ବିଷମକଟକ,୨୪ା୧୨(ଡି.ଏନ୍.ଏ.): ରାୟଗଡ଼ା ଜିଲା ବିଷମକଟକ ପଞ୍ଚାୟତ ସମିତି ବୈଠକ ଶୁକ୍ରବାର ଅନୁଷ୍ଠିତ ହୋଇଯାଇଛି। ଏଥିରେ ବ୍ଲକର ୨୧ ପଞ୍ଚାୟତର ସରପଞ୍ଚ, ସମିତି ସଭ୍ୟା, ସଭ୍ୟ ଯୋଗ ଦେଇଥିଲେ। ବୈଠକରେ ବିଷମକଟକ ବ୍ଲକ ଅଧ୍ୟକ୍ଷା ଯଶୋଦା ହୁଇକା, ବିଡିଓ ସଦାଶିବ ନାୟକ, ବ୍ଲକ ଉପାଧ୍ୟକ୍ଷ ଦେବି ପ୍ରସାଦ ପଟନାୟକ, ଆଦିବାସୀ କଲ୍ୟାଣ ମନ୍ତ୍ରୀଙ୍କ ପ୍ରତିନିଧି ଭାବେ ଜ୍ୟୋତି ପ୍ରସାଦ ସାହୁ, କୋରାପୁଟ ଏମ୍ପିଙ୍କ ପ୍ରତିନିଧି ପୁରୁଷୋତ୍ତମ ତୁଳ, ଜିଲା ପରିଷଦ ସଭ୍ୟା ସୁଜାତା କାଡ୍ରାକା ପ୍ରମୁଖ ମଞ୍ଚାସିନ ଥିଲେ। ବୈଠକରେ ଜନ ଯୋଜନା ଅଭିଯାନ, ପଞ୍ଚାୟତ ଉନ୍ନୟନ ଯୋଜନାର ପ୍ରସ୍ତୁତି ନେଇ ଆଲୋଚନା ସହ ହଇସ୍କୁଲ ରୂପାନ୍ତରୀକରଣର ଓ ବିଭିନ୍ନ ବିଭାଗୀୟ କାର୍ଯ୍ୟର ସମୀକ୍ଷା କରାଯାଇଥିଲା। ଶିଶୁ ଓ ମାତୃ ଯୋଜନା ବିଭାଗର କାର୍ଯ୍ୟଶୈଳୀ ନେଇ ମନ୍ତ୍ରୀଙ୍କ ପ୍ରତିନିଧି ଅସନ୍ତୋଷ ପ୍ରକାଶ କରିଥିଲେ। ବିଶେଷକରି ଆର୍ଡବ୍ଲ୍ୟୁଏସ୍ଏସ୍ର କାର୍ଯ୍ୟକୁ ନେଇ ପ୍ରଶ୍ନ ଉଠିଥିଲା।
ବିଷମକଟକ ସଦର ପଞ୍ଚାୟତରେ ରହିଥିବା ବିଭିନ୍ନ ପମ୍ପ ହାଉସ ଗୁଡ଼ିକ ପାଇଁ ମୋଟର ଉପଲବ୍ଧ କରିବା ପାଇଁ ଗତ ଜୁଲାଇରେ ଆର୍ଡବ୍ଲ୍ୟୁଏସ୍ଏସ୍ ଅଧୀକ୍ଷଣ ଯନ୍ତ୍ରୀ ସ୍ଥାନୀୟ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ। ହେଲେ ଏ ପର୍ଯ୍ୟନ୍ତ ଅଧିକାରୀମାନେ ମୋଟର ଉପଲବ୍ଧ କରାଇବାରେ ବିଫଳ ହୋଇଛନ୍ତି। ଅନୁରୂପ ଭାବେ ମେଗା ପାନୀୟ ଜଳ ପ୍ରକଳ୍ପ ନିମନ୍ତେ ପାଇପ୍ ବିଛାଯିବାରେ ଉପୁଜୁଥିବା ସ୍ଥାନୀୟ ସମସ୍ୟାରେ ନିର୍ବାଚିତ ପ୍ରତିନିଧିଙ୍କୁ ସହଯୋଗ କରିବା ପାଇଁ ବିଡିଓ ଅନୁରୋଧ କରିଥିଲେ। ବିଷମକଟକ ସହରବାସୀ, ସରପଞ୍ଚ ଏବଂ ଉପାଧ୍ୟକ୍ଷ ଦେବୀ ପ୍ରସାଦ ପଟ୍ଟନାୟକ ମେଗା ପାନୀୟ ଜଳ ପ୍ରକଳ୍ପର ସୁବିଧା ପାଇଁ ବାରମ୍ବାର ଅଭିଯୋଗ କରିଥିଲେ ମଧ୍ୟ ବିଷମକଟକ ସହରକୁ ପାନୀୟ ଜଳ ପ୍ରକଳ୍ପରେ ସାମିଲ କରାଯାଇନାହିଁ। ଶୁକ୍ରବାର ଏହି ପ୍ରସଙ୍ଗକୁ ସରପଞ୍ଚ ଗୁରତ୍ୱ ଦେବାପରେ କନିଷ୍ଠ ଯନ୍ତ୍ରୀ କିଛି ସମୟ ଚୁପ୍ ରହିଥିଲେ। ପରେ ଅନ୍ୟ କୌଣସି ଯୋଜନାରେ ବିଷମକଟକକୁ ସାମିଲି କରାଯିବ କହି ଚାଲିଯାଇଥିଲେ। କୋଣସି ପ୍ରକାରେ ବିଷମକଟକକୁ ଏହି ପ୍ରକଳ୍ପରେ ସଂଯୋଗ କରାଯାଇ ପାରିବ ନାହିଁ। ଏହାର ବିକଳ୍ପ ପନ୍ଥା ପରେ ଚିନ୍ତା କରଯିବ ବୋଲି କୁହାଯାଇଛି। ଅନ୍ୟପକ୍ଷରେ ଗ୍ରୀଷ୍ମ ଋତୁ ପୂର୍ବରୁ ମେଗା ପାନୀୟ ଜଳ ପ୍ରକଳ୍ପ କାମ ତ୍ୱରାନ୍ବିତ କରି ବିଷମକଟକ ବ୍ଲକର ଅଧିକାଂଶ ଲୋକଙ୍କୁ ଏହି ଯୋଜନା ର ଲାଭ ପହଞ୍ଚେଇବା ପାଇଁ ଲକ୍ଷ୍ୟ ରହିଥିବା ବିଡିଓ କହିଛନ୍ତି।
