ଉମରକୋଟ,୯।୪(ସ୍ବ.ପ୍ର.): ସରକାର ଲୋକଙ୍କ ମୌଳିକ ଅଧିକାର ପୂରଣ ପାଇଁ ଅହରହ ଚେଷ୍ଟା କରୁଛନ୍ତି। କିନ୍ତୁ ନବରଙ୍ଗପୁର ଜିଲା ଉମରକୋଟଠାରେ ପୂର୍ତ୍ତ ବିଭାଗ କାମ ଅଧାପନ୍ତରିଆ ହୋଇପଡ଼ିଛି। ଅଧିକାରୀମାନେ ଠିକାଦାରଙ୍କ ସହ ସଲାସୁତୁରା ହୋଇ ଠିକ୍ଭାବେ କାମ କରାଯାଉ ନ ଥିବା ଅଭିଯୋଗ କରିଛନ୍ତି ଅଞ୍ଚଳବାସୀ।
ସୂଚନାନୁଯାୟୀ ଧୋଡ୍ରାରୁ ଉମରକୋଟ ପର୍ଯ୍ୟନ୍ତ ୧୦ କି.ମି. ରାସ୍ତା ପାଇଁ ୪ କୋଟି ୪୭ ଲକ୍ଷ ଟଙ୍କାରେ ପୂର୍ତ୍ତ ବିଭାଗ ପକ୍ଷରୁ ଟେଣ୍ଡର ଆହ୍ବାନ କରାଯାଇଥିଲା। ମୂଳ ରେଟ୍ଠାରୁ ୩ ପ୍ରତିଶତ ଅଧିକରେ ଡାବୁଗାଁର ଜଣେ ଠିକାଦାର କାମ ପାଇଛନ୍ତି। କାମ ଗତ ଫେବୃୟାରୀରେ ଆରମ୍ଭ କରିଥିଲେ ଠିକାଦାର। ପ୍ରଥମେ ଉମରକୋଟ ସହର ପଟୁ କାମ ଆରମ୍ଭ କରାଯାଇଥିଲା। ରାସ୍ତା କାମ ପ୍ରାୟ ସିରିଲାଣି, କିନ୍ତୁ ଉମରକୋଟ ବ୍ଲକ କାର୍ଯ୍ୟାଳୟରୁ ପୁରୁଣା ବସ୍ଷ୍ଟାଣ୍ଡ ପ୍ରାୟ ୧ କି.ମି. ରାସ୍ତା କାମ କରାଯାଇ ନାହିଁ। ଖାଲଖମା ଯୋଗୁ ଧୂଳି ଅଧିକ ହେଉଛି। ବର୍ତ୍ତମାନ ଏହି ରାସ୍ତା କାମ ନ ହେବାରୁ ଲୋକେ ଅନେକ ସମସ୍ୟାର ସମ୍ମୁଖୀନ ହେଉଛନ୍ତି। ଖାଲଖମା ଓ ଅଧାପନ୍ତରିଆ ରାସ୍ତା ଯୋଗୁ ଧୂଳି ମଧ୍ୟ ପ୍ରବଳ ହେଉଛି। ଧୋଡ୍ରାରୁ ଉମରକୋଟ ଯେଉଁ କାମ ହୋଇଛି ସେହି କାମ ମଧ୍ୟ ନିମ୍ନମାନର କରାଯାଇଥିବା ଅଭିଯୋଗ ହୋଇଛି। ନୂତନ ଭାବେ ତିଆରି ରାସ୍ତାରେ ସମାନ୍ତରାଳ ନାହିଁ। ପୂର୍ବରୁ ଯେଉଁ ରୋଡ୍ ବ୍ରେକର ରହିଥିଲା ତାକୁ ମଧ୍ୟ ବାହାର ନ କରି ତା’ ଉପରେ ପିଚୁର ଆବରଣ ପକାଇ ଦିଆଯାଇଛି। ରାସ୍ତା କାମ ପାଇଁ ଆସିଥିବା ଅର୍ଥ ସରିଯାଇଥିବାରୁ ବଳକା କାମ ହେଉନାହିଁ ବୋଲି ଲୋକେ ଅଭିଯୋଗ କରିଛନ୍ତି। ଏ ସମ୍ପର୍କରେ କନିଷ୍ଠ ଯନ୍ତ୍ରୀ ମନୋଜ ସାହୁଙ୍କୁ ପଚାରିବାରୁ ରାସ୍ତା କାମ ପାଇଁ ଆସିଥିବା ଅର୍ଥ ସରିନାହିଁ। ଦିନେ ଦୁଇଦିନ ମଧ୍ୟରେ କାମ ଆରମ୍ଭ କରାଯିବ ବୋଲି ସେ କହିଛନ୍ତି।
