ନୟାଗଡ଼ ଅଫିସ,୨୩।୧: ନୟାଗଡ଼ ଜିଲାର ରଣପୁର ନିର୍ବାଚନ ମଣ୍ଡଳୀରେ ଭାଜପା ଓ ବିଜେଡି ଦଖଲରେ ଥିବା ଜିଲାପରିଷଦ ଜୋନ୍କୁ ପୁଣି ଅକ୍ତିଆର କରିବା ଉଭୟ ଦଳ ପାଇଁ ସମ୍ମାନର ପ୍ରଶ୍ନ ହୋଇଛି । ପଞ୍ଚାୟତ ନିର୍ବାଚନ ପାଇଁ ପ୍ରଶାସନିକସ୍ତରରେ ପ୍ରସ୍ତୁତି ଚାଲିଥିବା ବେଳେ ଶାସକ ଦଳରେ ଅସନ୍ତୋଷ ବିରୋଧିକୁ ସୁହାଇବ ବୋଲି ନିର୍ବାଚନ ସମୀକ୍ଷକମାନେ କହିଛନ୍ତି। ହେଲେ ଭାଜପା ଓ କଂଗ୍ରେସ ଏହାର କେତେ ଫାଇଦା ନେଇ ପାରିବେ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଜିଲା ପରିଷଦ ଟିକେଟ୍ ବଣ୍ଟନକୁ ନେଇ ଶାସକ ଦଳରେ ଅନେକ ଆଶାୟୀ ଅସନ୍ତୁଷ୍ଟ ଅଛନ୍ତି । ନିର୍ବାଚନ ସମୟରେ ଠିକ୍ ଜବାବ ଦେବାକୁ ସେମାନେ କ୍ଷେତ୍ର ପ୍ରସ୍ତୁତ କରୁଥିବା ସୂଚନା ମିଳିଛି। ଗତକିଛି ଦିନ ତଳେ ରଣପୁର ବିଧାୟକ ସ୍ଥାନୀୟ ବ୍ଳକ କାର୍ଯ୍ୟାଳୟରେ ଶିଳାନ୍ୟାସ ନ କରି ଫେରିବା ଓ ରଣପୁର ବିକାଶ ସମାବେଶରେ ବିଧାୟକଙ୍କୁ ଅଣ୍ଡାମାଡ଼ ଘଟଣାକୁ ଏ ଯାଏ ଭୋଟମାନେ ଭୁଲି ନାହାନ୍ତି। ଯାହାର ଆଭାସ କିଛିଦିନ ହେଲା ରଣପୁର ନିର୍ବାଚନମଣ୍ଡଳୀରେ ଦେଖିବାକୁ ମିଳିଛି ା
ରଣପୁର ନିର୍ବାଚନ ମଣ୍ଡଳୀରେ ରଣପୁର ବ୍ଲକର ୨୧,୨୨,୨୩ ଓ ୨୪ ନଂ.ଜୋନ୍ ଏବଂ ଓଡ଼ଗଁା ବ୍ଲକର ୩ ଓ ୪ନଂ. ଜୋନ୍କୁ ମିଶାଇ ସମୁଦାୟ ୬ ଜୋନ୍ ରହିଛି । ୬ ଜୋନ୍ ମଧ୍ୟରୁ ୩, ୪, ୨୨ ଓ ୨୩ନଂ. ଜୋନ୍ ଭାଜପା ଦଖଲରେ ଥିଲା । ୨୦୧୭ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ଏହି ୪ ଜୋନ୍ ଭାଜପା ଦଖଲକୁ ଚାଲିଯିବା ପରେ ବିଜେଡିର ସଙ୍ଗଠନ ଦୁର୍ବଳ ହୋଇପଡିଥିଲା । ତେବେ ୨୦୧୯ ସାଧାରଣ ନିର୍ବାଚନରେ ଶାସକ ଦଳର ବିଧାୟକ ସତ୍ୟନାରାୟଣ ପ୍ରଧାନ ରଣପୁର ନିର୍ବାଚନ ମଣ୍ଡଳୀରେ ବିଜୟୀ ହୋଇଥିଲେ । ବିଜେଡି ଦଖଲରେ ଥିବା ୨୧ନଂ.