ନନ୍ଦପୁର,୧୬ା୫(ତୁଷାରକାନ୍ତ ମହାନ୍ତି): କୋରାପୁଟ ଜିଲା ନନ୍ଦପୁର ବ୍ଲକ ମାଳିବେଲଗାଁ ପଞ୍ଚାୟତ ଖୁଜେଲ ଗ୍ରାମର ଚାଷଜମି ଦେଇ ଯାଇଥିବା ୩୩ କେଭି ବିଦ୍ୟୁତ୍ ଲାଇନର ଖୁଣ୍ଟ ଓ ତାର ଦୀର୍ଘଦିନ ହେଲା ବିପଦସଙ୍କୁଳ ଅବସ୍ଥାରେ ଜମି ପଟକୁ ନଇଁ କି ରହିଥିଲା। ପୋଲ ତଳେ ପାଣି କାଦୁଅ ମଧ୍ୟ ଜମି ରହିଥିଲା। ବିଦ୍ୟୁତର ଭୟାବହତା ଜାଣି ମଧ୍ୟ ଉକ୍ତ ବିଦ୍ୟୁତ ଖୁଣ୍ଟ ଓ ତାରକୁ ସୁରକ୍ଷିତ ଅବସ୍ଥାରେ ରଖିବାକୁ ଟିପି ଏସ୍ଓଡିଏଲ କର୍ତ୍ତୃପକ୍ଷ ଅଣଦେଖା କରିଥିଲେ। ଯାହାର ସଂସ୍ପର୍ଶରେ ଆସି ଶନିବାର ଜଣେ ଦିବ୍ୟାଙ୍ଗ (ମୁକ) ମହିଳା ଗୁରୁତର ହୋଇଛନ୍ତି। ମହିଳା ଜଣକ ଖିଜେଲ ଗ୍ରାମର ୪୨ ବର୍ଷୀୟ ଅନ୍ତ୍ରୀମ ମାଣ୍ଡି ବୋଲି ପରିଚୟ ମିଳିଛି। ତାଙ୍କ ବାମପଟ ହାତରେ ଗଭୀର କ୍ଷତ ସୃଷ୍ଟି ହୋଇଛି। ସେ ଜମିପଟ ରାସ୍ତା ଦେଇ ଯାଉଥିବା ବେଳେ ଏଭଳି ଅଘଟଣର ଶିକାର ହୋଇଥିବା ଜଣାପଡ଼ିଛି। ଗ୍ରାମବାସୀଙ୍କ ସହାୟତାରେ ତାଙ୍କୁ ନନ୍ଦପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଅଣାଯାଇ ଚିକିତ୍ସା କରାଯାଉଛି। ସୂଚନା ପାଇ ଜିଲା ସ୍ବତନ୍ତ୍ର ଉନ୍ନୟନ ପରିଷଦ ଅଧ୍ୟକ୍ଷ ଭଗବାନ ମୁଦୁଲି, ଭାଜପା ଜାତୀୟ କାଉନସିଲ ସଦସ୍ୟ ଜୟରାମ ଭୋଇ ପ୍ରମୁଖ ଘଟଣାସ୍ଥଳରେ ପହଞ୍ଚି ବିଦ୍ୟୁତ୍ଖୁଣ୍ଟ ଓ ପୋଲର ବିପଦସଙ୍କୁଳ ସ୍ଥିତି ଅନୁଧ୍ୟାନ କରିଛନ୍ତି। ଜିଲାପାଳ ଓ ଟିପିଏସଓଡିଏଲ କର୍ତ୍ତୃପକ୍ଷଙ୍କ ସହ ଆଲୋଚନା କରି ଘଟଣାର ତଦନ୍ତ ଓ ବିଦ୍ୟୁତ ଖୁଣ୍ଟ ଓ ତାରକୁ ସୁରକ୍ଷିତ ଅବସ୍ଥାରେ ରଖିବା ବ୍ୟବସ୍ଥା କରିବେ ବୋଲି ସୂଚନା ଦେଇଛନ୍ତି। ଗ୍ରାମବାସୀ ଗୁରୁତର ଦିବ୍ୟାଙ୍ଗ ମହିଳା ଅନ୍ତ୍ରିମଙ୍କ ଉତ୍ତମ ଚିକିତ୍ସା ବ୍ୟବସ୍ଥା କରିବାକୁ ପ୍ରଶାସନ ଦୃଷ୍ଟି ଦେଉ ବୋଲି ଅନୁରୋଧ କରିଛନ୍ତି।