ସୁବା/ବେଜିଂ,୩୧ା୫: ପ୍ରଶାନ୍ତ ମହାସାଗରୀୟ କ୍ଷେତ୍ରରେ ନିଜ ଆଧିପତ୍ୟ ଜାହିର କରିବା ନିମନ୍ତେ ପ୍ରୟାସ କରୁଥିବା ଚାଇନାକୁ ବଡ଼ ଝଟକା ଲାଗିଛି। ପାସିଫିକ୍ ଦ୍ୱୀପଦେଶ ବେଜିଂ ଜାଲରେ ଫସିବାକୁ ନେଇ ଆଶଙ୍କା ଲାଗି ରହିଥିବାବେଳେ ଏହି କ୍ଷେତ୍ରରେ କିନ୍ତୁ ଚାଇନାର କୂଟନୈତିକ ପରାଜୟ ହୋଇଛି। ୧୦ ପ୍ରଶାନ୍ତ ମହାସାଗରୀୟ ଦ୍ୱୀପଦେଶ ବେଜିଂ ସହ ଆଞ୍ଚଳିକ ସୁରକ୍ଷା ଚୁକ୍ତି କରିବାକୁ ସୋମବାର ମନା କରିଦେଇଛନ୍ତି। ଫିଜିରେ ଚାଇନା ବହିର୍ବ୍ୟାପାର ମନ୍ତ୍ରୀ ଓ୍ବାଙ୍ଗ୍ ଇ ଏବଂ ଛୋଟ ଦ୍ୱୀପଦେଶଗୁଡ଼ିକ ମଧ୍ୟରେ ଆଲୋଚନା ହୋଇଥିଲା। ଏଥିରେ ୧୦ ଦ୍ୱୀପଦେଶର ବହିର୍ବ୍ୟାପାର ମନ୍ତ୍ରୀ ଉପସ୍ଥିତ ଥିଲେ। ହେଲେ ବୈଠକରେ ଚାଇନା ସହ କୌଣସି ପ୍ରକାର ସୁରକ୍ଷା ଚୁକ୍ତିନାମା ସ୍ବାକ୍ଷର ହୋଇପାରି ନ ଥିବା ଜଣାଯାଇଛି। ବୈଠକ ପରେ ଆୟୋଜିତ ଖବରଦାତା ସମ୍ମିଳନୀରେ ଫିଜି ପ୍ରଧାନମନ୍ତ୍ରୀ ଫ୍ରାଙ୍କ୍ ବାଇନିମାରାମା ଏବଂ ଓ୍ବାଙ୍ଗ୍ ୩୦ ମିନିଟ୍ ଧରି ଉଦ୍ବୋଧନ ଦେଇଥିଲେ ହେଁ ଖବରଦାତାଙ୍କ କୌଣସି ପ୍ରଶ୍ନର ଉତ୍ତର ନ ଦେଇ ସେଠାରୁ ଉଠିଯାଇଥିଲେ।
ଦୃଷ୍ଟିକୋଣରୁ ବେଶ୍ ଗୁରୁତ୍ୱପୂର୍ଣ୍ଣ ଦକ୍ଷିଣ ପ୍ରଶାନ୍ତ ମହାସାଗରରେ ଚାଇନା ନିଜ ଗତିବିଧି ବଢ଼ାଇବା ପାଇଁ ପ୍ରସ୍ତୁତି ଚଳାଇଛି। ଏହାଦ୍ୱାରା ବେଜିଂ ସିଧାସଳଖ ଆମେରିକା ଓ ଏହାର ସହଯୋଗୀ ରାଷ୍ଟ୍ରକୁ ଚ୍ୟାଲେଞ୍ଜ କରୁଛି। ପ୍ରସ୍ତାବିତ ଚୁକ୍ତି ଅନୁସାରେ, ବେଜିଂ ପ୍ରଶାନ୍ତ ମହାସାଗରୀୟ ଦ୍ୱୀପଦେଶର ପୋଲିସକୁ ତାଲିମ ଦେବା, ସାଇବର ସୁରକ୍ଷା, ଚାଇନା ସହ ରାଜନୈତିକ ସମ୍ପର୍କ ବଢ଼ାଇବା ଆଦି ରହିଥିଲା। ଏହା ବଦଳରେ ଚାଇନା ସମ୍ବେଦନଶୀଳ ସାମୁଦ୍ରିକ ମ୍ୟାପିଂ, ଦ୍ୱୀପରେ ଥିବା ପ୍ରାକୃତିକ ସମ୍ପଦ ହାସଲ ସହ ଜଳପଥରେ ଅବାଧ ପ୍ରବେଶ କରିପାରିବାର ଲକ୍ଷ୍ୟ ରଖିଥିଲା। ଏଥିପାଇଁ ଚାଇନା ନିୟୁତ ନିୟୁତ ଡଲାରର ଦେବାକୁ ପ୍ରସ୍ତାବ ଦେଇଥିଲା। ଏହାସହ ଚାଇନାର ପ୍ରାୟ ୧୪୦ କୋଟି ଲୋକସଂଖ୍ୟା ବିଶିଷ୍ଟ ବିଶାଳ ବଜାରରେ ଦ୍ୱୀପଦେଶଗୁଡ଼ିକ ମୁକ୍ତ ବାଣିଜ୍ୟ କରିବା ନିମନ୍ତେ ଚୁକ୍ତି କରିବା ପାଇଁ ଆଗଭର ହୋଇଥିଲା। ଚାଇନାର ଏଭଳି ଅଫର୍କୁ ନେଇ ପାସିଫିକ୍ ନେତାମାନେ ଚିନ୍ତାବ୍ୟକ୍ତ କରିଥିଲେ। ଫେଡେରାଲ ଷ୍ଟେଟ୍ ଅଫ୍ ମିକ୍ରେନେସିଆର ରାଷ୍ଟ୍ରପତି ଡେଭିଡ୍ ପାନୁଲୋ ନିଜ ସହଯୋଗୀଙ୍କ ଉଦ୍ଦେଶ୍ୟରେ ଏକ ଚିଠି ଲେଖିଥିଲେ। ଚାଇନା ଭଲ ଉଦ୍ଦେଶ୍ୟରେ ଏପରି କରୁ ନ ଥିବା ଏବଂ ସରକାର ଓ ଦେଶର ଅର୍ଥ ବ୍ୟବସ୍ଥାକୁ ବେଜିଂ ନିଜ ନିୟନ୍ତ୍ରଣରେ ରଖିବାକୁ ଉଦ୍ୟମ କରୁଥିବା ସେ ଚେତାଇ ଦେଇଥିଲେ। ଏହା ଆଉ ଏକ ଶୀତଳ ଯୁଦ୍ଧର କାରଣ ହୋଇପାରେ ଏବଂ ଆଉ ଗୋଟିଏ ବିଶ୍ୱଯୁଦ୍ଧକୁ ଡାକି ଆଣିପାରେ ବୋଲି ଡେଭିଡ୍ କହିଥିଲେ। ମିକ୍ରୋନେସିଆ ସମେତ ପପୁଆ ନ୍ୟୁ ଗୁଏନା, ସମୋଆ ମଧ୍ୟ ଚାଇନାର ଏହି ପ୍ରସ୍ତାବକୁ ନେଇ ଚିନ୍ତିତ ଥିଲେ।
ଚାଇନା ବହିର୍ବ୍ୟାପାର ମନ୍ତ୍ରୀ ଓ୍ବାଙ୍ଗ ଇଙ୍କ ୧୦ ଦିନିଆ ପ୍ରଶାନ୍ତ ମହାସାଗରୀୟ ଅଞ୍ଚଳ ଗସ୍ତ ସଫଳ ହୋଇଥିବା ନେଇ ବେଜିଂ ଅଧିକାରୀ ଦେଖାଇବାକୁ ଚେଷ୍ଟା କରୁଛନ୍ତି। ଆଲୋଚନାବେଳେ ଚାଇନା ପକ୍ଷରୁ ଚୁକ୍ତି ପାଇଁ ସେତେ ଜୋର ଦିଆଯାଇ ନ ଥିଲା ବୋଲି ବେଜିଂ କହିଛି। ବିଫଳତା ଲୁଚାଇବା ପାଇଁ ଓ୍ବାଙ୍ଗ୍ ମଧ୍ୟ ଚେଷ୍ଟା କରିଛନ୍ତି। ୧୦ ଦ୍ୱୀପଦେଶ ଚାଇନାର ‘ବେଲ୍ଟ ଆଣ୍ଡ୍ ରୋଡ୍’ ପ୍ରୋଜେକ୍ଟ ସଂକ୍ରାନ୍ତୀୟ ଚୁକ୍ତି ସ୍ବାକ୍ଷର କରିଥିବା ଓ୍ବାଙ୍ଗ୍ କହିଛନ୍ତି। ତେବେ ଓ୍ବାଙ୍ଗ୍ଙ୍କ ଗସ୍ତ ବେଳେ ଏହି ଦ୍ୱୀପଦେଶଗୁଡ଼ିକ ସହ ଏକାଧିକ ଛୋଟ ଛୋଟ ଦ୍ୱିପାକ୍ଷିକ ଚୁକ୍ତି ହୋଇଛି।
