କଲମ୍ବୋ, ୨୬।୮: ଦୀନେଶ ଚାଣ୍ଡିମଲ। ଶ୍ରୀଲଙ୍କା କ୍ରିକେଟ୍ ଦଳର ପୂର୍ବତନ ଅଧିନାୟକ ତଥା ଉଇକେଟ୍କିପର। ଗତବର୍ଷ ଚୟନକର୍ତ୍ତମାନେ ଚାଣ୍ଡିମଲଙ୍କୁ ଅଧିନାୟକ ପଦରୁ ହଟାଇ ଦେବା ସହିତ ଦକ୍ଷିଣ ଆଫ୍ରିକା ବିପକ୍ଷ ସିରିଜ ଲାଗି ଶ୍ରୀଲଙ୍କା ଦଳରୁ ମଧ୍ୟ ବାଦ୍ ଦେଇଥିଲେ। ଏହି ଡାହାଣହାତୀ ବ୍ୟାଟ୍ସମ୍ୟାନ କିନ୍ତୁ ଏବେ ଚମତ୍କାର ଫର୍ମକୁ ଫେରିଛନ୍ତି। ଘରୋଇ ପ୍ରଥମ ଶ୍ରେଣୀ କ୍ରିକେଟ୍ରେ ସେ ତ୍ରିଶତକ ହାସଲ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଛନ୍ତି। ଶ୍ରୀଲଙ୍କା ଆର୍ମି ପକ୍ଷରୁ ପ୍ରତିନିଧିତ୍ୱ କରୁଥିବା ଚାଣ୍ଡିମଲ ସାରାସେନ୍ସ ଏସ୍ସି ବିପକ୍ଷରେ ୩୫୪ ରନର ଏକ ମାରାଥନ ଇନିଂସ ଖେଳିଛନ୍ତି। ଏହି ଇନିଂସ ମଧ୍ୟରେ ସେ ୨୯ ଚୌକା ଓ ୮ ଛକା ମାରିଥିଲେ। ବାଉଣ୍ଡରୀ ଆକାରରେ ସେ ମୋଟ୍ ୧୬୪ ରନ୍ ସଂଗ୍ରହ କରିଥିଲେ। ଦୀନେଶଙ୍କ ଏହି ଇନିଂସ ବଳରେ ତାଙ୍କ ଦଳ ୮ ଉଇକେଟ୍ରେ ୬୪୨ ରନ କରି ଇନିଂସ ଘୋଷଣା କରିଥିଲା। ଚାଣ୍ଡିମଲଙ୍କ କ୍ରିକେଟ୍ କ୍ୟାରିୟରର ଏହା ପ୍ରଥମ ତ୍ରିଶତକ। ଏଥିପୂର୍ବରୁ ପ୍ରଥମ ଶ୍ରେଣୀ କ୍ରିକେଟ୍ରେ ତାଙ୍କର ସର୍ବାଧିକ ବ୍ୟକ୍ତିଗତ ସ୍କୋର ୨୪୪ ରନ ଥିଲା। ୧୮ ଅଗଷ୍ଟ ୨୦୧୦ରେ ସେ ଦକ୍ଷିଣ ଆଫ୍ରିକା ବିପକ୍ଷରେ ଏହି ଇନିଂସ ଖେଳିଥିଲେ। ଏଠାରେ ଉଲ୍ଲେଖଯୋଗ୍ୟ, ଶ୍ରୀଲଙ୍କା କ୍ରିକେଟ୍ ଇତିହାସରେ ୧୦ଜଣ ବ୍ୟାଟ୍ସମ୍ୟାନ ତ୍ରିଶତକ ହାସଲ କରିଛନ୍ତି। ସେମାନଙ୍କ ମଧ୍ୟରୁ ସର୍ବାଧିକ ସ୍କୋର ମାହେଲା ଜୟବର୍ଦ୍ଧନେ (୩୭୪ ରନ)ଙ୍କ ନାମରେ ରହିଛି।
