ନୂଆଦିଲ୍ଲୀ,୨୯।୧୨: କଂଗ୍ରେସ କାର୍ଯ୍ୟକାରିଣୀ ବୈଠକ ପୂର୍ବରୁ ବରିଷ୍ଠ କଂଗ୍ରେସ ନେତା ଦିଗବିଜୟ ସିଂହ ଭାଜପା ଏବଂ ଆରଏସଏସର ସାଂଗଠନିକ ଶକ୍ତିକୁ ପ୍ରଶଂସା କରି ଦଳ ପାଇଁ ଅଡୁଆ ବଢାଇଛନ୍ତି। ଯଦିଓ ସେ ପରେ ସ୍ପଷ୍ଟୀକରଣ ଦେଇ କହିଥିଲେ, ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଆରଏସଏସର ନୀତିର ଘୋର ବିରୋଧ କରନ୍ତି। ସେତେବେଳକୁ ଦଳ ଭିତରେ ଆଭ୍ୟନ୍ତରୀଣ ପରିସ୍ଥିତି ବହୁତ ଅସ୍ଥିର ହୋଇଯାଇଥିଲା। ସୂତ୍ର ଅନୁଯାୟୀ, ରବିବାର ଦଳର ପ୍ରତିଷ୍ଠା ଦିବସ ପାଳନ ଅବସରରେ ଏକ କାର୍ଯ୍ୟକ୍ରମରେ ରାହୁଲ ଗାନ୍ଧୀ ଦିଗବିଜୟଙ୍କୁ ଭେଟିଥିଲେ। ସେ ମଜାରେ ତାଙ୍କୁ କହିଥିଲେ, ତୁମେ ବଦମାସୀ କାମ କରିଛ।
କାର୍ଯ୍ୟକମିଟି ବୈଠକ ଆରମ୍ଭ ହେବା ପୂର୍ବରୁ, ଦିଗବିଜୟ ସିଂହ ଏକ୍ସରେ ଏକ ପୁରୁଣା ଫଟୋ ଶେୟାର କରିଥିଲେ, ଯେଉଁଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଗରେ ବସିଛନ୍ତି, ଭାଜପାର ବରିଷ୍ଠ ନେତା ଲାଲକୃଷ୍ଣ ଆଡଭାନୀ ତାଙ୍କ ପଛରେ ଏକ ଚେୟାରରେ ବସିଛନ୍ତି।
ଦିଗବିଜୟ ସିଂହ ପୋଷ୍ଟ କରିଥିଲେ, ମୁଁ ଏହି ଫଟୋକୁ Quora ରେ ପାଇଲି। ଏହା ବହୁତ ପ୍ରଭାବଶାଳୀ। କିପରି ଜଣେ ତୃଣମୂଳ RSS ସ୍ବେଚ୍ଛାସେବକ ଏବଂ ଜନସଂଘର ଜଣେ ଭାଜପା କର୍ମୀ, ନେତାଙ୍କ ପାଦତଳେ ବସି ଏକ ରାଜ୍ୟର ମୁଖ୍ୟମନ୍ତ୍ରୀ ଏବଂ ଦେଶର ପ୍ରଧାନମନ୍ତ୍ରୀ ହେଲେ। ଏହା ସଂଗଠନର ଶକ୍ତି। ଜୟ ସିଆରାମ। ତାଙ୍କ ପୋଷ୍ଟ ବିବାଦ ସୃଷ୍ଟି କରିଥିଲା।
ଦିଗବିଜୟ ସିଂହ ତା’ପରେ ସ୍ପଷ୍ଟୀକରଣ ଦେଇ କହିଥିଲେ,ମୁଁ ସଂଗଠନର ପ୍ରଶଂସା କରିଛି। ମୁଁ RSS ଏବଂ ମୋଦିଜୀଙ୍କର ଏକ କଠୋର ବିରୋଧୀ ଥିଲି, ଅଛି ଏବଂ ରହିବି।
Dharitri – Odisha’s No.1 Odia Daily
