ନୂଆଦିଲ୍ଲୀ,୨୧।୬(ପି.ଟି.): କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଇସ୍ତଫା ନ ଦେବା ଯାଏ ନୂଆଦିଲ୍ଲୀର ଯନ୍ତରମନ୍ତର ଛାଡ଼ିବେ ନାହିଁ ବୋଲି କକ୍ରୋଚ୍ ଜନତା ପାର୍ଟି (ସିଜେପି) ପ୍ରତିଷ୍ଠାତା ଅଭିଜିତ ଦୀପ୍କେ ଶନିବାର କହିବା ସହ ବିକ୍ଷୋଭ ଜାରି ରଖିବା ଲାଗି ଅନୁମତି ସମୟସୀମା ବଢ଼ାଇବାକୁ ଦିଲ୍ଲୀ ପୋଲିସକୁ ନିବେଦନ କରିଥିଲେ। ବିକ୍ଷୋଭ ଜାରି ରଖିବା ନିମନ୍ତେ ଅନୁମତି ଦେବାକୁ ଦିଲ୍ଲୀ ପୋଲିସ ମନା କରିଦେଇଛି। ତୁରନ୍ତ ବିକ୍ଷୋଭସ୍ଥଳ ଛାଡ଼ି ଚାଲିଯିବାକୁ ପୋଲିସ ସିଜେପି ସମର୍ଥକମାନଙ୍କୁ ନିର୍ଦ୍ଦେଶ ଦେଇଛି।
ବାରମ୍ବାର ଏନ୍ଇଇଟି ପ୍ରଶ୍ନପତ୍ର ଲିକ୍ ଓ ପରୀକ୍ଷାରେ ଅନିୟମିତତା ପାଇଁ ସରକାର ଉତ୍ତରଦାୟୀ ରହିବା ଦାବି ନେଇ ସିଜେପି ପକ୍ଷରୁ ଶନିବାର ଦ୍ୱିତୀୟ ଥର ପାଇଁ ଯନ୍ତରମନ୍ତରରେ ବିକ୍ଷୋଭ ସମାବେଶ ହୋଇଥିବାବେଳେ ସେଥିରେ ବହୁସଂଖ୍ୟାରେ ଛାତ୍ରୀଛାତ୍ର ଓ ଅନ୍ୟମାନେ ସାମିଲ ହୋଇଥିଲେ। ସାରା ଦେଶରୁ ଯୁବବର୍ଗ ବିକ୍ଷୋଭରେ ସାମିଲ ହୋଇଛନ୍ତି ଏବଂ ସେମାନେ ନ୍ୟାୟ ପାଇବା ପର୍ଯ୍ୟନ୍ତ ଏଠାରେ ବସିରହିବାକୁ ଚାହାନ୍ତି ବୋଲି ଦୀପ୍କେ କହିବା ସହ ଅନୁମତି ସମୟସୀମା ବଢ଼ାଇବାକୁ ଦିଲ୍ଲୀ ପୋଲିସକୁ ନିବେଦନ କରିଥିଲେ।
ବିକ୍ଷୋଭ ଶାନ୍ତିପୂର୍ଣ୍ଣ ଭାବେ ଚାଲିଛି ଏବଂ ନିରୀହ ଛାତ୍ରୀଛାତ୍ରମାନେ ଏଠାରେ ବସିବାକୁ ଚାହାନ୍ତି ବୋଲି ଦୀପ୍କେ କହିଥିଲେ। ଆଲୋଚନା ପାଇଁ ଚ୍ୟାନେଲ ଖୋଲାରହିଛି। କିନ୍ତୁ ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଇସ୍ତଫା ଦେବା ଏକମାତ୍ର ସର୍ତ୍ତ ବୋଲି ସେ କହିଥିଲେ। କେନ୍ଦ୍ର ସହ ଆଲୋଚନା କରିବାକୁ ସେ ଦିଲ୍ଲୀ ପୋଲିସକୁ ଅନୁରୋଧ କରିଥିଲେ। ଯଦି ଗିରଫ କରାଯାଏ, ତେବେ ସେ ପ୍ରଥମେ ଗିରଫ ହେବେ ବୋଲି କହିଥିଲେ। ବିକ୍ଷୋଭ ଜାରି ରଖିବା ପାଇଁ ସମର୍ଥକମାନେ ସନ୍ଧ୍ୟା ୬ଟାରେ ଯନ୍ତରମନ୍ତରରେ ପହଞ୍ଚତ୍ବାକୁ ସିଜେପି ପ୍ରତିଷ୍ଠାତା ନିବେଦନ କରିଥିଲେ ଓ ପୋଲିସ ବିକ୍ଷୋଭ ଜାରି ରଖିବାକୁ ଅନୁମତି ଦେବ ବୋଲି ଦୃଢ଼ୋକ୍ତି କରିଥିଲେ।
ଯନ୍ତରମନ୍ତରରେ ବ୍ୟାପକ ପୋଲିସ ଫୋର୍ସ ମୁତୟନ ମଧ୍ୟରେ ସକାଳେ ବିକ୍ଷୋଭ ଆରମ୍ଭ ହୋଇଥିଲା। ଛାତ୍ରୀଛାତ୍ରୀ ପ୍ଲାକାର୍ଡ ଧରି ସ୍ବଚ୍ଛ ପରୀକ୍ଷା ପରିଚାଳନାରେ ବିଫଳତାକୁ ନେଇ ସରକାରଙ୍କୁ ଜବାବ ମାଗିଥିଲେ। ସମର୍ଥକମାନଙ୍କୁ ଥାଳି ଚାମଚ ଆଣି ବିକ୍ଷୋଭ ସ୍ଥଳକୁ ଆସିବା ଲାଗି ଦୀପ୍କେ କହିଥିଲେ। ବିକ୍ଷୋଭର ପ୍ରତୀକ ସ୍ବରୂପ ସେଗୁଡ଼ିକୁ ବଜାଇବାକୁ କୁହାଯାଇଥିଲା।
