ବମ୍ବେ: କଥାରେ ଅଛି ସତ କେବେ ଲୁଚି ରହେନା। ବଲିଉଡ୍ ଅଭିନେତା ଟାଇଗର ଶ୍ରଫ କେବେ ବି ଖୋଲାଖୋଲି ଅଭିନେତ୍ରୀ ଦିଶା ପଟାନୀଙ୍କ ସହ ସମ୍ପର୍କକୁ ନେଇ ମୁହଁ ଖୋଲି ନାହାନ୍ତି। ହେଲେ ଉଭୟଙ୍କୁ ବଲିଉଡ୍ର ଲୋକପ୍ରିୟ ଯୋଡ଼ି ବୋଲି କୁହାଯାଇଥାଏ। ଉଭୟଙ୍କ ପ୍ରେମର ଗାଡ଼ି ଠିକ୍ ଚାଲୁଥିଲେ ହେଁ ନିକଟରେ ତାଙ୍କର ବ୍ରେକ୍ଅପ୍ ହୋଇଥିବା ନେଇ ଚର୍ଚ୍ଚା ଜୋର ଧରିଥିଲା। ହେଲେ ଏବେ ସେମାନଙ୍କ ମଧ୍ୟରେ ସବୁକିଛି ଠିକ୍ ଚାଲିଥିବା ଜଣାପଡ଼ିଛି। ନିଜେ ଟାଇଗର ଏନେଇ ପରୋକ୍ଷରେ ଜଣାଇଛନ୍ତି।
ଟାଇଗର ନିଜର ଇନ୍ଷ୍ଟାଗ୍ରାମ ପୋଷ୍ଟରେ ‘ଏକ ଭିଲେନ୍ ରିଟର୍ନସ୍’କୁ ନେଇ ଦିଶାଙ୍କ ପ୍ରଶଂସା କରିଛନ୍ତି। ଫିଲ୍ମର ପୋଷ୍ଟର ଶେୟାର କରି ସେ ଲେଖିଛନ୍ତି-ବହୁତ ସୁନ୍ଦର ଫିଲ୍ମ। ଏଥିରେ ପ୍ରତିଟି କଳାକାର ନିଜର ସର୍ବୋତ୍ତମ ଦେଇଛନ୍ତି। ଏଥିସହ ସେ ଏକ ହୃଦୟ ଇମୋଜୀ ମଧ୍ୟ ଦେଇଥିବା ଦେଖାଯାଇଛି।
ଗୋଟିଏ ପଟେ ଟାଇଗର-ଦିଶା ଅଲଗା ହୋଇଥିବା ଖବର ଶୁଣିବାକୁ ମିଳୁଥିବା ବେଳେ ଉଭୟ ପରସ୍ପରର ପ୍ରଶଂସା କରୁଛନ୍ତି। ଫିଲ୍ମର ପ୍ରମୋଶନ କରିବା ବେଳେ ଦିଶା ଟାଇଗରଙ୍କ ଭୂରି ପ୍ରଶଂସା କରିଥିଲେ। ଏବେ ଟାଇଗରଙ୍କ ପୋଷ୍ଟ ଉଭୟଙ୍କ ସମ୍ପର୍କ ତୁଟି ନ ଥିବା ସ୍ପଷ୍ଟ କରୁଛି ବୋଲି ପ୍ରଶଂସକ କହୁଛନ୍ତି। ତେବେ ଏହା କେତେ ସତ କେତେ ମିଛ ତାହା ସେମାନେ ହିଁ ସ୍ପଷ୍ଟ କରିପାରିବେ।
