ରାଉରକେଲା,୨୪।୧୨(ଦିନେଶ ମିଶ୍ର): ରାଉରକେଲା ସହରରେ ଝାଡ଼ାବାନ୍ତି ଆତଙ୍କ ଲାଗି ରହିଥିବା ବେଳେ ଏବେମଧ୍ୟ ବିଭିନ୍ନ ସ୍ଥାନରେ ପାଇପ୍ ଫାଟି ରାସ୍ତାରେ ପାଣି ବୋହୁଛି। ଫଳରେ ଏହି ଫଟା ପାଇପ୍ରେ ଅପରିଷ୍କାର ପାଣି ମିଶୁଥିବାରୁ ଲୋକେ ରୋଗଗ୍ରସ୍ତ ହେଉଥିବା ଅଭିଯୋଗ ହେଉଛି। ଏଭଳି ଦୃଶ୍ୟ ବାସନ୍ତୀ କଲୋନି ସ୍ଥିତ ଏଫ୍ଇ-୧୧ ଘର ସମ୍ମୁଖରେ ଥିବା ଏକ ସେଫ୍ଟି ଟାଙ୍କି ନିକଟରେ ଦେଖିବାକୁ ମିଳିଛି।
ବାସନ୍ତୀ କଲୋନୀ ସ୍ଥିତ ଏଫ୍ଇ ଓ ଏଇ ବ୍ଲକରେ ବିଶୁଦ୍ଧ ପାନୀୟ ଜଳ ଯୋଗାଇ ଦେବା ପାଇଁ ୬ ମାସ ତଳେ ୱାଟକୋ ପକ୍ଷରୁ ନୂଆ ପାଇପ୍ ଲାଇନ ସଂଯୋଗୀକରଣ କରାଯାଇଥିଲା। ଏହି କାମ ସରିବା ପରେ ଉକ୍ତ ଅଞ୍ଚଳର ଲୋକଙ୍କୁ ୨୪ ଘଣ୍ଟା ପାନୀୟ ଜଳ ଯୋଗାଇ ଦିଆଯିବ ବୋଲି କୁହାଯାଇଥିଲା। ଫଳରେ ଲୋକମାନେ ନିଜ ଘରକୁ ପାଇପ୍ ସଂଯୋଗ କରିଥିଲେ। ତେବେ ୩ ମାସ ଭିତରେ କାମ ସରିବା ପରେ ୱାଟକୋ ବିଭାଗ ପାଣି ଲାଇନକୁ ଯାଞ୍ଚ ନ କରି ସିଧାସଳଖ ପାଣି ଛାଡି ଦେଇଥିଲା। ଏଭଳି ନୂତନ ବାରମ୍ବାର ପାଇପ୍ ଲାଇନରେ ପାଣି ଆସିବାର କିଛି ଦିନ ପରେ ଏଫ୍ଇ ବ୍ଲକ ଅଞ୍ଚଳରେ ପାଇପ ଫାଟିଯିବାରୁ ରାସ୍ତା ଉପରେ ପାଣି ଭାସୁଛି।
ଏ ନେଇ ସ୍ଥାନୀୟ ଲୋକେ ୱାଟକୋ ବିଭାଗ ପାଖରେ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳିନାହିଁ। ଯେଉଁ ସ୍ଥାନରେ ପାଣି ପାଇପ ଫାଟି ପାଣି ଝରୁଛି ସେଠାରେ ଏକ ସେଫ୍ଟି ଟାଙ୍କି ରହିଛି। ଏହାର ପାଣି ପାଇପ୍ରେ ମିଶିବା ଯୋଗୁ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ସେହିପରି ଉକ୍ତ ବ୍ଲକର ଶହେ ମିଟର ଦୂରରେ ଏକ ପାଇପ୍ ଫାଟି ପାଣି ବୋହୁଛି। ଏହି ପାଇପ୍ରେ ଡ୍ରେନ ପାଣି ମିଶୁଥିବାରୁ ଲୋକଙ୍କ ଘରକୁ ଗୋଳିଆ ଓ ଅପରିଷ୍କାର ପାଣି ଆସୁଛି। ବର୍ତ୍ତମାନ ସହରରେ ଝାଡ଼ାବାନ୍ତି ପ୍ରଭାବ ରହିଥିବାବେଳେ ଏଭଳି ପାଇପ୍ ଫାଟି ବାହାର ଅପରିଷ୍କାର ପାଣି ମିଶିବା ଯୋଗୁ ଲୋକଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି। ୱାଟକୋ ବିଭାଗ ଏଥିପ୍ରତି ଦୃଷ୍ଟି ଦେବାକୁ ଦାବି ହୋଇଛି।
ଏ ନେଇ ରାଉରକେଲା ୱାଟକୋ ଉପମହାପ୍ରବନ୍ଧକ ପ୍ରତାପ କେଶରୀ ମହାନ୍ତିଙ୍କୁ ପଚାରିବାରୁ ସେ କହିଥିଲେ, ସହରରେ ବର୍ତ୍ତମାନ ଝାଡ଼ାବାନ୍ତି ପରିସ୍ଥିତିକୁ ନେଇ ୱାଟ୍କୋ ବିଭାଗ ସଜାଗ ରହିଛି। ପାଇପ ଫାଟିଥିବା ସ୍ଥାନଗୁଡିକୁ ଯାଞ୍ଚ କରିବା ପାଇଁ ଏକ ସ୍ବତନ୍ତ୍ର ୧୧ ଜଣିଆ ଟିମ୍ ଗଠନ କରାଯାଇଛି। ଏହି ଟିମ୍ ରିପୋର୍ଟ ଅନୁଯାୟୀ ସହରରେ ବର୍ତ୍ତମାନ ସୁଦ୍ଧା ୱାଟକୋ ପକ୍ଷରୁ ୫୩ଟି ସ୍ଥାନରେ ଫାଟିଥିବା ପାଣି ପାଇପ୍ ମରାମତି କାମ ସରିଛି। ଆହୁରି ୩୨ଟି ସ୍ଥାନରେ ପାଇପ୍ ଫାଟି ପାଣି ବୋହୁଥିବା ନେଇ ଅଭିଯୋଗ ରହିଛି। ଆଗାମୀ ୧୫ ଦିନ ଭିତରେ ସମସ୍ତ ପାଣିପାଇପ୍ ମରାମତି କାମ ସାରିବାକୁ କର୍ମଚାରୀମାନଙ୍କୁ ନିର୍ଦ୍ଦେଶ ଦିଆଯାଇଛି। ଏଥିସହ ଯେଉଁଠାରେ ୱାଟର ପ୍ଲାଣ୍ଟ ରହିଛି ସେଠାରେ ପ୍ରତିଦିନ ହାଇଜେନିକ୍ ପଦ୍ଧତିରେ ପାଣିକୁ ବିଶ୍ଳେଷଣ କରିବା ପରେ ପିଇବା ପାଇଁ ଛଡାଯାଉଛି। ସହରରେ କିଭଳି ଝାଡ଼ାବାନ୍ତି ପରିସ୍ଥିତିକୁ ନିୟନ୍ତ୍ରଣ କରାଯାଇପାରିବ ସେ ନେଇ ଆମ ଟିମ୍ ଉଦ୍ୟମ ଜାରି ରଖିଛି ବୋଲି ମହାନ୍ତି କହିଥିଲେ।
