ଜଳେଶ୍ୱର,୧୫ା୫(ଡି.ଏନ.ଏ.): ପୂର୍ବର ସୁବର୍ଣ୍ଣରେଖା ନଦୀରେ ବନ୍ୟା ଆସି ବାଲେଶ୍ୱର ଜିଲାର ଜଳେଶ୍ୱର ସହର ଧ୍ୱସ୍ତବିଧ୍ୱସ୍ତ ହେଉଥିବାରୁ ଏହାର ପ୍ରତିକାର ଲାଗି ସରକାରଙ୍କ ପକ୍ଷରୁ ୬କୋଟି ୬୦ଲକ୍ଷ ଟଙ୍କାର ଏକ ପ୍ରକଳ୍ପ କାର୍ଯ୍ୟ ଆରମ୍ଭ ହୋଇଛି। କିନ୍ତୁ ମୂଳବନ୍ଧକୁ ଅଧିକ ସୁଦୃଢ କରିବା ଲାଗି ମାଟି ଭର୍ତ୍ତି ନ କରି ଅଧମିଟରରୁ ଅଧିକ ମାଟି ବାହାର କରି ଏହାର ଉଚ୍ଚତା କମାଇ ଦେବା ନେଇ ସ୍ଥାନୀୟ ଲୋକେ ସହଜରେ ଗ୍ରହଣ କରିପାରୁନାହାନ୍ତି। ବନ୍ଧର ଉଚ୍ଚତା କମାଇବା ସମ୍ପର୍କରେ ଭିଜିଲାନ୍ସ ତଦନ୍ତ ଦାବି ହୋଇଥିବା ବେଳେ ୨୦୦୮ରେ ସୁବର୍ଣ୍ଣରେଖାରେ ହୋଇଥିବା ପ୍ରଳୟଙ୍କରୀ ବନ୍ୟାର ଜଳପତ୍ତନକୁ ଲକ୍ଷ୍ୟ କରି ରିଂବନ୍ଧ ନିର୍ମାଣ କରିବାକୁ ଦାବି ହୋଇଛି।
ସୁବର୍ଣ୍ଣରେଖା ବନ୍ୟା ଇତିହାସରେ ୨୦୦୮ରେ ସର୍ବବୃହତ୍ ବନ୍ୟା ହୋଇଥିଲା। ଏଥିରେ ରାଜଘାଟ ରେଳପୋଲଠାରେ ଜଳପତ୍ତନ ୧୨.୬୯ ମିଟର ହେବାରୁ ଲକ୍ଷ୍ମଣନାଥ ଗାଁଠାରୁ ବାଘାବାଳି ଗାଁ ଯାଏ ନଦୀକୂଳରେ ଥିବା ଟେଷ୍ଟ ରିଲିଫ ବନ୍ଧ (ଟିଆର୍ଇ) ବୁଡିଯାଇ ସହର ମଧ୍ୟରେ ପାଣି ପଶିଥିଲା। ୧୯୬୨, ୧୯୬୮, ୧୯୭୨, ୧୯୭୩, ୧୯୮୫ ଓ ୧୯୯୦ ମସିହାରେ ଜଳେଶ୍ୱର ସହରକୁ ସୁବର୍ଣ୍ଣରେଖା ବନ୍ୟାପାଣି ପ୍ରବେଶ କରି ନାହିଁ ନ ଥିବା ଛାରଖାର କରିଥିଲ। ୨୦୦୮ ବନ୍ୟାରେ ଜଳେଶ୍ୱର ସହର ରୂପରେଖ ବଦଳି ଯାଇଥିବା ବେଳେ କୋଟି କୋଟି ଟଙ୍କାର ବ୍ୟବସାୟିକ ପେଣ୍ଠସ୍ଥଳୀକୁ ସମ୍ପୂର୍ଣ୍ଣ ନଷ୍ଟ କରିଦେଇଥିଲା। ଡାକ୍ତରଖାନା, କୋର୍ଟ, ବ୍ଲକ ପରିସରରେ ୫ ଫୁଟରୁ ଅଧିକ ପାଣି ସୁଅ ଛୁଟିଥିବା ବେଳେ ପ୍ରାୟ ୩ ମାସ ଧରି ସଡକ ପଥ ବିଚ୍ଛିନ୍ନ ହୋଇଥିଲା ା ଏପରିକି ୧ ମାସ ଧରି ରେଳଯାତ୍ରା ମଧ୍ୟ ବନ୍ଦ ହୋଇଥିଲା ା ତେଣୁ ପରିସ୍ଥିତିକୁ ଲକ୍ଷ୍ୟ କରି ନଦୀ କଡେ କଡେ ଟିଆରଇକୁ ଉଚ୍ଚ କରାଯାଇଥିଲା। ସେହି ଅନୁଯାୟୀ ଶିଖରପୁର ସେତୁଠାରୁ ଗୁରୁଦାସପୁର ସେତୁ ମଧ୍ୟରେ ବନ୍ଧର ଉଚ୍ଚତା ୧୩.