ପୁରୀ ଅଫିସ,୭ା୯: ଇନ୍ଦ୍ରଦ୍ୟୁମ୍ନ ପୁଷ୍କରିଣୀରେ ପଶୁଛି ମଇଳା ପାଣି। ସ୍ବେରେଜ ନଳା ଫାଟିଯାଇଥିବାରୁ ଏଭଳି ସ୍ଥିତି ଉପୁଜିଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଏ ନେଇ ଏକାଧିକଥର ବିଭାଗୀୟ ଅଧିକାରୀଙ୍କୁ ଜଣାଇଲେ ମଧ୍ୟ କୌଣସି ପଦକ୍ଷେପ ନିଆଯାଉ ନାହିିଁ। ଫଳରେ ପବିତ୍ର ତୀର୍ଥ ପୁଷ୍କରିଣୀର ଏଭଳି ସ୍ଥିତିକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ଶ୍ରୀକ୍ଷେତ୍ରର ପଞ୍ଚତୀର୍ଥ ମଧ୍ୟରୁ ଅନ୍ୟତମ ତୀର୍ଥ ହେଉଛି ଇନ୍ଦ୍ରଦ୍ୟୁମ୍ନ। ହିନ୍ଦୁ ଧର୍ମାବଲମ୍ବୀମାନେ ପବିତ୍ର ପଞ୍ଚତୀର୍ଥରେ ବୁଡ଼ ପକାଇଲେ ପୁରୀକୁ କରିଥିବା ତୀର୍ଥଯାତ୍ରା ସଫଳ ହୁଏ ବୋଲି ବିଶ୍ୱାସ ରଖନ୍ତି। ଏଭଳି ତୀର୍ଥଯାତ୍ରୀଙ୍କ ଭାବାବେଗ ସହ ଜଡ଼ିତ ଇନ୍ଦ୍ରଦ୍ୟୁମ୍ନ ପୁଷ୍କରିଣୀର ଉପଯୁକ୍ତ ରକ୍ଷଣାବେକ୍ଷଣ କରାଯାଉ ନାହିଁ। ପ୍ରାୟ ଦୁଇବର୍ଷରୁ ଊର୍ଦ୍ଧ୍ୱ ହେବ ପାଚେରୀ ଭାଙ୍ଗିପଡ଼ିିଥିବାବେଳେ ନିକଟରେ ଏହାର ମରାମତି କରାଯାଇଛି। ମାତ୍ର ପୂର୍ବପଟେ ରାସ୍ତା ତଳେ ଯାଇଥିବା ସ୍ବେରେଜ ବୋର୍ଡ ନଳାର ଗୋଟିଏ ଜଏଣ୍ଟ ସ୍ଥାନ ଫାଟି ଯିବାରୁ ଏଠାରୁ ମଇଳା ପାଣି ବାହାରି ଇନ୍ଦ୍ରଦ୍ୟୁମ୍ନ ପୁଷ୍କରିଣୀରେ ମିଶୁଛି। ସ୍ଥାନୀୟ ଲୋକଙ୍କ କହିବା ଅନୁଯାୟୀ, ପୁଷ୍କରିଣୀର ତିନିପାର୍ଶ୍ୱ ପାଚେରୀ ଭାଙ୍ଗିଯାଇଥିଲା। ବହୁ ଦିନ ପର୍ଯ୍ୟନ୍ତ ପାଚେରୀ ମରାମତି କରାଗଲା ନାହିଁ। ମାତ୍ର ନିକଟରେ ଏହା ମରାମତି କରାଯାଇଛି। ପୂର୍ବ ପାର୍ଶ୍ୱରେ ଯେଉଁ ପାଚେରୀ କରାଗଲା ତା’ର ୨/୩ ଫୁଟ ବ୍ୟବଧାନରେ ଗୋଟିଏ ଲେଖାଏ ଗାତ ଖୋଳାଯାଇଛି। ଯଦି ବର୍ଷା ଅଧିକ ହୁଏ କାଳେ ପାଚେରୀ ପୁଣି ଭୁଶୁଡ଼ିଯିବ ସେଥିପାଇଁ ଏହି ଗାତ କରାଯାଇଛି। ତେବେ ଏହି ପୂର୍ବ ପାର୍ଶ୍ୱ ପାଚେରୀ ଭୁଶୁଡ଼ିବା ସମୟରେ ଏହା ନିକଟ ଦେଇ ଯାଇଥିବା ସ୍ବେରେଜ ନଳାର ଜଏଣ୍ଟ ସ୍ଥାନ ଏବଂ ପାନୀୟଜଳ ଯୋଗାଣ ପାଇପ ଫାଟି ଯାଇଥିଲା। ଫଳରେ ସ୍ବେରେଜର ମଇଳା ପାଣି ପୁଷ୍କରିଣୀରେ ପଶୁଥିଲା। ରାସ୍ତା ଉପରେ ଏହି ପାଣି ମାଡ଼ି ଦୁର୍ଗନ୍ଧ ହେଉଥିବାରୁ ସ୍ଥାନୀୟ ବାସିନ୍ଦା ବିଭାଗୀୟ ଅଧିକାରୀଙ୍କୁ ଅବଗତ କରାଇଥିଲେ। ପାଣି ପାଇପ ଫାଟିଥିବା ସ୍ଥାନକୁ ମରାମତି କରାଯାଇ ଜଳ ଯୋଗାଣ ବ୍ୟବସ୍ଥା ସ୍ବାଭାବିକ କରାଯାଇଥିଲେ ମଧ୍ୟ ସ୍ବେରେଜ ନଳା ସେମିତି ରହିଛି। ଫଳରେ ସ୍ବେରେଜ ପାଣି ବାହାରି ପାଚେରୀରେ ଥିବା ଗାତ ମଧ୍ୟ ଦେଇ ଇନ୍ଦ୍ରଦ୍ୟୁମ୍ନରେ ମିଶୁଛି। ସେହିପରି ପୂର୍ବପାର୍ଶ୍ୱ ପୁଷ୍କରିଣୀ କଡ଼ରେ ଥିବା ଡ୍ରେନ ଭାଙ୍ଗି ଯାଇଥିବାରୁ ଏହାର ଆବର୍ଜନା ପାଣି ଇନ୍ଦ୍ରଦ୍ୟୁମ୍ନକୁ ଯାଉଛି। ମାତ୍ର ସ୍ବେରେଜର ମଇଳା ପାଣି ଦୁର୍ଗନ୍ଧ ହେଉଥିବାରୁ ସ୍ଥାନୀୟ ବାସିନ୍ଦା ଅସନ୍ତୋଷ ବ୍ୟକ୍ତ କରିଛନ୍ତି।
ଏ ସମ୍ପର୍କରେ ଜନସ୍ବାସ୍ଥ୍ୟ ବିଭାଗର ନିର୍ବାହୀ ଯନ୍ତ୍ରୀ ଶରତ ଚନ୍ଦ୍ର ମିଶ୍ର କହିଛନ୍ତି, ସ୍ବେରେଜ ନଳା ଫାଟି ଇନ୍ଦ୍ରଦ୍ୟୁମ୍ନ ପୁଷ୍କରିଣୀରେ ମଇଳା ପାଣି ପଶୁଥିବା ବିଷୟରେ ମୋ’ ପାଖରେ ଖବର ନ ଥିଲା। ଯଦି ଏପରି ହୋଇଛି ଏ ଦିଗରେ ପଦକ୍ଷେପ ନିଆଯିବ।
