୍ୟକ୍ତି କିମ୍ବା ଅନୁଷ୍ଠାନ ଯଦି ଉଲ୍ଲଂଘନ କରେ କି ପ୍ରକାରର ଦଣ୍ଡ ବିଧାନ କରାଯିବ, ସେ ନେଇ ସମସ୍ତ ବିବରଣୀ ଏହି ବିଜ୍ଞପ୍ତିରେ ଉଲ୍ଲେଖ କରାଯାଇଛି।
ଗାଁ ଗହଳି ଠାରୁ ସହର ଯାଏ ସବୁଠି ବିକଟାଳ ଶବ୍ଦ କରି ଡିଜେ ବାଜୁଛି। ଏହି ଶବ୍ଦ ପ୍ରଦୂଷଣ ସୃଷ୍ଟି କରୁଥିବାରୁ ପ୍ରଶାସନିକ ସ୍ତରରେ ବନ୍ଦ ଘୋଷଣା କରାଯାଇଛି। ବାହାଘର, ବ୍ରତଘର ଏବଂ କୌଣସି ଯାନିଯାତ୍ରା ହେଲେ ୬୫ ଡେସିବେଲ ସାଉଣ୍ଡ ବାଜିବା ନିୟମ ରହିଛି। ହେଲେ କେତେକ ବ୍ୟକ୍ତି ଓ ଅନୁଷ୍ଠାନ ଅନୁମତି ପତ୍ର ଆବେଦନ କରି ଡିଜେ ବଜାଉଥିବା ଦେଖାଯାଇଛି। ଏପରିକି କେତେକ ସ୍ଥାନରେ ରାସ୍ତା ଅବରୋଧ କରି ମଧ୍ୟ ବିଳମ୍ବିତ ରାତି ପର୍ଯ୍ୟନ୍ତ ଡିଜେ ବଜାଇ ଉତ୍ସବ ପାଳନ କରାଯାଉଛି। ଅନେକ ସମୟରେ ଲୋକଙ୍କୁ ଏଥିପାଇଁ ହଇରାଣ ହେବାକୁ ପଡ଼ୁଛି। ଉପଜିଲାପାଳ ବୈତୁରା ଦୀପ ଅନେକ ସ୍ଥାନରେ ଡିଜେ ନେଇ ହେଉଥିବା ଅସୁବିଧାକୁ ହୃଦ୍ବୋଧ କରିଛନ୍ତି। ଏହି ଉଚ୍ଚ ଶବ୍ଦ ପ୍ରଦୂଷଣକାରୀ ଡିଜେ ସାଉଣ୍ଡକୁ ନେଇ ବହୁଥର ସ୍ବେଚ୍ଛାସେବୀ ସଂସ୍ଥା ଓ ଜନସାଧାରଣ ଅଭିଯୋଗ ଆଣିଛନ୍ତି। ଏ ନେଇ ବାରମ୍ବାର ସମସ୍ତ ଥାନା ଓ ସାଉଣ୍ଡ ମାଲିକଙ୍କୁ ସାବଧାନ କରାଗଲା ପରେ ମଧ୍ୟ ସ୍ଥିତିରେ କୌଣସି ସୁଧାର ଆସିନାହିଁ। ଫଳରେ କାର୍ଯ୍ୟାନୁଷ୍ଠାନ ସ୍ବରୂପ ଅନୁଗୋଳ ଉପଖଣ୍ଡ ଅଧୀନରେ ଯାଉଥିବା ଅନୁଗୋଳ, ବଅଁରପାଳ, ଛେଣ୍ଡିପଦା ବ୍ଲକରେ ଡିଜେକୁ ସମ୍ପୂର୍ଣ୍ଣ ବନ୍ଦ କରାଯିବା ନେଇ ଘୋଷଣା କରାଯାଇଛି। ଉପଜିଲାପାଳ ବୈତୁରା ଦୀପଙ୍କ ଅନୁମୋଦନ କ୍ରମେ ସମସ୍ତ ତହସିଲଦାର, ଅନୁଗୋଳ, ଅନୁଗୋଳ ସଦର, ବନ୍ତଳା, ନାଲ୍କୋ, ବଅଁରପାଳ, ଜରପଡା, ନିଶା, ବାଗେଡିଆ ଆଦି ଥାନା ଅଧିକାରୀମାନଙ୍କୁ ନୋଟିସ ପ୍ରଦାନ କରାଯାଇଛି। ଏହାର ନକଲ ମଧ୍ୟ ଜିଲାପାଳଙ୍କ ସମେତ ଜିଲା ଆରକ୍ଷୀ ଅଧୀକ୍ଷକଙ୍କ ନିକଟକୁ ପ୍ରେରଣ କରାଯାଇଛି। ଆଗାମୀ ଦିନରେ ଯଦି କୌଣସି ବ୍ୟକ୍ତି ଓ ଅନୁଷ୍ଠାନ ଏହି ନିୟମ ଉଲ୍ଲଂଘନ କରୁଥିବା ଦେଖାଯିବ, ତେବେ ଡିଜେ ଜବତ ସହ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବିଜ୍ଞପ୍ତିରେ ଚେତାଇ ଦିଆଯାଇଛି।