୮ମିଟର ନିର୍ମାଣ ହୋଇଥିଲା। କିନ୍ତୁ ଏବେ ଜଳେଶ୍ୱର ସହରକୁ ରକ୍ଷା ଲାଗି ରିଂବନ୍ଧର ପରିକଳ୍ପନା କରାଯାଇ କାଯର୍ୟ ଆରମ୍ଭ ହୋଇଛି। କିନ୍ତୁ ଜଳସମ୍ପଦ ବିଭାଗ ପକ୍ଷରୁ ପୂର୍ବରୁ ଥିବା ବନ୍ଧ ୧୩.୮ ମିଟର ବଦଳରେ ୧୩.୨ ଉଚ୍ଚ କରିବାର ନିଷ୍ପତ୍ତି ନେଇ କାର୍ଯ୍ୟ ଆରମ୍ଭ ହୋଇଛି। ଫଳରେ ୦.୬ ମିଟର (ଅଧମିଟରରୁ ଅଧିକ) ଉଚ୍ଚତା ହ୍ରାସ କରି ନିର୍ମାଣ କାର୍ଯ୍ୟ ଚାଲୁ ରହିଛି। ଯେକୌଣସି ସମୟରେ ୨୦୦୮ ମସିହା ବନ୍ୟା ପରିସ୍ଥିତିକୁ ଏଡାଇ ଦିଆଯାଇ ନ ପାରେ। ଅନ୍ୟପକ୍ଷରେ ଶେଖବାର୍ଡ, ଶେଖବଜାର, ଗୋବରଘଟା ଟିଆର୍ଇ ମୋଟ ୭.୫ କି.ମି. ହୋଇଥିବା ବେଳେ ସେଥିରୁ ୫ କି.ମି ରିଂବନ୍ଧ କରାଯିବାର ପରିକଳ୍ପନା ହୋଇ କାର୍ଯ୍ୟ ଆରମ୍ଭ ହୋଇଛି। ଏଥିପାଇଁ ୬ କୋଟି ୬୦ଲକ୍ଷ ଟଙ୍କା ବ୍ୟୟବରାଦ ହୋଇଛି। ବନ୍ଧର ଉଚ୍ଚତା କମାଇ ସେହି ମାଟି ବନ୍ଧର ଦୁଇପଟେ ପକାଇ ପ୍ରଶସ୍ତୀକରଣ କରାଯାଇଛି। ସେହିପରି ଶିଖରପୁର, ବଜାରଶୋଳ, ନରଣପୁର ଟିଆରଇ ର ୩ କି.ମି ସ୍ଥାନର ପିଚୁ ଲାଗି ୫ କୋଟି ୧୦ଲକ୍ଷ ଟଙ୍କା ବ୍ୟୟବରଦା ହୋଇ କାର୍ଯ୍ୟ ଆରମ୍ଭ ହୋଇଛି।
ବନ୍ଧର ଉଚ୍ଚତା କମାଇବାକୁ ବିଭିନ୍ନ ସ୍ଥାନରେ ବିରୋଧ କରାଯିବା ସହ କାର୍ଯ୍ୟ ବନ୍ଦ କରାଯାଉଛି। ଲକ୍ଷ୍ମଣନାଥ ସମିତି ସଦସ୍ୟ ଜିତେନ୍ଦ୍ର ନାଥ ଦାସଙ୍କ ନେତୃତ୍ୱରେ ଏକ ଜନସ୍ବାର୍ଥ ସମ୍ବଳିତ ଦାବିପତ୍ର ଜିଲାପାଳ, ସେଚ ବିଭାଗର ଉଚ୍ଚ କର୍ମକର୍ତ୍ତାଙ୍କୁ ପ୍ରଦାନ କରାଯାଇଛି। ଆସନ୍ତା ଦିନରେ ଏଥିଲାଗି ଏକ ଜନସ୍ବାର୍ଥ ମାମଲା ହେବାକୁ ଯାଉଥିବା ସୂଚନା ମିଳିଛି।ବନ୍ଧର ଉଚ୍ଚତା କମାଇବା ଓ ପ୍ରଶସ୍ତୀକରଣରେ ବ୍ୟାପକ ଅର୍ଥ ହରିଲୁଟ ହେଉଥିବା ଦର୍ଶାଇ ଭିଜିଲାନ୍ସ ତଦନ୍ତ ଦାବି କରାଯାଇଛି। ଏ ସମ୍ପର୍କରେ ବିଭାଗୀୟ ସହକାରୀ ନିର୍ବାହୀଯନ୍ତ୍ରୀ ପ୍ରିୟବ୍ରତ ସିଂଙ୍କୁ ପଚାରିବାରୁ ସେ କହିଛନ୍ତି, ବନ୍ଧର ଉଚ୍ଚତା କମାଇ ଦିଆଯାଇଥିଲେ ମଧ୍ୟ ସେଥିରେ କିଛି ଫରକ ପଡିବ ନାହିଁ। ୫ କି.ମି. ରାସ୍ତାର ନବୀକରଣ ଓ ପିଚୁ କରାଗଲେ ବନ୍ୟା ନିୟନ୍ତ୍ରଣ ହୋଇପାରିବ।