ଜୋନ୍ ବ୍ରଜରାଜପୁର, ଡମସାହି, ଦର୍ପନାରାୟଣପୁର, ଗୌରାଙ୍ଗପୁର, ପିମ୍ପଲ, ରଙ୍କଦେଉଳି, ବାଉଁଶଗଡ଼, ଖତିଆ, ବଜ୍ରକୋଟ ଆଦି ପଞ୍ଚାୟତ ଓ ୨୪ନଂ.ଜୋନ୍ ବନ୍ଧମୁଣ୍ଡା, ଚମ୍ପାଗଡ଼,ଚାନ୍ଦପୁର,ଜଙ୍କିଆ, ପଟିଆ, ମୟୁରଝାଲିଆ, ରାଇପଡ଼ା, କନ୍ଧନୂଆଗଡ଼, କେରେଣ୍ଡାଟାଙ୍ଗୀ, ଝାଡ଼ପଡ଼ା ପଞ୍ଚାୟତରେ ଦଳୀୟ କନ୍ଦଳ ବଢ଼ୁଛି। ଭାଜପା ଦଖଲରେ ଥିବା ଜୋନ୍ଗୁଡ଼ିକରେ ବିଜେଡିର ଭଲ ସଙ୍ଗଠନ ନ ଥିବା ଆଲୋଚନା ହେଉଛି। ଦୁର୍ବଳ ସଙ୍ଗଠନକୁ ସଜାଡ଼ିବା ପାଇଁ ସ୍ଥାନୀୟ ବିଧାୟକ ସମୟ ଦେଉ ନ ଥିବା କେତେଜଣ କର୍ମୀ ନିଜ ନାମ ଗୋପନ ରଖି କହିଛନ୍ତି । ଅନ୍ୟପକ୍ଷେ ଭାଜପା ଦଖଲରେ ଥିବା ୪ ଜୋନ୍ରେ ପୁଣି ଭାଜପା ଦଖଲ କରିବ କହିବା କାଠିକର ପାଠ ହୋଇଛି। ୨୦୧୭ ନିର୍ବାଚନରେ ଭୋଟର ପରିବର୍ତ୍ତନ ଆଶାରେ ଭାଜପାକୁ ଭୋଟ ଦେଇଥିଲେ। ହେଲେ ବିରୋଧି ଦଳର ଭୂମିକା ଭାଜପା ଲିଭାଇ ପାରିନାହିଁ। ଏଣୁ ଭାଜପା ନିଜର ସଙ୍ଗଠନକୁ ମଜବୁତ କରି ଶାସକ ଦଳର ଅସନ୍ତୁଷ୍ଟ ଆଞ୍ଚଳିକ ନେତାଙ୍କ ସହଯୋଗରେ ଫାଇଦା ନେବା ଦରକାର। ନଚେତ୍ ଭାଜପା ପାଇଁ ଏଥର ନିର୍ବାଚନ କଷ୍ଟ ସାଧ୍ୟ ହୋଇପାରେ ବୋଲି ସମୀକ୍ଷକମାନେ କହିଛନ୍ତି । କଂଗ୍ରେସର ସଙ୍ଗଠନ ଦୁର୍ବଳ ହୋଇ ପଡିଥିଲା। ଧିରେ ଧିରେ କଂଗ୍ରେସ ରଣପୁର ନିର୍ବାଚନମଣ୍ଡଳୀ ସମେତ ଜିଲାରେ ମୁଣ୍ଡ ଟେକୁଛି । ପୁଣି ରଣପୁର ନିର୍ବାଚନ ମଣ୍ଡଳୀର ସବୁ ଜୋନ୍ରେ କଂଗ୍ରେସ ପ୍ରାର୍ଥୀ ଦେଇଛି । ଏଥର ଜିଲା ପରିଷଦ ନିର୍ବାଚନ ସବୁ ରାଜନୈତିକ ଦଳ ପାଇଁ ଶିକ୍ଷଣୀୟ ହେବ ବୋଲି ସାଧାରଣରେ ମତ ପ୍ରକାଶ ପାଇଛି ା
