ନୂଆପଡ଼ା ଅଫିସ୍,୨୧।୪: ଟିପିଡବ୍ଲୁଓଡିଏଲର ମନମୁଖୀ କାର୍ଯ୍ୟ ଓ ଶୋଷଣର ପ୍ରତିବାଦ କରି ଗୁରୁବାର ଜୟ କିଷାନ ମଜଦୁର ସଂଗ୍ରାମ ପରିଷଦ ପକ୍ଷରୁ ନୂଆପଡା ଜିଲାପାଳ କାର୍ଯ୍ୟାଳୟ ଘେରାଉ କରାଯିବା ସହ ବିକ୍ଷୋଭ ପ୍ରଦର୍ଶନ କରାଯାଇଥିଲା। ଜୟ କିଷାନ ମଜଦୁର ସଂଗ୍ରାମ ପରିଷଦ ଆବାହକ ଯଦୁମଣି ପାଣିଗ୍ରାହୀଙ୍କ ନେତୃତ୍ୱରେ ଜିଲାର ଶତାଧିକ ବିଦ୍ୟୁତ୍ ଉପଭୋକ୍ତା ଏଥିରେ ସାମିଲ ହୋଇଥିଲେ। ପରେ ବିକ୍ଷୋଭସ୍ଥଳରେ ଦିଆଯାଇଥିବା ଧାରଣାରୁ ଊଠି ଏକ ଶୋଭାଯାତ୍ରାରେ ବାହାରି ସହର ପରିକ୍ରମା କରି ଟିପିଡବ୍ଲୁଓଡିଏଲ ଜିଲା କାର୍ଯ୍ୟାଳୟ ଘେରାଉ କରିଥିଲେ। ଘେରାଉ ସମୟରେ ପୋଲିସ ଓ ଆନ୍ଦୋଳନକାରୀ ମଧ୍ୟରେ ଧସ୍ତାଧସ୍ତି ହୋଇଥିଲା। ଏହି ଅବସରରେ ରାଜ୍ୟପାଳଙ୍କ ଉଦ୍ଦେଶ୍ୟରେ ଟିପିଡବ୍ଲୁଓଡିଏଲ ନିର୍ବାହୀ ଯନ୍ତ୍ରୀ ସମ୍ବିତ ନନ୍ଦଙ୍କୁ ୧୩ ଦଫା ସମ୍ବଳିତ ଏକ ଦାବିପତ୍ର ପ୍ରଦାନ କରାଯାଇଥିଲା। ୨୦୨୧ ଜାନୁୟାରୀରେ ୱେସ୍କୋ କମ୍ପାନୀଠାରୁ ଟିପିଡବ୍ଲୁଓଡିଏଲ ବିଦ୍ୟୁତ୍ ବିଭାଗ ଦାୟିତ୍ୱ ନେବା ପରେ ଉପଭୋକ୍ତାଙ୍କ ଦୁର୍ଦ୍ଦଶା ବଢିବା ସହ ଶୋଷଣ ଅନ୍ତ ହେଉନାହିଁ। ଗଭୀର ନଳକୂପ ଚାଷୀ, ଉଠା ଜଳସେଚନ ଚାଷୀ, ବିଭିନ୍ନ ବ୍ୟବସାୟିକ ପ୍ରତିଷ୍ଠାନ, ଗରିବ ଲୋକଙ୍କ ପାଇଁ ଉର୍ଦ୍ଦିଷ୍ଟ ଯୋଜନାରେ ଅନ୍ତର୍ଭୁକ୍ତ ଉପଭୋକ୍ତାଙ୍କୁ ଶୋଷଣ କରାଯାଉଛି। ଏପରି କି ବିନା ବିଦ୍ୟୁତ ସଂଯୋଗରେ ବିଲ ଆସିବା, ପୂର୍ବ ବିଲକୁ ପଠାଇ ଅର୍ଥ ଆଦାୟ କରିବା, ବିନା ନୋଟିସରେ ବିଦ୍ୟୁତ୍ କାଟିବା ଇତ୍ୟାଦି ଅଭିଯୋଗ ଆସୁଥିଲେ ମଧ୍ୟ କୌଣସି ସମାଧାନ ହେଉନାହିଁ। ରାଜ୍ୟ ସରକାର, ଜିଲା ପ୍ରଶାସନ ଓ ବିଭାଗୀୟ ଅଧିକାରୀ ଚୁପ ହୋଇ ବସିଛନ୍ତି। ଆଗାମୀ ଏକ ସପ୍ତାହ ମଧ୍ୟରେ ସମସ୍ୟାର ସମାଧାନ ନ ହେଲେ ଟିପିଡବ୍ଲୁଓଡିଏଲର ଜିଲା ଭିତରେ ଥିବା କାର୍ଯ୍ୟାଳୟଗୁଡିକରେ ତାଲା ପକାଯିବା ସହ କର୍ମଚାରୀମାନଙ୍କୁ ଗାଁ ଭିତରକୁ ପୁରାଇ ଦିଆଯିବ ନାହିଁ ବୋଲି ସଂଗ୍ରାମ ପରିଷଦ ପକ୍ଷରୁ ଚେତାବନୀ ଦିଆଯାଇଛି। ଜୟ କିଷାନ ସଂଗ୍ରାମ ପରିଷଦ ଆବାହକ ପାଣିଗ୍ରାହୀ, ଲେଖରାମ ଚନ୍ଦ୍ରକାର, ରମାକାନ୍ତ ଚନ୍ଦ୍ରକାର, ଭୁବନ ଚନ୍ଦ୍ରକାର, ବିଜୟ ସାହୁ, ଉମେଶ ଚକ୍ରଧାରୀ, ନେମିଚନ ଚନ୍ଦ୍ରକାର, ରତନ ଲାଲ ଚନ୍ଦ୍ରକାର, ସୁରେଶ ଅହୀର, ନାରଦ ପାଣ୍ଡେ,ହିରାଲାଲ ପାଣ୍ଡେ, ମୋହନ ଶବର, ସୁଖରାମ ପାଣ୍ଡେ, ବିଶ୍ୱମ୍ବର ମାଝି, ହୋମସିଂ ସତନାମୀ, ପୁରନ ମାଝି, ଭକ୍ତବନ୍ଧୁ ଧରୁଆଙ୍କ ସମେତ ଉପଭୋକ୍ତା ମାନେ ବିକ୍ଷୋଭରେ ସାମିଲ ଥିଲେ। ବିଦ୍ୟୁତ୍ ବିଭାଗୀୟ ନିର୍ବାହୀ ଯନ୍ତ୍ରୀ ସମ୍ବିତ ନନ୍ଦ ସମସ୍ୟା ସମାଧାନ ଦିଗରେ ବିହିତ ପଦକ୍ଷେପ ନିଆଯିବ ବୋଲି ପ୍ରତିଶ୍ରୁତି ଦେବା ପରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା। ଆଗାମୀ ଏକ ସପ୍ତାହ ମଧ୍ୟରେ ଏସ୍ଇ, ଜିଲାପାଳ ଓ ଉଚ୍ଚସ୍ତରୀୟ ଅଧିକାରୀଙ୍କୁ ନେଇ ନୂଆପଡାଠାରେ ଏକ ଉଚ୍ଚସ୍ତରୀୟ ଆଲୋଚନା କରାଯିବ ବୋଲି ପ୍ରତିଶ୍ରୁତି ମିଳଥିବା ସୂଚନା ମିଳିଛି।
