ମାଛ ଧରିବାକୁ ନେଇ ବିବାଦ
9:52 pmJanuary 27, 2023January 27, 2023 / 09

ପଦ୍ମପୁର, ୨୭।୧ (ଡି.ଏନ୍‌.ଏ.): ଭଦ୍ରକ ଜିଲା ବାସୁଦେବପୁର ଥାନା ଅଧୀନ ପଦ୍ମପୁର ପଞ୍ଚାୟତ କପାଗଢ଼ିଆ ଓ ସୁଗୋ ପଞ୍ଚାୟତ କାଞ୍ଜିଖିଆ ଗ୍ରାମବାସୀ ଏକ ପୋଖରୀରୁ ମାଛ ଧରିବାକୁ ନେଇ ମୁହଁାମୁହିଁ ହୋଇଥିଲେ। ଏହି ଘଟଣାରେ ଗୁରୁବାର ଅପରାହ୍ନରେ ଏସ୍‌ଡିପିଓ ସୌରଭ କୁମାର ଓତା, ବାସୁଦେବପୁର ଥାନାଧିକାରୀ ସାବିତ୍ରୀ ପଣ୍ଡା, ତହସିଲଦାର ସୌଭାଗ୍ୟ ରଞ୍ଜନ ପଣ୍ଡା, ଚୁଡ଼ାମଣି ଥାନାଧିକାରୀ ଶ୍ରୀବଲ୍ଲଭ ସାହୁ ଏବଂ ବିଡିଓ ସତ୍ୟଜିତ ରାଉତଙ୍କ ଉପସ୍ଥିତିରେ ଆପୋଷ ଆଲୋଚନା କରାଯାଇ କପାଗଢ଼ିଆ ଗ୍ରାମବାସୀ ମାଛ ଧରିବା ପାଇଁ ନିଷ୍ପତ୍ତି ହୋଇଛି।
ସୂଚନା ଅନୁଯାୟୀ, ପଦ୍ମପୁର ଓ ସୁଗୋ ପଞ୍ଚାୟତ ସୀମାରେ ଗ୍ରାମ୍ୟ ଜଙ୍ଗଲ କିସମର ଏକ ଜମିରୁ କିଛିବର୍ଷ ତଳେ ଜଣେ ଠିକାଦାର ରାସ୍ତା କାମ ପାଇଁ ମାଟି ଖୋଳି ନେଇଥିଲେ। ଫଳରେ ତାହା ଏକ ପୋଖରୀରେ ପରିଣତ ହୋଇଥିଲା। ୨ ବର୍ଷ ତଳେ ସେହି ପୋଖରୀରୁ ମାଛ ଧରିବାକୁ ନେଇ ଉଭୟ ଗ୍ରାମବାସୀଙ୍କ ମଧ୍ୟରେ ବିବାଦ ସୃଷ୍ଟି ହୋଇଥିଲା। ପରେ କେହି ଦୁର୍ବୃତ୍ତ ପୋଖରୀରେ ବିଷ ପକାଇ ଦେବାରୁ ସବୁ ମାଛ ମରିଯାଇଥିଲେ। ଚଳିତବର୍ଷ ମଧ୍ୟ ବିବାଦର ସୂତ୍ରପାତ ହୋଇଛି। ୩ଦିନ ତଳେ ପୋଖରୀରୁ ମାଛ ଧରିବା ପାଇଁ କପାଗଢ଼ିଆ ଗ୍ରାମବାସୀ ମେଶିନ ଲଗାଇ ପାଣି ଶୁଖାଇବା ପାଇଁ ଚେଷ୍ଟା କରୁଥିବା ବେଳେ କାଞ୍ଜିଖିଆର କେତେଜଣ ବ୍ୟକ୍ତି ଏହାକୁ ବିରୋଧ କରି ଥାନାର ଦ୍ୱାରସ୍ଥ ହୋଇଥିଲେ। ମଙ୍ଗଳବାର ବ୍ଲକ ପରିସରରେ ପୋଲିସ ଉପସ୍ଥିତିରେ ଉଭୟପକ୍ଷ ମଧ୍ୟରେ ଆଲୋଚନା ବେଳେ କଥା କଟାକଟି ହୋଇଥିଲା। ସନ୍ଧ୍ୟାରେ ପୋଖରୀରୁ ମାଛ ଧରିବା ପାଇଁ କପାଗଢ଼ିଆ ଗ୍ରାମବାସୀ ଏକଜୁଟ ହୋଇଥିବା ବେଳେ ଉତ୍ତେଜନା ପ୍ରକାଶ ପାଇଥିଲା। ଖବରପାଇ ବାସୁଦେବପୁର ଏସ୍‌ଆଇ ବିଜୟ କୁମାର ଦାସ ମହାପାତ୍ର, ଏସ୍‌ଆଇ ଦୀପ୍ତିମୟୀ ବଡ଼ଜେନା, ସୁଶାନ୍ତ ମହାପାତ୍ର, ସାବରଙ୍ଗ ଥାନାଧିକାରୀ ଶୋଭେନ କୁମାର ସ୍ବାଇଁ, ଏଏସ୍‌ଆଇ ରବୀନ୍ଦ୍ର କୁମାର ଖୁଣ୍ଟିଆ, ନାୟକାଣିଡିହୀ ଥାନାଧିକାରୀ ସୁଶାନ୍ତ କୁମାର ମିଶ୍ର, ଏଏସ୍‌ଆଇ ଦେବେନ୍ଦ୍ର ମୁର୍ମୁ, ତହସିଲଦାର ପଣ୍ଡା ପ୍ରମୁଖ ପହଞ୍ଚତ୍ ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିଥିଲେ। ଆପୋଷ ଆଲୋଚନା ମାଧ୍ୟମରେ ସମାଧାନ ନ ହେବା ପର୍ଯ୍ୟନ୍ତ ମାଛଧରା ବନ୍ଦ ରଖିବାକୁ ନିଷ୍ପତ୍ତି ନିଆଯାଇଥିଲା।